BINELÍWAMI 06
¿Chúriká chotásili suwaba namuti japi ikí nirú?
“Mujé [Onorúami] isili iwitia japi piré” (Salmo 36:9). ¿Ami bichiwi japi aní jenaʼí? Jaré pagótami ko mayé japi ke wesi tamó niwali, aní japi ta aboi ayénili. A bichíwali nísakó japi ke wesi tamó niwali, ¿chúsiá ta piré? Nalí a Jeobá nísakó japi niwali suwaba namuti japi ikí nirú, a ta machiboa chúsiá tamó niwali. a Biné japi aní echi Biblia alí chúsiá ta bichíwisaré japi aní echoná.
1. ¿A niwárami níliré echi universo?
Echi Biblia ko aní: “Ne chokichí jonsa Onorúami niwali echi ripá siyónami alí wichimoba” (Génesis 1:1). Ne nokí sinéami echi científicos aní japi echi universo ne chokichí jonsa chotásili. ¿Chúriká niwali Onorúami echi universo? Echi ko néeli “binoy jiwérala” —echi espíritu santo— jiti niwama suwaba namuti japi ikí nirú echoná universo, japi riká echi galaxias, sipolí alí echi planetas (Génesis 1:2).
2. ¿Chúsiá Onorúami niwali echi Wichimóbachi?
Jeobá “ke wepi bi niwali, nalí niwali jiti echi pagótami echoná pirélima” (Isaías 45:18). Echi ko we simárika niwali na kawí jiti echi pagótami sinibí pirélima echoná (leeri Isaías 40:28 alí 42:5). Echi científicos ko aní japi ke nirú bilecho planeta japi riká echi Wichimóbachi, japoná ti oméripa pirea.
3. ¿Chúsiá Onorúami ke chopi iyiri niwali echi namuti jákami alí echi pagótami?
Ma niwasa echi Wichimóbachi, Jeobá ko niwali suwaba echi namuti japi ikí nirú echoná. Bachá, niwali echi asalá alí echi namuti jákami. Alí miná, “Onorúami ko niwali echi rijoi alí echi mukí japi riká binoy ju” (leeri Génesis 1:27). Jeobá ko niwali echi pagótami alí echi namuti jákami, nalí ¿chúsiá ke chopi iyiri ju? Jiti Onorúami ko niwali echi pagótami japi riká binoy, echi ko galéami ju alí najórika isimí. Ayénachó tamó niwali jiti ta oméripo binea iseni raʼicháliami niraa, inea echi namuti japi Jeobá niwali alí kipúa siméliwami. Tamujé ko a ti omero nijewia Onorúami alí echi namuti jákami ko ke.
AMINABI NATABO JAPI TA BINÉ
Binepo jaré namuti japi néwariwéliti japi Onorúami niwali suwaba namuti japi ikí piré alí chúsiá ti bichíwisaré japi aní echi Biblia a ne bichíwali ju. Ayénachó binepo japi riká ti niwárami ju, echi ko tamujé bineri japi riká ju Onorúami.
4. Suwaba japi ikí nirú, bilé jitra niwárami ju
Wiká ko we natéami niraa iné echi pagótami japi niwá echi namuti ineka japi nirú jenaʼí Wichimóbachi. We be nalí, wabé rasía natéami ju echi japi niwali suwaba namuti. Inesi echi VIDEO alí raʼichasi jepuná jitra:
-
¿Piri namuti niwali echi pagótami ineka japi nirú jenaʼí Wichimóbachi?
Suwaba echi kalí bilé jitra niwárami ju. Nalí, ¿jépuká niwali suwaba namuti japi ikí nirú jenaʼí Wichimóbachi? Leérisi Hebreos 3:4, TNM, alí raʼichasi jepuná jitra:
-
Echi namuti japi nirú jenaʼí Wichimóbachi, ¿chu iyiri mi baʼori?
-
¿Ata bichíwisaré japi echi universo alí japi ikí nirú jenaʼí Wichimóbachi bilé jitra niwárami ju? ¿Chúsiá?
¿Ami machiyé?
Echoná jw.org ami riwimea oselí alí videos japi raʼicha jepuná jitra. Aa japoná aní “¿A bilé isíliré niwayá?” alí “Jaré aní chúsiá bichiwi Onorúami”.
“Echi kalí rijoi niwali, we nalí suwaba namuti japi ikí nirú ko Onorúami niwali”.
5. Japi riká aní echi Biblia, a bichíwali ju japi echi namuti niwárami ju
Echoná Génesis capítulo 1, echi Biblia ko aní chúriká niwárami nili echi Wichimoba alí suwaba japi ikí nirú echoná. ¿A bichíwali keʼré japi aní echi Biblia? Inesi echi VIDEO alí raʼichasi jepuná jitra:
-
¿A aní echi Biblia japi usani rawé niraa niwárami nili echi Wichimoba alí suwaba japi ikí nirú echoná?
-
¿Ami mayé japi aní echi Biblia japi chúriká niwárami nili echi namuti, a echi riká niwárami nili? ¿Chúsiá?
Leérisi Génesis 1:1 alí raʼichasi jepuná jitra:
-
Ne nokí sinéami echi científicos aní japi echi universo ne chokichí jonsa chotásili. Japi echi nata, ¿a echi riká cho ju japi riká mi leérili jenaʼí Bíbliachi?
Jaré pagótami ko machinali acha Onorúami niwali suwaba namuti o riwéliré japi echi evolución jitra buyama echi namuti. Leérisi Génesis 1:21, 25, 27 alí raʼichasi jepuná jitra:
-
¿Achi ruyé echi Biblia japi Onorúami néeli echi evolución jiti buyama echi namuti jákami, echi pagótami alí jarecho si namuti? ¿O echi Onorúami niwali suwaba namuti japi ikí nirú?
6. Tamujé ko ke niwárami ju japi riká auché jaré namuti japi Onorúami niwali
Tamujé ko ke niwárami ju japi riká echi namuti jákami. Leérisi Génesis 1:26 alí raʼichasi jepuná jitra:
-
Echi pagótami ko galéami ju alí natimáami, jiti niwárami ju japi riká Onorúami. ¿Piri mi biné Jeobá jitra?
JAPI ANÍ JARÉ PAGÓTAMI: “Japi aní echi Biblia, japi Onorúami niwali suwaba namuti, ke bichíwali ju”.
-
Mujé ru, ¿piri mi nata? Alí, ¿chúsiá?
JAPI MI BINELI
Jeobá ko niwali echi universo alí suwaba namuti japi ikí nirú echoná.
Piri mi animea
-
¿Piri bineri echi Biblia japi riká niwárami nili echi universo?
-
¿Achi Onorúami riwéliré japi echi evolución jitra buyama echi namuti o echi binoy niwali?
-
¿Chúsiá tamujé ko ke niwárami ju japi riká echi namuti jákami?
JITI MI CHE BINEMA
Ami machimea jaré namuti japi newaré japi a nirú bilé japi niwali suwaba namuti.
“¿Piri ta biné ineka echi namuti japi nirú jenaʼí Wichimóbachi?” (¡Busuréwiami!, septiembre 2006)
Iné chúriká bilé onolá ruyé echi ranala japi Onorúami niwali suwaba namuti.
Biné achi echi evolución ruyé japi riká aní echi Biblia.
“¿Achi niwali Onorúami suwaba namuti japi ikí nirú néeka echi evolución?” (Oselí japi nirú echoná jw.org)
Leérika japi aní echi científicos alí machiyá chúriká nili echi ochí japi tota bitili ma chabé jonsa (registro fósil), mujé binema acha niwárami ju suwaba namuti o aboi buyali.
Chúriká chotásili suwaba namuti japi ikí nirú. Malí namuti japi mi machisáré (Folleto)
a Echi binelíwami 25 raʼicha chúriká nakí Onorúami japi pirélima echi pagótami.
