BINELÍWAMI 01

¿Chúriká nikuuro japi oserúa uchuwi echoná Bíbliachi?

ANERIA ECHONÁ

Tamujé ko machinali chúsiá ti piré, chúsiá ti risoa nili, suwí alí piri ikimea pe aminana. Ayénachó ti nata echi namuti jitra japi ikí sinibí rawé japi chúriká olabo japi ta newalé jiti kanilia pirélipo. Wiká pagótami ko ma machí japi echi Biblia ruyé japi ta machinali, alí ayénachó nijí jaré busuré chúriká ti we aʼlá pirélipo. ¿Ami mayé japi echi Biblia iʼwírima bilé japi mi machí?

1. ¿Piri namuti we natéami ruyé echi Biblia?

Echi Biblia ko ruyé namuti we natéami japi ta nárika noká, japi riká: ¿kumi jona ta sili?, ¿chúsiá ti piré jenaʼí?, ¿chúsiá risoa nili echi pagótami japi aʼláala ju?, ¿a bijí piréeré echi japi ma suwili?, echi pagótami kilí pirélinali, nalí ¿chúsiá we nirú nakówami?, alí ¿chu ikimea na kawí japoná ta piré? Ata binésaká echi Biblia ati machiboa suwaba jepuná namuti, wiká pagótami japi ma echi riká noká we kanili jiti ma wiká namuti we natéami bineli.

2. ¿Chúriká nikuuro echi Biblia jiti ta kanílika pirélipo sinibí rawé?

Echoná Biblia we aʼlá busuréliami nirú. Aní chúriká echi téemala kanílika pirélima. Echoná Biblia aní piri ta nokiboa japalí risiyá nílisa alí jiti ta kanílika nochabo. Japalí mi aminabi binésimi japi aní echi Biblia, mujé ko a binema jepuná jitra alí auché jaré namuti si. Ayénachó mi natámiré japi echi “Riosi Raʼíchala [echi Biblia] [...] wabé galá ju” (2 Timoteo 3:16).

Na oselí ko ke Biblia ju. Nalí mi iʼwírima jiti mi machimea japi aní echi Biblia. Jiti bela mi leérisaré suwaba echi textos japi uchuwi echoná alí mi inésaré achi aʼlá aniyá japi riká mi biné.

AMINABI NATABO JAPI TA BINÉ

Ma binepo chúriká echi Biblia iʼwírili jaré pagótami alí piri ta nokiboa jiti ta kanila leéripo, ayénachó chúsiá we natéami ju japi bilé tamó iʼwírima jiti ta we aʼlá moʼabo japi aní echoná.

3. Japi aní echi Biblia tamó iʼwiri

Echi Biblia ko ju japi riká bilé luz japi we aʼlá rajé japoná ta simí. ¿Chúsiá? Jiti tamó iʼwiri jiti ta we aʼlá natabo japi ta nokiboa, ayénachó ta machiboa piri ikimea pe aminana.

Leérisi Salmo 119:105 alí raʼichasi jepuná jitra:

Japi osali echi salmo, ¿piri nátili echi Biblia jitra?
Alí mujé ru, ¿piri mi nata echi Biblia jitra?

4. Echi Biblia a ruyé japi ta iyiri machinali

Bilé mukí bineli echoná Biblia japi chabé jonsa machinali. Inesi echi VIDEO alí raʼichasi jepuná jitra:

VIDEO: Ke siné wikawá japi ta buwé (1:48)

¿Piri ka machinali echi mukí japi machiina echoná video?
¿Chu anili ma binesa echi Biblia?

Echi Biblia ko aní japi ta aapo japi ta machinali. Leérisi Mateo 7:7 alí raʼichasi jepuná jitra:

¿Ami ko mayé japi echi Biblia mi iʼwírima machiyá echi namuti japi mi machinali? ¿Chu iyiri ju?

5. Ati we kanílipo leeria echi Biblia

Wiká pagótami ko we kanili leeria echi Biblia jiti wiká namuti biné. Inesi echi VIDEO alí raʼichasi jepuná jitra:

VIDEO: Leeria echi Biblia (2:05)

¿Chúsiá echi kúruwi alí iwé ke kanili leeria?
Nalí, ¿chúsiá a we kanili japalí leeri echi Biblia?

Echi Biblia ko bineri chúriká kanílipo alí ruyé japi ikimea pe aminana. Leérisi Romanos 15:4 alí raʼichasi jepuná jitra:

¿Ami che machinali japi aní echi Biblia chúriká kaníliami nipo alí japi ikimea pe aminana?

6. Jiti ta we aʼlá inámipo echi Biblia ati newalé bilé japi tamó iʼwírima

Jaré ko aweni niraa leeri echi Biblia, nalí be ayénachó aní japi a newalé bilé japi aʼlá machí jiti iʼwírima aʼlá inamia. Leérisi Hechos 8:26-31 alí raʼichasi jepuná jitra: