BINELÍWAMI 2
¿Jépuká ju Onorúami?
1. ¿Chúsiá ta nóchisaré Onorúami?
Echi Onorúami né bichíwali ju japi niwali suwaba namuti. Tasi wesi niwali Onorúami alí ke siné mukumea (Salmo 90:2). Onorúami jona machiina echi raʼíchali kalabé japi echoná Bíbliachi nirú (1 Timoteo 1:11). Ata nóchisaré pe echi Onorúami bi kiti ta niwárami nili echi kitra. Leeri Apocalipsis 4:11.
2. ¿Chu iyiri ju Onorúami?
Ni bilé pagótami ritiwá Onorúami kiti echi ko bilé espíritu ju, jepuná ko aniwáami ju japi wabé natéami ju alí tamujé ko ke me, kiti ta sapá ju alí ochéami (Juan 1:18; 4:24). We be nalí, ata omero machiyá chu iyiri ju Onorúami ineka echi namuti japi echi niwali. Echi wikanamti rakéami alí echi wikanamti siwáami ata machíriwa japi we nakíami ju alí aʼlá nátami. Echi universo kitra ta binériwa echi jiwérala. Leeri Romanos 1:20.
Leérika echi Biblia ata wabé machiboa japi chu iyiri ju Onorúami. Echoná aní piri ju japi a kalé Onorúami alí piri ke kalé, chu me nakíami ju echi pagótami alí chu iniili japalí cha nokisaa, aʼlá nokisaa ma. Leeri Salmo 103:7-10.
3. ¿A riwéwiré Onorúami?
Jesús ko anili: “Tamujé Onolá mápumi echoʼná ripá riwigachi atí, waminabi ne wabé galabé anérami nílaga Mujé riwalá” (Lucas 11:2). Onorúami ko wikaná niraa rewalíwami ju, we be nalí, pe bilepi bi olá rewalá. Omáana Wichimóbachi wikanamti niraa kipúliwa echi rewalá. Tarahumara niraa aniwá Jeobá. Leeri Salmo 83:18 (82:19 jarecho Bíbliachi).
Wiká Bíbliachi ma ke aní echi Onorúami rewalá, we nalí oserúa uchuwi Walubéala, Riosi ma. We nalí, japalí osairu echi Biblia echi Onorúami rewalá ko kichao mili aminá simírikami oserúami nili. Jesús ko binérili echi Onorúami rewalá japalí yúa raʼíchali echi pagótami echi kitra. Leeri Juan 17:26, TNM.
Iné echi video ¿Chu riwewi Onorúami?
4. ¿Ata we natéami keʼré Onorúami kitra?
Onorúami sinibí nikúuroma, japi riká jepuná onolá we nakíami
Jipi echi pagótami we risoa nili. ¿A aniwáami keʼré japi ta ke natéami ju echi kitra? Japalí echi pagótami risoa nili jaré ko mayé japi Onorúami iyiri ju, we nalí jepuná ko ke bichíwali ju. Leeri Santiago 1:13.
Onorúami ko risensia nijí kiti ta nokiboa japi ta nokinali. Jepuná ta binériwa japi ta we nakirúami ju tamujé ibili niraa. ¿Kecha aʼlá ju japi ta ibili niraa tamujé aniboa acha ta nijéwipa Onorúami ke ma? (Josué 24:15.) We nalí wiká chati nokáami ju, kiti bela nirú risoa níliwami alí echi pagótami risoa nili, Jeobá ko áʼmoni inea jepuná namuti chati. Leeri Génesis 6:5, 6.
Jeobá kitra ta we natéami ju. Echi ko nakí kiti ta kanílika pirélipa. Ma kéayó suwábima echi risoa níliwami. Alí chíkoré echi riwee japi jipi nirúlima echi risoa níliwami, a ikimea pe teili bi rawé. Echoná binelíwami 8, binébaré chúsiá riwé japi echi riká ikísima. Leeri 2 Pedro 2:9 alí 3:7, 13.
5. ¿Chúriká ta oméropa muliwia Onorúami?
Jeobá ko bayé kiti ta mulíwipa echi amachíkika. Echi ko we natéami niraa iné tamujé ibili niraa (Salmo 65:2; 145:18). Echi ko nakí kiti ta sinibí wikáwitami niba japalí ta cha nokisaa. Isini kaachi ke ta omero suwaba aʼlá nokayá, we be nalí a machí japi ta a nijéwinali. Kiti bela ata oméropa muliwia Onorúami. Leeri Salmo 103:12-14 alí Santiago 4:8.
Kiti ta niwárami nili Jeobá kitra, ata wabé nalí nakisáré echi alí echi pagótami ko ke me (Marcos 12:30). Ata néwariwélitisaká japi ta nakí Onorúami bineka echi kitra alí nokaká japi echi nulá, we ta mulíwipa echi. Leeri 1 Timoteo 2:4 alí 1 Juan 5:3.
