BINELÍWAMI 5
¿Chúriká nakí Onorúami japi pirélima echi pagótami jenaʼí Wichimóbachi?
1. ¿Chúsiá niwali Onorúami echi Wichimóbachi?
Jeobá ko niwali echi Wichimóbachi kiti echi pagótami pirélima echoná. Kiti bela japalí niwali Adán alí Eva, echi ko ke pireili ripá rewegachi, Onorúami ko ma niwali echi ángeles kiti pirélima echoná (Job 38:4, 7). Nalí be Onorúami ko niwíwili Adán alí Eva biléana Wichimóbachi baʼóami, Edén rewéami (Génesis 2:15-17). Jeobá ko nakiyé japi echi, alí echi kúchuwala, sinibí kanílika pirélima jenaʼí Wichimóbachi. Leeri Salmo 37:29 alí 115:16.
Né chokichí ko, echi Edén pe uchíi bi we baʼóami nili. Adán alí Eva wiká kúchitima riweili kiti omáana Wichimóbachi pirélima. Kilipi kilipi niraa wiká muwésima riweili alí omáana Wichimóbachi we baʼóami ayénisima riweili (Génesis 1:28). Echi Wichimoba ke sineti najunárami nima, sinibí tamujé kalila nima. Leeri Salmo 104:5.
Iné echi video ¿Chúsiá niwali Onorúami echi Wichimóbachi?
2. ¿Chúsiá jipi echi Wichimóbachi ke baʼóami ju?
Adán alí Eva ke nijéwili Onorúami, alí Jeobá ko machí awali echoná Wichimóbachi baʼóachi jonsa. Kiti bela wikáwili echi Weʼé baʼóami, ni bilé pagótami omero niwayá bilé Weʼé japi riká echi. Echi Biblia ko aní japi echi Wichimóbachi iyárami nili echi pagótami japi chati noká (Job 9:24). Leeri Génesis 3:23, 24.
¿A wikáwiliré Jeobá japi iyama bilé Wichimóbachi we baʼóami echi pagótami? ¡Ke bela ba! Echi ko suwaba omérami ju. Echi ko sinibí isimí japi binói aní (Isaías 45:18). Checho a ku pirélima echi pagótami japi riká pireili Adán alí Eva japalí kecho nokayé chati namuti. Leeri Salmo 37:11, 34.
3. ¿Chu kabú che ku we baʼóami ayenama echi Wichimóbachi?
Japalí Jesús nulasa japi riká Silíami jenaʼí Wichimóbachi checho a ku we baʼóami nima. Echoná Armagedón, Jesús alí echi ángeles japi aʼláala ju oʼyama sinéami echi Onorúami sayérala. Alí biché Jesús ko irema Satanás bilé mili bamíali, jepuná ángel ko ju japi isiili japi Adán alí Eva ke nijéwima. Echi Onorúami amígowala ke suwimea kiti tibútami nima alí niyúbitami nima Jesús kitra. Kanílika pirélima sinibí jenaʼí Wichimóbachi. Leeri Apocalipsis 20:1-3 alí 21:3, 4.
4. ¿Chu kabú suwibama echi risoa níliwami?
¿Chu kabú suwábima Onorúami echi namuti chati? Jesús ko nijili echi bawelá japi néwariwélitima riweili japi ma mulipi suwibama echi chati namuti. Echi namuti chati japi jipi ikísimi alí japi ta risoa oláliwa, néwariwéliti japi “ke ʼme ayó níima echalí ne jubá suwibálawachi rawé”. Leeri Mateo 24:3, 7-14, 21, 22.
Jesús nulama jenaʼí Wichimóbachi bilé mili bamíali ripá rewegachi jonsa alí suwábima suwaba echi risoa níliwami (Isaías 9:6, 7; 11:9). Echi ko Silíami nima alí walúala sacerdote alí iyema echi chati nachúkami japi olá echi pagótami japi a nakí Onorúami. Néeka Jesús, Onorúami ko suwábima echi risoa níliwami alí echi mukuwáami alí ma ke che wesi ochérami nílisima. Leeri Isaías 25:8 alí 33:24.
5. ¿Jépuká pirélima echoná Wichimóbachi we baʼóachi?
Japoná biné echi Testigo Jeobá, ami machimea echi pagótami japi a nakí Onorúami alí japi binénali chúriká kanílitima
Echi pagótami japi a nijéwami ju Onorúami pirélima echoná Wichimóbachi we baʼóachi (1 Juan 2:17). Jesús nuleli echi najátowala kiti áama echi pagótami japi a nijéwinali Onorúami alí kiti binérima japi nokisáré kiti kanílitima echi. Jipi ko Jeobá bineri milloni pagótami kiti pirélima echoná Wichimóbachi we baʼóachi (Sofonías 2:3). Japoná biné echi Testigo Jeobá echi pagótami biné chúriká we aʼláala kunala nima, upila ma, alí aʼláala wénwala. Wénwala alí kúchuwala napawika amachiki Onorúami alí biné chúriká kuʼíriwa echi raʼíchali kalabé kitra japi nirú echoná Bíbliachi. Leeri Miqueas 4:1-4.
