ECHI oselí japi wiká olá oserúami echoná Bíbliachi a olá wiká wikaráliami japi nokí mili bamíali nokiiru napabúa. Echi japi osali echi wikaráliami a néwariwéili kiti a olali né wabé walubé bichíwiliami osaká namuti we baʼóami. Ayénachó osali japi mi inilia nili, japi riká jepunani: echi kaníliwami, alí echi okolí, echi matétara, alí omonalíwami, alí jarecho wiká namuti. Sinéami echi we nakíami nili Onorúami alí japi inili né mulipi cheka éena echi yúa. Ma ineba jaré namuti rikamti japi nirú echoná oselichi Salmos.

Jeobá bineli bi ju japi nulásaré omáana, alí we nakirúami nísaré alí tamujé ko riwíwisaré alí nakisáré Jeobá. Salmo 83:18 aní: “Mujé, japi mi Jeobá riwéi, pe mujé bineli bi ju echi né wabé Walubéala suwaba omáana wichimóbachi”. A wikanamti salmos alíwami ju matétara Jeobá kiti echi niwálampá ripá siyónami, sipolí, echi bitéliwami jenaʼí Wichimóbachi alí tamujé ripokala baʼóami (Salmos 8, 19, 139 alí 148). Wiká pagótami a riwíwami ju Jeobá kiti echi ko tibula alí niyúbiami ju japi aʼlá nijéwiami ju (Salmos 18, 97 alí 138). Alí jarecho ko wikarániami ju Jeobá kiti echi ko a olá najórowami alí a kuʼiro echi pagótami aʼláala japi risoa nili alí rikiri echi pagótami chati (Salmos 11, 68 alí 146).

Jeobá ko a nikuuro alí isimí kiti echi pagótami japi a nakíami ju echi a kami nilia nílima. Ata oméropa aniyá japi echi Salmo 23 a nokí sinéami machí, echoná ko David aní kiti Jeobá ko japi riká bilé niséami ju we nakíami, japi tibula alí japi kuʼiro kipi bowáwala. Echoná Salmo 65:2 ata newaláriwa kiti Jeobá echi “kipúami ju japalí amachíkiwa”. Ayénachó echi japi we cha nokali a kami nilia nili japalí leeri echi Salmos 39 alí 51. Echoná bela a néwariwéliti David japi né bichíwali a we mi omona nili isisá echi namuti japi ke aʼlá ju, alí ayénachó, a machili kiti Jeobá né bichíwali a wikáwima. Alí echi Salmo 55:22 echoná ko ta tániwa kiti ta a bichíwipa Jeobá alí riwésaré kiti Jeobá nikúuroma japalí ta olasa namuti chati we jilírami japi mi apea riká ta éena.

Jeobá ko néema echi Mesías gobiérnowala kiti pama bilé Wichimóbachi kulíwami. Echi Salmos raʼicha wisabé niraa echi Mesías kitra, echi walúala Silíami japi aniiru japi nawama riweili. Echi Salmo 2 aní kiti jepuná Silíami rachinama pe chuwé pueblo japi ke nijewánali. Echi Salmo 72 ko aní kiti jepuná Silíami suwábama echi lochéwami, alí suwaba namuti chati japi kitra risoa oliwáami ju echi pagótami alí a nirúlima najórowami. Echi Salmo 46:9 aní kiti Onorúami ko néema echi Mesías Gobiérnowala kiti ma ke nirúlima nakówami alí kiti kasinama echi suwaba ranela japi ikí nirú. Ayénachó, echoná Salmo 37 ata leeri kiti echoná kulíwami Wichimóbachi tasi nirúlima pagótami chati alí echi pagótami we aʼláala ko sinibí pirélima alí aʼlá kilii kami nílika riká.

(Jepuná ko uchúi echoná oselichi Salmos.)