¿CHÚRIKÁ ta pirélipialé japiré sinéami bilé pueblo alí echi silíami we aʼlá nijéwiami nísaká Jeobá alí we aʼlá riwíisaká japi echi nulá? Echi Salomón gobiérnowala, japi 40 bamíali wilili walúala wilíami ka, a nikuuro machiria jepuná.

Japalí kecho mukuyá, David anili japi echi binói nolá, Salomón rewéami, echi nima riweili silíami japalí echi mukusaa. Siné rawé, Onorúami ko isiili kiti Salomón rimuma alí Onorúami ko aneli Salomón japi iyama riweili suwaba japi echi tama ruli. Echi remalí silíami tali aʼlá natáliami alí machiwáami kiti a oméroma aʼlá nulayá. Jeobá ko we kanili kiti Salomón tali echi, alí iyali né japi echi tali. Ayénachó, aneli japiré a nijéwami nísaká, a olama wabé wikabé namuti alí walubéala nima riweili alí wiká bamíbali bitélima riweili.

Sinéami pagótami a machili kiti Salomón we aʼlá nátami nili. Siné rawé, okuá umukí simíali inebia Salomón, jepuná okuá umukí anili kiti iyela nili bilé muchi. ¿Chu isiili Salomón? ¡Nulali kiti nasipa niraa sikirepa echi taa muchi! Echi bacháwala mukí a katúwili kiti echi riká nima, alí echi bilecho mukí ko ke tasi katúwili japi sikirepa echi taa muchi alí we sapú anili kiti echi bilecho mukí nalí iyaba echi taa muchi. Echi riká machili Salomón japi echi mukí japi ke nakili japi miʼliboa echi taa muchi, echi nalí nili né bichíwali iyela. Japalí kipuli sinéami pueblo japi ikili, machili kiti Onorúami ko iyali Salomón we aʼlá natáliami.

Bilé namuti rikamti wabé walubé japi echi niwali, echi ko nili, echi Jeobá kalila baʼóami japi Jerusalenchi wilili, echoná nili japoná napawili echi israelitas kiti iyama chiliwéliami Jeobá. Echi bachá rawé, japalí suniiru echi Jeobá kalila, Salomón ko raʼíchali Jeobá yúa alí aneli: “¡Nibí! Echi ripá siyónachi, ayena, omáana siyónachi, pe taa ju mujé kitra; ¡ayénachó jepuná kalí japi nijé mi niwili!” (1 Reyes 8:27).

Salomón ko we machiwáami nili, pagótami wikanamti we miká piréami japi riká Seba (we chakó Saba oké), mi jemi Arábiachi, kipuli japi aniwá echi kitra. Echi mukí japi nulayé echoná paísichi, Seba, echi ko simili mi jemi Israel anilíachi kiti echi né binói niraa inema suwaba namuti japi Salomón a olali alí kipi walubéalawala, alí ayénachó, acha né bichíwali nila japi we aʼlá nátami nili. Japalí ma riwali suwaba echi namuti, matétara iyali Jeobá kiti echi isiili kiti Salomón bilé silíami we aʼlá nátami nima. Echi Onorúami nikúurala kitra, Salomón ko we aʼlá silíami nili, echi israelitas aʼlá kilii kanílika pireili alí olali wiká namuti, pe aminana ko ma ke siné echi riká pireili.

We nalí ke aʼláami ka riweili kiti Salomón ke sinibí aʼlá néeli echi aʼlá natáliami japi Jeobá iyali. Onorúami ko a bela anili larú kiti echi isélikami ko ke wiká jubéami niisa riweili, we nalí be Salomón ko wiká mi upea isiili alí, wiká echi umukí, tasi bilé nakíami nili Jeobá, echi ko nakili jarecho onorúami japi ke bichíwali nili. Alí japi ikili ko nili kiti Salomón ko kilipi kilipi niraa riweli Jeobá, alí chotásili nochasia jarecho onorúami japi ke bichíwali nili alí echi jubila iyiri nili. Kiti bela, Onorúami ko aneli kiti echi nolá ko ma wikawama riweili wabé walubé weʼé japoná echi nulali. We nalí be ke suwaba iyeba riweili echi gobiérnowala, kiti Onorúami ko ma a aneli David japi ke echi riká ikimea riweili. Salomón ko pe bela riweli larú Jeobá, we nalí Jeobá ko ayena be a newalali echi katúwiliami japi David yúa isiili pa.

(Jepuná ko uchúi echoná 1 Reyes capítulos 1-11, 2 Crónicas capítulos 1-9 alí Deuteronomio 17:17.)