BINELÍWAMI 7
¿Piri ju echi Onorúami Gobiérnowala?
1. ¿Piri ju echi Onorúami Gobiérnowala?
¿Chúsiá Jesús we aʼlá silíami ju? (MARCOS 1:40-42)
Bilé gobierno ripá rewegachi nirúami ju japi suwábima echi isélikami jenaʼí Wichimóbachi piréami alí isiima japi binói nakí, ripá rewegachi, alí jenaʼí Wichimóbachi. Jepuná ju raʼíchali kalabé. Echi Onorúami Gobiérnowala iyama echi namuti japi echi pagótami newalé alí sinéami kilii napawika pirélima. Leeri Daniel 2:44; Mateo 6:9, 10, alí 24:14.
Suwaba echi gobierno newalé bilé silíami, kiti bela Jeobá wilali echi binói Nolá, Jesucristo, japi riká echi Silíami japi nulama echi Gobiérnowalachi. Leeri Apocalipsis 11:15.
Iné echi video ¿Piri ju echi Onorúami Gobiérnowala?
2. ¿Chúsiá Jesús we aʼlá silíami ju?
Echi Onorúami Nolá we aʼlá silíami ju kiti sinibí najóraka isimí (Mateo 11:28-30). Echi jiwérala kitra a oméroma kuʼiria echi pagótami alí echi riká isíimalé japalí chotasia nulayá jenaʼí Wichimóbachi ripá rewegachi jonsa. Japalí wilásitami nili, Jesús ku roʼili ripá rewegachi, alí asíbali Onorúami yúa botonachi buweka kiti Onorúami wilama japi riká Silíami (Hebreos 10:12, 13). Onorúami ma wilali Jesús japi riká Silíami. Leeri Daniel 7:13, 14.
3. ¿A nirúiré jarecho pagótami japi Jesús yúa nulama?
Echi Biblia aní japi Jesús yúa nulama jaré pagótami japi a nijéwami ju Onorúami. Echoná Daniel 7:27 rewaliwa “biʼwíami pagótami”. Echi julárami japi Jesús yúa járili, echi ko nili echi bacháwala japi Onorúami chapili kiti biʼwíami pagótami nima. Echalí jonsa Jeobá ko isísimi napabúa echi wiká rejoy alí wiká mukí japi bichíwiami ju kiti biʼwíami pagótami nima. Japi riká Jesús, japalí suwisaa jepuná pagótami ripá rewegachi simía alí ángeles najiti. Leeri Juan 14:1-3 alí 1 Corintios 15:42-44.
¿Chu ikipi pagótami simama ripá rewegachi? Echi Biblia aní japi pe okuáabi ju, Jesús ko rewá “pée okuáa” buwá (Lucas 12:32). Echi japi nulama Jesús yúa echi ko ju 144,000 pagótami. Leeri Apocalipsis 14:1.
4. ¿Piri ikili japalí Jesús wilárami nili?
Jesús ko wilárami nili echi bamíali 1914. Jesús ko né bachá machí awali jenaʼí riléi Wichimóbachi Satanás alí echi ángelwala chati. * We iyoka, Satanás ko isiili kiti wiká namuti chati nirúlima omáana Wichimóbachi (Apocalipsis 12:7-10, 12). Echalí jonsa wiká nirúlisimi echi namuti chati jenaʼí Wichimóbachi. Echi weli nakówami, japalí noká echi kawí, echi nawilí, alí echi lochéwami néwariwéliti japi ma mulipi nulama echi Onorúami Gobiérnowala omáana Wichimóbachi. Leeri Lucas 21:7, 10, 11, 31.
5. ¿Piri isimí jipi echi Onorúami Gobiérnowala alí piri isiima pe aminana mi?
Jipi ko omáana Wichimóbachi nawisáliwa, echi Onorúami Gobiérnowala ko napabú né wabé wikabé pagótami omáana piréami. Milloni pagótami nijéwami ma nulérami ju Jesús kitra. Sinéami jepuná niyúbitami nima japalí echi Onorúami Gobiérnowala suwábima echi pagótami chati. Kiti bela, ata narénalaká echi namuti kalabé japi nijima echi Gobierno, ata nijéwisaré Jesús. Leeri Apocalipsis 7:9, 14, 16, 17.
Japalí Jesús nuláachi bilé mili bamíali, echi gobierno isiima japi Onorúami nakiyé né chokichí jonsa tamujé kitra. Echi Wichimóbachi we baʼóami nima. Né jubá Jesús ko iyama echi Gobierno binói Onolá (1 Corintios 15:24-26). ¿Ami kanílisa nili raʼicha jaré yúa jepuná Gobierno kitra? Leeri Salmo 37:10, 11, 29.
^ parr. 6 Ami che machináliaká japi aní echi profecía bíblica echi bamíali 1914 kitra, iné echi nota 22 japi chukú echoná páginas 217-220 echi oselí ¿Qué nos enseña la Biblia?
