Japalí kecho nawayá jenaʼí Wichimóbachi, Jesús ko biteili ripá rewegachi japi riká bilé ángel. Kiti bela ke japi iyiri tamujé nili (Juan 8:23). Echi ko né bachá niwárami nili Onorúami kitra alí echi ko kuʼírili Onorúami niwayá suwaba namuti japi ikí nirú. Onorúami bineli isiili niwayá Jesús, kiti bela rewaliwa “biʼnélipi Binói Ranala” (Juan 1:14). Onorúami néeli Jesús japi riká bilé nawésami, kiti bela rewaliwa echi “Raʼíchala”. Leeri Proverbios 8:22, 23, 30 alí Colosenses 1:16.

Onorúami ko júali kipi Nolá jenaʼí Wichimóbachi, echi ko achábali echi Jesús bitéala echoná bilé mukí judía ropálachi, María rewéami. Kiti bela Jesús ko ke olali bilé onolá jenaʼí Wichimóbachi bitéami (Lucas 1:30-35). Jesús nawali jenaʼí Wichimóbachi, 1) kiti binérima echi bichíwali Onorúami kitra, 2) kiti binérima japi chúriká ta nijéwisaré Onorúami chíkotaré wiká namuti chati ikiyé, alí 3) kiti nijima echi binói bitéala kiti ta niyúbitami niba echi mukuwáami kitra alí echi chati namuti. Leeri Mateo 20:28.

Echi natétiwami ju japi nijí kiti niyúbima bilé pagótami echi mukuwáami kitra (Éxodo 21:29, 30). Onorúami ko ke sineti nakili japi echi pagótami ochérami nílisima alí kecho japi suwimea. ¿Chúriká ta machí jepuná? Onorúami ko aneli Adán, echi bacháwala rejoy, japi ke nijéwisaká, mukumea riweili. A nijéwami nísaká Adán, ke siné mukumea riweili (Génesis 2:16, 17; 5:5). Kiti bela, echoná Romanos 6:23, jeaní: “Echi chati nokaami mukuka ku nateti, japi Jeobá nijí ko sinibí bitéliwami ju japi isili Jesús kitra” (TNM). Adán ko nachútili echi mukuwáami alí echi chati sinéami echi kúchuwala, alí echi Biblia ko aní japi  ta suwí kiti ta Adán kúchuwala kampa. Kiti bela ata newalé echi natétiwami. Leeri Romanos 5:12.

¿Jépuká oméroli nijía echi natétiwami kiti ta niyúbitami niba echi mukuwáami kitra? Japalí ta suwí, nateti echi chati kitra japi tamujé abói nokali. Kiti ta sinéami ka chati nachúkami ju, kiti bela tasi ta omero niyubia jarecho echi chati kitra. Leeri Salmo 49:7-9.

Jesús tasi olali namuti chati ripokálachi japi riká tamujé. Echi ko ke mukusaa riweili kiti ke siné chati namuti isíiami nili. We be nalí echi ko nijili binói bitéala kiti niyúbitami nima jarecho. Japalí Onorúami ko júali echi Nolá kiti mukumea, echi ko néwariwéliti japi we nakí echi pagótami. Jesús ayénachó néwariwéliti japi we nakíami ju echi pagótami kiti nijéwili binói Onolá alí kiti nijili binói bitéala kiti ta niyúbitami niba echi mukuwáami kitra. Leeri Juan 3:16 alí Romanos 5:18, 19.

Iné echi video ¿Chúsiá mukuli Jesús?

Japalí biteili jenaʼí Wichimóbachi, Jesús ko saʼweli echi nayúami, ku jawásili echi suwíkami alí kuʼírili japi risoa nili. Echi riká isiika néwariwélitili japi isiima pe aminana mi echi pagótami nijéwami kitra (Mateo 15:30, 31; Juan 5:28). Ma mukúlachi, Onorúami ku wilásili japi riká ángel (1 Pedro 3:18). Alí asíbali Onorúami yúa botonachi buweka kiti echi wilama japi riká Silíami omáana Wichimóbachi (Hebreos 10:12, 13). Jipi ko Jesús nulá ripá rewegachi jonsa alí echi najátowala nawisásimi jepuná raʼíchali kalabé omáana Wichimóbachi piréami. Leeri Daniel 7:13, 14 alí Mateo 24:14.

Ma kéayó, Jesús ko suwábima echi risoa níliwami alí echi pagótami japi risoa olá jarecho. Sinéami japi a bichiwi ko Jesús alí nijewi, we kanílika pirélima echoná Wichimóbachi we baʼóachi. Leeri Salmo 37:9-11.