¿AOMÉROMIRÉ echi Onorúami amígowala nijewá japalí ikisaa namuti we jilírami, tako a machiyé japi ke bilé namuti iyiri mema nijewasa? Bilé rejoy japi Job rewéami nili echi riká ikili. Ma ineba chu ikila.

Job ko Abrahán téemala nili. Japalí echi israelitas pireili echoná Egíptochi, echi ko biteili biléana japi jipi ko riwéi Arabia. Siné rawé, Jeobá niwali bilé napawíliami ripá siyónachi echi ángeles yúa. Satanás ayénachó si asali echoná. Sinéami kipuli japalí Jeobá anili japi tasi wesi iteili echi iyena nijéwami japi riká Job, echi riká néwariwéili kiti Jeobá ko né we aʼlá bichíwili echi Job. We nalí Satanás ko je be anili pa japi Job a nijéwami nili kiti Onorúami iyali wiká namuti alí kiti tibútami nili. Ayénachó jéanili japiré a iyésiwaká suwaba japi Job olali, pe Jeobá sayérala nílimalé.

Onorúami ko risensia iyali echi Diablo kiti iyema suwaba namuti japi Job olali, kiti koʼwimea echi kúchuwala, alí kiti nayúntima. Job ko ke machili japi Satanás iyiri nili japi riká ikili. Echi ko ke oméroli machiyá chúsiá Onorúami riweli japi echi riká ikimea. We nalí be, Job ko ke sineti riweli Jeobá.

Alí biché bikiá pagótami japi Job amígowala ko ruyá anili, simíali inebia alí pe iyónili. Japi aneiri uchúi echoná oselichi Job. Echi ko nakili kiti Job ko mayema kiti rikíritami nili Onorúami kitra kiti echi ko isiili namuti chati. ¡Echi japi aniiru echi ko né wabé ikaléwami nili! Ayénachó aneiru Job kiti Onorúami ke me natéami niraa ineni kipi amígowala alí kiti Onorúami tasi bichiwi kipi amígowala. Job ko tasi bichíwili echi raʼíchali alí jéaneli kiti echi ko a nijéwiami nima riweili Onorúami sinibí japalí biteili.

Job ko anili kiti ke bichíwali nili japi aniiru echi kitra alí kiti we mi omona nili. Elihú, bilé remalí japi kipuli suwaba japi aniiru, iyónili Job kiti ke me natéami niraa ineli echi Jeobá riwalá alí japi riká nuláami ju. Ayénachó, wabé iyónili echi pagótami japi ke bichíwali Job amígowala nili.

Alí pe aminana biché, Jeobá binói ko iyónili Job. Néeka echi namuti baʼóami japi echi niwali, binérili japi echi pagótami ko kuuchi ju alí Onorúami ko wabé walubé ju. Job ke niráami nili, alí aʼlá katúwili japi echi Jeobá aneli. Alí biché, Jeobá, japi “né wabé natimáami ju, né wabé karéami ayénachó”, echi ko saʼweli Job alí echalí ko wabé wikabé iyali ke pi ko japi ikí olali chabénala kaachi, alí ayénachó, checho jarecho makoy kúchuwala iyali (Santiago 5:11). Echi Job nijéwiala a néwariwéitili japi ke bichíwali nili japi Satanás anili alí kiti echi pagótami ayena a omero nijewia Onorúami chíkoré né wabé jilírami ke echi namuti japi ikiwá.

(Jepuná ko uchúi echoná oselichi Job.)