BINELÍWAMI 10
¿Chúriká machiboa japi chu iyiri ju echi bichíwiliami né bichíwali?
1. ¿A bilepi bi nirúiré bichíwiliami né bichíwali?
“Galá tibusi [...] echi jaré ʼyékaka nawésami” kitra (MATEO 7:15)
Jesús alí echi najátowala a olayé echi bichíwiliami né bichíwali, echi ko anili kiti jepuná japi riká bilé buwé uchíi nili japi too sinibí bitéliwami alí okuáabi simiba echoná (Mateo 7:14). Onorúami ko kalé pe echi bichíwiliami bi japi bineri echi bichíwali japi oserúa uchúi echoná Bíbliachi, echi binói Raʼicháala. Alí sinéami echi napawika nóchika noká né bichíwali niraa. Leeri Juan 4:23, 24; 14:6, alí Efesios 4:4, 5.
Iné echi video ¿A galé Onorúami suwaba religiones?
2. ¿Piri anili Jesús japi nokimea riweili echi najátami ke bichíwali?
“Aní mapu aboni galá bichíi Riosi, chopi aboni wabé ʼyékaka echirigá aní.” (TITO 1:16)
Jesús anili japi nirúlima riweili najátami ke bichíwali japi chijúntima echi binériala. Jepuná pagótami alí echi bichíwiliami japi Jesús najátami ko ruyá aní alí japi aní japi bichíwali bineri, eki echi pagótami. We nalí, tamujé a omero machiyá chu iyiri ju echi bichíwiliami né bichíwali, kiti echoná ko napawí echi Jesús najátami né bichíwali japi né echi riká noká japi echi nuleli. Leeri Mateo 7:15-20, 22, 23.
3. ¿Chúriká mi oméroma machiyá jépuká ju echi né bichíwali Jesús najátami?
Inepa malí namuti japi ta binériwa jépuká ju:
-
Bichiwi japi echi Biblia Onorúami Raʼicháala ju. Echi ko jiwérika noká nijewia echi Onorúami nuláala alí ke japi bineri echi pagótami (Mateo 15:7-9). Ayénachó, japi riká bineri né echi riká noká. Leeri Juan 17:17 alí 2 Timoteo 3:16, 17.
-
Bineri alí riwiwi echi Onorúami rewalá, Jeobá. Jesús ko echi riká isiili kiti binérili echi Onolá rewalá. Raʼíchili echi pagótami echi kitra alí binérili kiti raʼíchika tama japi walubéala anérami nima echi rewalá (Lucas 11:2). ¿Chu iyiri ju echi bichíwiliami japi bineri echi Onorúami rewalá mujé bitélachi ayé? Leeri Juan 17:26, TNM alí Romanos 10:13, 14, TNM.
-
Raʼicha echi Onorúami Gobiérnowala. Jesús ko julárami nili jenaʼí Wichimóbachi kiti ruyema echi pagótami echi kalabé raʼíchali Onorúami Gobiérnowala kitra, alí japi echi bi ju japi oméroma kuʼiria echi pagótami. Echi riká isiili japi yena mukuli (Lucas 4:43; 8:1; 23:42). Ayénachó anili japi echi najátowala nawisama riweili echi gobiérnowala. Bilé nawasa japoná mujé bité alí mi raʼíchisa echi Onorúami Gobiérnowala kitra, ¿chu iyiri ju alé echi bichíwiliami? Leeri Mateo 24:14.
-
Tasi noká japi riká nokáami ju echi pagótami japi ke nijewi Onorúami. Echi Jesús najátami tasi noká suwaba japi política aneliwa, kecho naʼáwaka noká kariwea echi cha ikiwáami (Juan 17:16; 18:36). Ke noká echi namuti chati japi noká echi pagótami, kecho nata japi riká echi. Leeri Santiago 4:4.
-
Machirúami ju kiti anakupi niraa nakiká noká. Echi Onorúami Raʼicháala kitra binéritami ju alí biné riwiwia echi pagótami, chíkoré suwinárika raʼichi, biléanachó mi país piréami ma. Echi bichíwiliami ke bichíwali bayé alí kuʼiro echi pagótami kiti nakoma jaréanacho piréami yúa, we be nalí echi Jesús najátami né bichíwali ke echi riká noká (Miqueas 4:1-3). Na jónalí nee echi rawé alí echi namuti japi olá kiti kuʼírima alí bineri echi pagótami. Leeri Juan 13:34, 35 alí 1 Juan 4:20.
4. ¿Ma mi machí chu iyiri ju echi bichíwiliami né bichíwali?
¿Chu iyiri bichíwiliami bineri né japi riká aní echi Biblia, riwiwi echi Onorúami rewalá alí ruyé kiti echi Onorúami Gobiérnowala bi ju japi oméroma kuʼiria echi pagótami? ¿Chu iyiri ju echi bichíwiliami japoná echi pagótami né bichíwali nakiká noká anakupi niraa alí ke nakowa jaréanacho piréami yúa? ¿Piri mi nata mujé? Leeri 1 Juan 3:10-12.
