DANIEL ko bilé israelita nili japi we aʼlá nijéwami nili japi né jiwérili olaká torúami nili echi mi jemi Babilóniachi japalí taa towí nili, pe chabénala kaachi japalí kecho suwábitami nili Jerusalén. Echi alí jarecho judíos chótali pirélisia echoná, we aʼlá pireili, tako ke oméroli machiina echoná ciudad jona. Sinibí bamíali japalí biteili Daniel echoná ciudad, Onorúami ko sinibí kuʼíroli. Siné rawé, Jeobá ko kuʼíroli kiti machíinima bilé jochi jona japoná niruili mawiyá, alí riweli kiti inema japi ikimea riké wabé wikabé bamíali pe aminana. Echi namuti wabé natéami japi Daniel osali echi ko nili echi Mesías kitra alí kipi Gobiérnowala.

Echalí rawé japalí nawama riweili echi Mesías. ¿Kabú buyema riweili echi Onorúami puéblowala japi nawama echi “Mesías”? Daniel ko a aneiru kiti echi Mesías ko nawama riweili 69 tarali pe aminana japalí ma nulásiwa kiti kariweba echi irí tikola pachókirami echoná Jerusalenchi, we nalí jepuná wiká tarali japi raʼichairu bamíbali nalí nili, ke pi rawé nalí. Echi bilé tarali ko olá kichao rawé, echi tarali japi kítara raʼíchali Daniel olali kichao bamíali. Nulairu kiti kariweba echi irí tikola pachókirami echoná Jerusalenchi echi bamíali 455 c.t.r., wabé aminana wikabé bamíali japalí ma mukuli Daniel. Ata chotásaká taraa 455 c.t.r. jona bamíali, 69 “tarali”, japi 483 bamíali ju, echi 69 tarali suwéena echi bamíali 29. ¿Piri ikili echalí bamíali? Jepuná ko pe aminana ineba. Daniel ayénachó aneiru kiti echi Mesías ko “ripunárami” nima riweili, miʼlirúami nima riweili ma, kiti natétima echi namuti chati kitra japi noká sinéami pagótami (Daniel 9:24-26).

Echi Mesías ko Silíami nima riweili ripá siyónachi. Daniel ko a ineli, japi riká ma a né bichíwali ka, japi “bilé rikamti japi riká bilé rejoy nolá,” japi mi muliwia isiili Onorúami ripá siyónachi; jepuná ko echi Mesías nili. Alí biché, Jeobá ko riweli kiti nulama alí iyali walúala wiliwáami, bilé gobierno japi ke siné suwibama. Pe aminana ko Daniel a machili jarecho namuti we natéami echi Mesías Gobiérnowala kitra: echi Silíami ko tasi bineli nulama riweili, jarecho pagótami nulama riweili echi yúa, echi ko ju “echi né wabé kalabé biʼwíami pagótami japi echi Walubéala níwala ju” (Daniel 7:13, 14, 27).

Echi Gobierno ko suwábama riweili sinéami echi isélikami omáana kawichí nirúami. Onorúami ko isiili kiti Daniel oméroma anea Nabucodonosor, echi silíami wilíami echoná Babilóniachi, japi aniwáami nili japi echi rimuli. Echi ko riwali bilé namuti japi mi riká riweili bilé wabé walubé rejoy, echi moʼola ko oro nili, echi rawila alí sikala plata nili, echi ropala alí kasila cobre nili, echi chokóbala túana ko hierro nili alí echi ronola ko hierro nili alí masótami nili wicholí yúa. Alí biché, niruili bilé rité japi machíinali biléana kawírili ayé alí echi rité ko chiwali echoná ronochí japi ke jiwérami nili, alí suwaba ma pe napisó najítili. Daniel ko ruyeli echi silíami kiti echi moʼola japi oro nili, echi ko Babilonia nili, alí japi echi rawila, sikala, ropala, kasila, chokóbala túana alí ronola jarecho países nili japi nirúlima riweili pe aminana mi alí kiti we jiwérami nima riweili. Echi Onorúami Gobiérnowala chotásima riweili nulayá japalí né kuwachimi países nulama riweili, echi ronola japi hierro nili alí wicholí, alí mojonárami nima riweili sinéami isélikami omáana Wichimóbachi nirúami. Pe aminana echi binói nulama riweili omáana Wichimóbachi sinibimti (Daniel, capítulo 2).

Daniel ko biteili wiká bamíali alí riwali japalí Babilonia suwábitami nili. Alí echi riká japi riká aniiru, echi silíami Ciro rewéami mitali echi ciudad. Pe aminana, japalí ma suwíbili echi 70 bamíali japalí Jerusalenchi bineli riweiru, echi judíos ko buyali echoná Babilóniachi jona. Jarecho isélikami, pali alí nawésami nijéwami, anakupi nakúuroka nokali alí kariweli Jerusalenchi alí echi Jeobá kalila. We nalí ¿chu ikili japalí ma simároli 483 bamíali japi aniiru?

(Jepuná ko uchúi echoná Daniel oselíwalachi.)