Samuel ko taa ka jona torúami nili echomí tabernáculo kiti echoná bitélika nochama. ¿Piri nokiwaa echoná tabernáculo? Echoná ko napawi echi pagótami binésia Jeobá kitra. ¿Ami machinali chúsiá echomí simili Samuel bitélisia? Bachá machiboa echi Samuel iyela kitra. Echi iyela ko Ana riwéami nili.

Ana ko we kanílisa nili muchi ranea, nalí tasi omeri. Echi ko Jeobá tánili kiti omérima ranea, jéaneli: “Jeobá périkó tamí iyá bilé muchi, ani ranélisaká ani mi iyámalí kiti simea nochasia tabernáculo kiti echoná bitélika mi nóchilima”. Jeobá ko a iyali japi Ana tánili, kiti bela a ranela ko, alí Samuel riwali. Ana ko isili japi aneli Jeobá. Echi ko bikiá naó ma bamíbami, tóoli echi towí echomí tabernáculo kiti echoná asaká nóchilima Onorúami.

Echi Elí nuláami nili echoná tabernáculo, walúala sacerdote anewi. Echi okuana Elí kúchuwala, japi ma ochérami nili, echoná si nóchili. Echoná tabernáculo ko Jeobá yúa raʼichasia siyé echi pagótami alí binésia si, kiti bela echi pagótami japi echoná nóchi ke siné chati nokáami nili. Nalí Samuel ko ineli japi echi Elí kúchuwala we chati nokayé. ¿Ami ko mayé japi Samuel echi riká cho isili, japi nokayé echi Elí kúchuwala? ¿Piri mi nata?... Ke, Samuel ko ke chati isili, echi ko sinibí isili japi Jeobá nuleli, kiti echi riká binérili echi wénwala.

¿Chu isisa riweili Elí? ¿A raʼamasa riweili kiti ke chati nokimea?... ¡Ayena! Elí ko tasi riwesa riweli japi bijí a mochima nocha echoná tabernáculo. We be nalí ke echi riká isili ba. Jeobá ko we iyoli echi yúa alí okuana echi kúchuwala, kiti bela jéanela ko japi suwimea.

Siné rokó, Samuel ko ochiká chukuká námili bilé jéaninami: “¡Samuel!”. Alí echi ko we maká simili japomí Elí buwili, echoná nawáachi Elí ko jéaneli: “Tasi ni ka mi bayeki”. Checho siné námili jéaninami: “¡Samuel!”. Ma bisiá mi ko, Elí  ko jéaneli Samuel: “Ami che kipúsaká raʼíchami, mujé anili: ‘Jeobá raʼichá. Mi ni kipúa wilíʼ”. Ma chaniachi Samuel, Jeobá ko je aneli: “Ané echi Elí, japi suwimea suwaba echi téemala kiti we chati nokálampa”. ¿Acha we majali Samuel Elí yúa simiyá? ¿Chu mi aní?... Ayena. Samuel ko we majaka simili ruyesia echi Elí. Nalí be Samuel ko nijéwili japi Jeobá nuleli, a simili Elí yúa raʼichasia. Japi anili Onorúami né echi riká ikili: pe aminana ko, okuana echi Elí kúchuwala suwili, Elí binói si.

Japi isili Samuel ata biné wiká namuti. Tákoré riwali echi pagótami chati nokáachi, Samuel ko ke siné isili japi nokali echi, Samuel ko né sinibí aʼlá nijéwili japi Jeobá nuleli. ¿Ami echi riká cho isíimalé? ¿Ami japi iyiri Samuel nímalé we aʼlá nijéwami Jeobá? Ami echi riká isíisaká we kanílima Jeobá, mujé wénwala a cho.