BINELÍWAMI 14
¿Chúsiá jipi Onorúami chapili bilé pueblo?
1. ¿Chúsiá Onorúami chapili echi israelitas kiti echi puéblowala nima?
Onorúami ko bilé pueblo niwali echi Abrahán kúchuwala yúa, alí iyali jaré nulalíwami. Jepuná pueblo ko Israel rewairu, alí Jeobá bi nóchilisa riké alí nijéwisa riké echi nuláala (Salmo 147:19, 20). Kiti bela, sinéami pagótami omáana piréami narema riké wiká namuti kalabé. Leeri Génesis 22:18.
Onorúami ko chapili echi israelitas kiti echi testígowala nima. Japi nokali ata binériwa japi ta aʼla pirélipa ata nijéwisaká echi Onorúami nuláala (Deuteronomio 4:6). Kiti bela, néeka echi israelitas, jarecho pagótami machimea riweili echi Onorúami né bichíwali. Leeri Isaías 43:10, 12.
2. ¿Chúsiá Onorúami jipi nakí japi echi puéblowala napawika nóchilima echi?
Echi Israel puéblowala iyórtili Jeobá alí echi ko ma ke nakili, nalí chapili echi Jesús najátami (Mateo 21:43; 23:37, 38). Kiti bela, jipi ko echi Jesús najátami né bichíwali Jeobá nóchiliami ju alí echi testígowala ju, alí echi israelitas ko ma ke. Leeri Hechos 15:14, 17.
Jesús binérili echi najátowala japi napawika nochama ruyea echi Onorúami Gobiérnowala omáana piréami (Mateo 10:7, 11; 24:14; 28:19, 20). Jipi, japi kuwachimi rawé ta piré, omáana piréami ma nawisásimi. Jeobá napabúsimi milloni pagótami omáana piréami kiti napawima echi bichíwiliami né bichíwali yúa (Apocalipsis 7:9, 10). Echi Jesús najátami né bichíwali napawika nocha alí nakúrika noká anakupi niraa. Ayénachó, sinéami omáana piréami, japoná napawí chopi riká binéritami ju japi riká aní echi Biblia. Leeri Hebreos 10:24, 25.
3. ¿Chúriká chotásili echi testigo Jeobá?
Echi ko chotásili ma simirsa echi bamíali 1870, alí pe okuáabi nili. Jaré echi Biblia binéami riwali echi né bichíwali echi Biblia kitra japi wiká pagótami ke machiyé. A machili japi Jesús binérili echi najátowala japi napawika nochama ruyea echi Onorúami Gobiérnowala, kiti bela echi ko chotásili ruyea echi Onorúami Gobiérnowala omáana piréami. Echi bamíali 1931 jonsa echi abói nakili japi testigo Jeobá riwéwima. Leeri Hechos 1:8; 2:1, 4, 11, alí 5:42.
4. ¿Chúriká nóchaka noká echi testigo Jeobá?
Chabéi, echi bachá siglo, echi Jesús najátami wikaná piréami, japi napawili, wiká namuti kalabé nareli kiti nulérami nili jaré rarámuli machíami kitra, alí echi ko machili japi Jesús nulé echi congregación (Hechos 16:4, 5). Jipi ayénachó echi testigo Jeobá nulérami ju jaré rarámuli kitra aʼlá machíami japi rewaliwa Japi Aʼlá Niseri, jepuná rejimá ko aʼlá machíami ju alí aʼlá iné chúriká nóchaka noká echi sucursales omáana nirúami. Echoná niwaliwa oselí alí wikaná niraa raʼicháliami osiwá, simírikami 600 raʼicháliami alí julawa omáana kawichí. Néeka echi Biblia, echi Japi Aʼlá Niseri kaníliti alí bineri né nokí 100 mil congregaciones, echoná ayénachó nirú rejoy aʼlá machíami japi jawárami ju alí japi né aʼlá nakiká tibú echi Onorúami buwáwala. Leeri 1 Pedro 5:2, 3.
Echi testigo Jeobá ko napawika nocha alí binéritami ju kiti raʼichama echi raʼíchali kalabé japi echoná Bíbliachi oserúa uchúi alí kiti echi pagótami Jesús najátami najítima. Japi riká nokali echi julárami, raʼicha echi kalabé raʼíchali suníami bitichí ayé (Hechos 20:20). Ayénachó bineri echi Biblia kitra echi japi binénali ko echi bichíwali. Sinéami echi, napawika nocha alí japi riká téemala ju japi nakiká noká anakupi niraa alí tibútami ju echi binói Onolá kitra (2 Tesalonicenses 1:3). Tasi wesi kaníliami ju japi riká echi kiti japi riká téemala ju japi né jiwérika noká kanílitia Onorúami alí kuʼiria echi pagótami. Leeri Salmo 33:12 alí Hechos 20:35.
