BINELÍWAMI 07

¿Chúriká ju Jeobá?

ANERIA ECHONÁ

¿Chúriká ju Jeobá?

Japalí mi nata Jeobá jitra, ¿chúriká mi mayé japi ju? Ami mayéeré japi echi ko ne walúala ju alí japi we miká atí japi riká echi sipolí. O japi echi ko wabé omériami ju japi riká echi ukí we jiwérami, we be ke níliami ju. ¿Ati oméripo machiyá chúriká ju Jeobá? Ayena. Echoná Bíbliachi Jeobá ko tamó ruyé japi chúriká ju echi, ayénachó japi we mi natéami niraa iné.

1. ¿Chúsiá ti ke ritiwá Onorúami?

“Riosi chopi Iwigá [o espíritu] niráa ju” (Juan 4:24). Jeobá ko ke olá ripokala japi riká tamujé. Echi ko bilé espíritu ju japi bité ripá riwigachi japoná tamujé ko ke ritiwá.

2. ¿Chu isíami ju Jeobá?

Tákoré ti ke ritiwá Jeobá, japalí ti biné echi jitra ati machí japi echi ko simá isíami ju. Echi Biblia ko aní: “Jeobá ko sinibí aʼlá isimí, tasi awénili riwema japi a nijéwami ju” (Salmo 37:28). “Ne wabé natimáami ju, ne wabé galéami ayénachó” alí simá isimí echi pagótami yúa japi risoa nili (Santiago 5:11). “Jeobá ko mulipi atí echi yúa japi omona alí iʼwiri echi japi risoa nílika muchuwi” (Salmo 34:18). ¿Ami ko machiyé japi ta noká kaníliti Jeobá o ayénachó omonáriti? Bilé pagótami japi chati namuti isimí ko, we omonáriti Jeobá (Salmo 78:40, 41). Nalí japi aʼlá isíami ju ko, kaníliti (leeri Proverbios 27:11).

3. ¿Chúriká newa isimí Jeobá japi tamó galé?

Tákoré Jeobá jarecho namuti simá isíami ju, echi Biblia ko aní japi “ne wabé galéami ju” (1 Juan 4:8). Echi Biblia jitra alí suwaba namuti japi niwali newaré japi Jeobá we tamó galé (leeri Hechos 14:17). Natá chúriká ti niwárami ju. Echi ko tamó niwali jiti ta oméripo inea wiká colores, kanílipo ipúa echi música alí koʼyá echi koʼwáami we raʼíami. Echi ko nakí japi ta kanílika pirélipo.

AMINABI NATABO JAPI TA BINÉ

Ma binepo piri namuti jitra Jeobá ko isimí wiká namuti. Ayénachó binepo chúriká newaré japi echi we simá isíami ju.

4. Echi espíritu santo: Onorúami jiwérala ju

Japalí ti nocha tamujé ko nee sikala, alí Jeobá ko nee echi espíritu santo. Echi Biblia ko ke aní japi echi espíritu santo ju japi riká bilé pagótami, aní japi echi ko ju Onorúami jiwérala japi jitra niwá suwaba japi ikí nirú. Leérisi Lucas 11:13 alí Hechos 2:17, alí raʼichasi jepuná jitra:

Onorúami ko iyama echi espíritu santo japi echi tani. Mujé chu aní, ¿achi echi espíritu santo ju japi riká bilé pagótami o echi Onorúami jiwérala? Alí, ¿chúsiá mi echi riká nata?

Jeobá ko isimí wiká namuti néeka echi espíritu santo. Leérisi Salmo 33:6 alí 2 Pedro 1:20, 21, alí raʼichasi jepuná jitra:

¿Chúriká néeli Jeobá echi espíritu santo?

5. Jeobá ko we simárika isíami ju

Moisés ko ma we aʼlá nijéwami nili Onorúami, nalí echi ko a bijí wabé aʼlá machinali japi chúriká ju echi. Jiti la jéaneli: “Tamí bineri japi mi isíami ju jiti ni we aʼlá mi machimea” (Éxodo 33:13). Alí Jeobá ko ruyeli jaré namuti japi chúriká ju echi. Leérisi Éxodo 34:4-6 alí raʼichasi jepuná jitra:

¿Chu iyiri ju jaré namuti japi Jeobá aneli Moisés?
Japi riká ju Jeobá, ¿chu iyiri mi we galé?

6. Jeobá ko we natéami niraa iné echi pagótami

Echi hebreos, japi Onorúami puéblowala nili, pioni nili echomí Egipto. ¿Chu nilie Jeobá inea echi puéblowala we risoa níliachi? Kipusi echi AUDIO o leérisi Éxodo 3:1-10, alí raʼichasi jepuná jitra:

AUDIO: Jeobá ko we omona nilie inea echi puéblowala we risoa níliachi (2:45)

Jepuná jitra, ¿piri mi biné japi chu nili Jeobá risoa níliachi echi pagótami? (Inesi echi versículos 7 alí 8).
¿Achi mi mayé japi Jeobá ne bichíwali iʼwírinali echi pagótami? ¿A omérimiré? ¿Chúsiá mi echi riká nata?

7. Ineka japi Jeobá niwali, ata machí chúriká ju echi

Echi namuti jitra japi niwali, Jeobá ko tamó ruyé chúriká ju echi. Inesi echi VIDEO, aminá ko leérisi Romanos 1:20 alí raʼichasi jepuná jitra: