BINELÍWAMI 02
Echi Biblia ruyé japi ikimea pe aminánami
Omáana Wichimóbachi, nirú wiká pagótami japi we risoa nilia piré alí we omona. ¿Ami echi riká cho nili isini kaachi? Ami risoa níliré nayulí jitra o japalí bilé mukusaa japi mi we nakí, alí ami machináliré achi sinibí echi riká nima. Japi aní echi Biblia tamó kaníliti.
1. ¿Piri aʼlá namuti aní echi Biblia?
Echi Biblia ruyé chúsiá wiká chati namuti nirú omáana Wichimóbachi. Ayénachó aní japi ke sinibí echi riká nima alí japi ma ke itélima. Japi aní echi Biblia tamó iʼwiri jiti ta kanila buwepo japi ikimea pe aminánami (leeri Jeremías 29:11, 12). Ayénachó tamó iʼwiri jiti ta anachabo echi karú ikiwáami japi ta ikí jipi. Alí japi ta bichíwipo japi ne sinibí kanilia pirélipo.
2. ¿Chúriká aní echi Biblia japi nima pe aminánami?
Echi Biblia ko aní japi “echi pagótami ma ketasi suwimea, nibilé auché nalákama” (leeri Apocalipsis 21:4). Echi pagótami ma ke risoa nílima jiti ma ke nirúlima cha nokiwáami, nawilí, mukuwáami alí ma ke risóati nima. Echi Biblia ko aní japi echi pagótami we kanila pirélima japalí we baʼóami nisa jenaʼí Wichimóbachi.
3. ¿Piri mi iʼwírima jiti mi bichíwima japi aní echi Biblia?
Wiká pagótami ko mayé japi we aʼlá pirélima, nalí be ke machí achi ne bichíwali echi riká ikimea, nalí echi Biblia ko ne bichíwali aní. Ata bichíwipo japi aní echoná ati aʼlá néesa “mapurigá osirúami ju Riosi Raʼíchala” (Hechos 17:11). Japalí mi leeri echi Biblia echi riká mi machimea achi bichíwali ju japi ikimea pe aminana.
AMINABI NATABO JAPI TA BINÉ
Inepo jaré namuti japi aní echi Biblia japi ikimea pe aminánami. Alí binepo chúriká iʼwiri jarecho pagótami.
4. Echi Biblia ko aní japi ta sinibí we kanílika pirélipo
Jenaʼí mi inema jaré namuti japi aní echi Biblia. ¿Chu mi iyiri nalí we baʼori? Alí ¿chúsiá?
Leérisi echi textos bíblicos japi jenaʼí rilé oserúa uchuwi alí raʼichasi jepuná jitra:
-
¿Ami mayé japi jepuná textos mi kanílitima? Piri mi aní, ¿achi ayénachó iʼwírimalé mujé téemala alí amigos?
Natá japalí ma echi riká nisa:
|
KE BILÉ... |
SINÉAMI ECHI PAGÓTAMI... |
|---|---|
|
|
|
|
|
|
|
|
|
|
5. Japi aní echi Biblia tamó iʼwiri jiti ta aʼlá pirélipo
Wiká pagótami ke kanili alí jarecho we iyoa nili jiti nirú wiká karú ikiwáami. Jaré ko iʼwérili noká jiti ke nirúlima chati namuti. Iné japi aní echi Biblia iʼwiri wiká pagótami jiti aʼlá pirélima. Inesi echi VIDEO alí raʼichasi jepuná jitra:
-
Japi riká machiina echi video, ¿piri namuti ke galé echi Rafika?
-
Tákoré echi namuti japi ke galé Rafika a bijí niruili, ¿chúriká iʼwírili japi aní echi Biblia?
Japi aní echi Biblia tamó iʼwiri jiti ku kanílipo alí jiti ta anachabo japalí ti karú ikisaa. Leérisi Proverbios 17:22 alí Romanos 12:12, alí raʼichasi jepuná jitra:
-
¿Ami mayé japi aní echi Biblia mi iʼwírima jiti mi kanila bitélima? ¿Chúsiá?
JAPI ANÍ JARÉ PAGÓTAMI: “Japi aní echi Biblia we baʼóami ju nalí ke ni mayé japi bichíwali ju”.
-
A bichíwali nísakó japi aní echi Biblia, ¿a natéami keʼré binelia? ¿Chúsiá?
JAPI MI BINELI
Echi Biblia ko aní japi ta we kanílika pirélipo, machiyá echi namuti tamó kaníliti alí ayénachó jiti ta anachabo japalí karú ikisaa.
Piri mi animea
-
¿Chúsiá echi pagótami machisáré japi ikimea pe aminana?
-
¿Piri aní echi Biblia japi ikimea pe aminana?
-
Machiyá japi ikimea pe aminana, ¿chúriká mi iʼwiri jipi?
JITI MI CHE BINEMA
Biné chúriká mi iʼwiri buwea japi ikimea pe aminana.
“¿Kumi ta machiboa japi ikimea pe aminana?” (¡Busuréwiami!, 22 inárachi abril 2004)
Ami machimea chúriká jaré pagótami japi we nayúa piré, ku kanila machiyá japi ikimea pe aminana.
“¿A tamó iʼwiri japi aní echi Biblia jiti ta anachaba echi nayulí?” (Oselí japi nirú echoná jw.org)
Ineka jepuná video, natá japi mi téemala yúa bité echoná Wichimóbachi baʼóachi, japi riká aní echi Biblia.
Leeri chúriká iʼwírili japi aní echi Biblia bilé rijoi japi iʼwérili isili jiti ke nirúlima chati namuti.
“Jipi ko ni a machí chúriká iʼwírima jarecho” (Echi Nawésami, 1 inárachi julio 2013)
