BINELÍWAMI 3
Rahab né aʼlá bichíwili Jeobá
¿Chu mi isímili chabé bitéami nisa? To natabo japi mi jipi echoná ciudad Jericó bité, Canaán anilíachi. Echi pagótami japi echoná piré tasi bichíwiami ke Jeobá. Echoná bité bilé mukí Rahab riwéami japi a bichiwi Jeobá.
Rahab taa tiwé ka, ma kipúami nili japi Jeobá aʼlá iwírili echi aʼlá nijéwami chopi. Jeobá ko néeli Moisés kiti buyanama echi israelitas echoná Egipto jonsa. ¡Jeobá ko okoná irápili echi mar Sitákami anilíachi! Kiti echi israelitas simárima echoná. Rahab ko jéaníami kipuli: ¡echi israelitas ma mulipi sísimi Jericó anilíachi, japoná Rahab bitélachi ju!
Rahab ko né aʼlá chinásili okuá echi israelitas kiti echi mukí aʼlá bichíwilampa Jeobá
Ma rokó kaachi, okuá rejoy japi israelitas nili, chiná moʼili inesia echi kawí echoná Jericó. Rahab bitélachi siili alí Rahab ko echoná chilibanala nuleli. Echalí rokó echi silíami, echoná Jericó bitéami, machili japi okuá rejoy moʼili inesia echi kawí, japi Rahab bitélachi siili. Alí echi silíami sapú júali jaré rejoy kiti simama inesia Rahab bitélachi. ¿Piri isílalé Rahab? Sapú ichípinala nuleli ripati echi bitélachi, ma síchanáchi echi rejoy japi echi silíami júali, Rahab ko jéaneli: “Echi okuá rejoy japi jenaʼí siili ma ku moʼeapa. Ata mi we sapú najátisaká ata mi sibábolé”. ¡Rahab ko echi riká tibuli echi okuá rejoy chiná muchúaka! ¿Chúsiá chiná muchúali?... Kiti bichíwami nili Jeobá. A machili japi Jeobá iwírima echi israelitas kiti mitimea echoná Canaán piréami.
Ma ku simiba echi okuá rejoy ko jéaneli Rahab: “Onorúami ma najúchachi echi kalí echoná Jericó jáwami, mujé alí mujé téemala tasi ta mi si suwiboa”. Kiti ke si mukumea, ¿piri isisa riweili Rahab?... Echi okuá rejoy ko jéaneli: “Japi wía sitákami wijawa uchama ripá ventánachi, sinéami bayé mujé téemala alí napawika mochisi echoná pachá”. Rahab né echi riká isili japi riká nuleli echi okuá rejoy. ¿Ami machinali piri ikila?...
Jeobá ko aʼlá tibuli echi Rahab echi téemala si kiti ke suwimea
Pe aminana ko, echi israelitas wisabé jarili nolériya echoná Jericó. Usani rawé sinepi bi noleri ke sinaka echoná ciudad, ma kichao rawé sébachi, kichaosa nolérili. Echalí ko ma sinéami ka né iwéami sinali. ¡Jeobá ko najúchi echi weli kalí echoná Jericó jáwami! ¿A si najúlalé Rahab kalila? Tasi najúli, kiti wía sitákami wijawa uchali echoná ventánachi. ¿Ami ritiwá echi wía wijaa chukúami?... ¡Kiti bela ke si suwila ko Rahab alí echi téemala!
¿Piri mi bineri japi isili Rahab?... Rahab ko bichíwili japi Onorúami we aʼlá tibuma kiti ma machílampa japi chúriká echi Onorúami iwírili echi israelitas. Mujé ayénachó mi binésimi Jeobá kitra. ¿Ami nijéwima Jeobá japi riká nijéwili Rahab?... ¡Ayena!
