Japalí ma nawama réachi echi taa muchi japi bacháwala ju echi iyela alí onolá we kanili, ayénachó a nátaka noká japi chúriká nokimea jipi ko, kiti ma nawámiré echi muchi. Kiti jipi ko we aʼlá tibúsaré echi muchi alí we risimea tibúa. Ma ke tasi japi riká chabé nili nima, kiti jipi ko ma kúchuwi alí we risimea, kiti bela isini kaachi ami naʼawia nílima okuaka. Jipi ko tasi ikírima japi riká chabé nokali ke cho kúchuwa, kiti jipi ko okuaka tibuma rikampa echi muchi, ayénachó emi okuaka tibuka cho nokisí. Echi Biblia ko we aʼlá busuré mi iyá japi chúriká mi isima.

JAPI ANÍ ECHI BIBLIA: “Echi mapuyíripi wabé galeko auché jaré, échiko kilí ologá iyénami ju [...] Échiko ketasi mayé mapu binói ne bachá walubela ju. Ayénachó echi mapu wabé galéami ju ketasi yóami ju” (1 Corintios 13:4, 5). Japalí echi iyela né kulí né bacháwala ranéa, mujé kunala a ma waná ka nílimalé kiti mujé echi muchi bi karúampa. Kiti ke waná kanílima mujé kunala ayénachó mi néwariwélitisaré japi mi we nakí. We aʼláala nili mujé kunala yúa kilipi niraa binoy a machiméalé ko japi mi newalé kiti mi iwírima tibúa echi muchi.

“ʼYemi rijói kunátami ne wabé galigá nisérasi ʼyemi jubila.” (1 Pegro 3:7.) Mujé rejoy ma mi kúchiwaká japi bacháwala ju, jipi ko machimea japi mujé upila we tibuma echi taa muchi, kiti jipi ko echi mukí we iyoanílimalé kiti risiampa nocha, pe omona ma riwélimalé. Mi ma yúa iyómiré isini, mujé ko kiti iyó, “japi ke sapú iyó ko né walúala ju echi bilé rejoy we jiwérami ju” (Proverbios 16:32). To nátika isibo chu me jilí a karúa echi muchi alí iwiri (Proverbios 14:29).

JAPI MI ISIMA:

• Rejoy, ami kúchuwami nísaká: Iwiri mujé upila tibúa echi taa muchi, rokó si. Rejoy iwerika isí kiti napawika mochibo sinéami ka mujé ranala yúa alí mujé upila si

• Mukí, ami kúchuwami nísaká: Japalí mujé kunala mi iwírinalasa tibúa echi taa muchi, riwé japi mi iwírima tibúa. Ke me machiyá isisa tibúa echi muchi, kiti jéané japi ke machí tibúa, nalí ruyé chúriká we aʼlá tibuma

JAPI ANÍ ECHI BIBLIA: “Echalí jonsa okuánika né bilepi sapá chopi nima” (Genesis 2:24). Chíkoré jipi ko ma kúchuwi, machisí japi ta mi okuaka “bilepi sapá” ju. We iwérili nokisí we kanílika pirea okuaka.

Mukí, matétara iyá mujé kunala kiti mi iwíriampa, kiti ayénachó we aʼlá nikúurampa. Ami we simárika anésaká matétara iyá we kanílimalé (Proverbios 12:18). Rejoy, jéané japi mi we nakí mujé upila, ayénachó jéané japi mi we natéami niraa alí japi simárika nóchami ju (Proverbios 31:10, 28).

“Galá níima mapu ibili ʼyemi chopi ʼwérali olasa mapurigá echi auché jaré pagótami bachá niráa kuʼwíratami níima. Ketasi bachá niráa echirigá olasi mapurigá ʼyemi aboni chopi kuʼwíratami níibotamo.” (1 Corintios 10:24.) Rejoy sinibí we aʼláala nili mujé upila yúa, mujé mukí echi riká cho nili mujé kunala yúa. Okuaka raʼichasi alí aʼlá kipusi. Echi nasawíliami kitra, kiti pe mujé bineli bi natá. Ayénachó natá japi nakí mujé upila, mujé kunala ma. Echi Biblia ko aní: “Galá níima ibili rijói jubéami pirélasa aboni jubila yuwa mapurigá niwíami niráa, ayénachó galá níima ibili muguí kunéami pirélasa aboni kunala yuwa mapurigá niwíami niráa” (1 Corintios 7:3, 4). Kiti bela raʼichasi echi kitra ke riwélika. Okuaka aʼlá machiká nokimea alí kilipi niraa we kaníliami nima okuaka.

JAPI MI ISIMA:

• Natá japi ayénachó aʼlá ju japi ta mi okuaka awénili mochibo

• Néwariwélitisi japi ta mi we nakiká noká, chiliwema bilé namuti, okuaka napaka ma

JAPI ANÍ ECHI BIBLIA: “Mapurigami táaka jonsa galá machili echi We Galabé Riosi Raʼíchala osirúami, echi mapu ne wabé omérami ju galá machíriya echi jaré pagótami” (2 Timoteo 3:15). Bachá natá chúriká mi isima bineria mujé ranala. Japalí ropea iyena echi iyela echi taa muchi, echi wénwala ko ma omeri bineria echi muchi. Japalí echi wénwala raʼíchisa echi muchi a bijí ropálachi atíachi, echi ta muchi ko machí japi echi wénwala ju, ayénachó echi muchi néwanili japalí mujé kaníliachi, japalí mi iyóachi, alí japalí mi omona. Ma nawálachi echi muchi leérili bilé oselí chíkoré ke aʼlá moʼayé japi aní echi oselí, kiti ma waʼlú ka kanílima leeria.

Kiti jéaní japi echi muchi kecho omérima binea Onorúami kitra. Jeobá yúa raʼicha japalí mi mutuka atí mujé ranala (Deuteronomio 11:19). Japalí mi yúa riʼé, ruyé japi ikí namuti niwali Jeobá (Salmo 78:3, 4). Ma ochériachi mujé ranala echi ko machimea japi mi we nakí Jeobá alí echi taa binói ayénachó nakísima.

JAPI ISIMA:

• Onorúami yúa raʼichá kiti mi iwírima chúriká mi binérima mujé ranala

• Ami nakiyáaká japi taa ka jona binema, wisabé niraa ruyé japi mi binérnali