Jeobá ko tamó chiliweli echi Biblia, japi 66 libros olá. Nalí, ami machináliré: “¿Chúriká niwárami nili echi Biblia? ¿Jépuká níwala ju japi aní echoná?”. Jiti ta machiboa, ma inepo chúriká isili Onorúami jiti ta olaba echi Biblia.

1. Echi pagótami osali echi Biblia, nalí ¿chúsiá aniwá japi Onorúami Raʼicháala ju?

Echi japi osali echi Biblia ko nili 40 rijoi suwinárika piréami alí ke chopi iyiri nili. Chotásili osayá bamíali 1513 a.C. alí sunili osayá bamíali 98 d.C., jiti la rojorali osayá 1,600 bamíali. Tákoré japi osali echi Biblia suwinárika piréami nili, japi aní echoná chopi iyiri ju. ¿Chúsiá omérili echi riká nokayá? Jiti japi aní echoná, Onorúami Raʼicháala ju (leeri 1 Tesalonicenses 2:13). Echi rijoi ke osali japi riká aboi nátili. Nalí, “echi Galabé Riosi Iwigala a galá machírali aboni mapurigá aboni osimea riwéali” (2 Pedro 1:21). Echi espíritu santo jitra Onorúami isili japi jaré rijoi osimea japi riká echi binoy nakili (2 Timoteo 3:16).

2. ¿Jépuká a omero olayá echi Biblia?

“Ne suníami jenaʼí wichimóbachi piréami pagótami [...] isena raʼíchali raʼíchami” omero binea japi aní echi Biblia (leeri Apocalipsis 14:6). Onorúami ko isili japi wikaná niraa raʼicháliami oserúami nima. Ke nirú bilecho libro japi we traducíriwa japi riká raʼicha echi pagótami. Nokí sinéami a omero binea japi aní echi Biblia, tákoré suwinárika piréami ke o bilecho raʼíchami ke ma.

3. ¿Chu isili Jeobá jiti a bijí olabo echi Biblia?

Echi Biblia ko oserúami nili echi namuti jitra japi sapú uwí. Japi riká echi oselí iwítami japi niwáliwa echi animales wichila jitra o bilé planta papiro riwéami. Nalí jaré rijoi japi we galeli echi Biblia, niwali wiká copias osaká alí kilí niraa. Wiká pagótami ke nakili japi nirúlima echi Biblia, nalí jarecho iʼwérili nokali tibúa echi Biblia. Jeobá ko ke riwema japi bilé pagótami o jarecho namuti isima japi ta ke olabo echi Biblia. Echoná Biblia aní: “Echi Onorúami raʼicháala ko sinibí rojorama” (Isaías 40:8).

 AMINABI NATABO JAPI TA BINÉ

5. Ke nakíiri japi nirúlima echi Biblia

 6. Bilé libro jiti sinéami leérima

Echi Biblia isena raʼíchami oserúami ju alí wiká buyanáliwa. Leérisi Hechos 10:34, 35 alí raʼichasi jepuná jitra:

• ¿Chúsiá Onorúami nakí japi echi Biblia suwinárika raʼicháliami oserúami nima alí japi sinéami pagótami olama?

• Japi mi bineli echi Biblia jitra, ¿piri mi baʼori?

 JAPI MI BINELI

Echi Biblia ko Onorúami Raʼicháala ju alí echi ko isili japi sinéami echi pagótami olama echi Biblia.

Piri mi animea

• ¿Piri aniwáami ju japi Onorúami machírali echi pagótami jiti osomea echi Biblia?

• Japi mi bineli jena binelíwami, ¿chu iyiri namuti mi galeli echi Biblia jitra?

• ¿Chumi nili machiyá japi Onorúami iʼwérili isili jiti mi olama echi Biblia?