¿Ami sinibí nijewi mujé iyela, mujé onolá ma?... Isini kaachi tasi mi nijéwinali, ¿kechi ko ni? We be nalí, ¿ami machiyé japi Jesús né sinibí aʼlá nijéwili Jeobá alí echi wénwala?... Japi Jesús isili mi bineri kiti mi né sinibí aʼlá nijéwami nima. Che binepa Jesús kitra.

Kecho nawayá bitélisia jenaʼí Wichimóbachi, Jesús ko biteili binói Onolá Jeobá yúa ripá rewegachi. Jenaʼí Wichimóbachi nawasa ayénachó olali wénwala; José riwéami, iyela ko María. ¿Ami kanílisa nili machiyá japi chúriká José alí María Jesús wénwala nila?...

Jeobá ko we jiwérami ju, kiti isili japi Jesús, María ropálachi achama kiti ochérima japi riká ocheri bilé taa muchi jipi rawé. María ko kima michá ropea iyenili, alí ma raneli. Echi riká nili japi María alí José, Jesús wénwala nima jenaʼí Wichimóbachi. Okuaka weeli echi Jesús taa kaachi.

12 bamiba Jesús ma néwariwélitili japi a nakiyé binói Onolá ripá rewegachi bitéami, Jeobá. Echalí rawé ko nili japalí Jerusalén mi simibi echi wénwala Jesús yúa binesia Jeobá kitra. Ma ku simiba pirélachi, José alí María ko ineli japi Jesús ke si ku inari. ¡Echi ko aa bi ku járili! ¿Piri mi ko nokala mayé José alí María?...

Echi ko sapú ku simíali Jerusalén mi áasia Jesús. Suníami járili ku aa bikiá rawé. ¡Mayeli japi ma ke ku riwimea! We be nalí ayena a ku riwali ba. ¿Ami machí kumi asali?... Japoná binewi Jeobá kitra. ¿Chúsiá echoná asali? Kiti echoná ko binema riké wiká namuti Jeobá kitra. Jesús ko we nakiyé binói Onolá Jeobá alí echi ko wiká namuti isínali japi kanílima binói. Sinibí nijéwami niili Jeobá japalí taa nili, ma ochérami ka a cho. Tákoré a niruili pagótami japi we risoa olali Jesús, echi ko Jeobá nalí nijéwili. ¿Ami ko mayé japi a nijéwili José alí María?... Echi Biblia ko aní japi a nijéwili.

¿A sinibí nijéwami nili echi Jesús?... Ayena, echi mi bineri japi we natéami ju: chíkoré we jilí ke, sinibí mi nijéwisaré mujé onolá, mujé iyela si. ¿Ami nijéwami nima?...