BINELÍWAMI 08
Mujé ko omérima Jeobá amígowala niya
Jeobá ko nakí japi mi echi jitra binema. ¿Chúsiá? Jiti echi ko nakí japi mi machimea chu isíami ju echi, piri isima pe aminana, alí echi riká mujé echi amígowala nínilima. ¿Achi ne bichíwali oméripo echi amígowala niya? (Leeri Salmo 25:14). ¿Piri mi isísaré jiti mi echi amígowala nima? Echi Biblia aní echi namuti. Ayénachó aní chúsiá we natéami ju japi Jeobá amígowala nipo.
1. ¿Piri mi ané Jeobá?
“Mulubéanasi Riosi yuwa, aʼlí Riosi ayénachó mulubéanama ʼyemi yuwa” (Santiago 4:8). ¿Piri aniwáami ju jepuná? Japi Jeobá mi bayé jiti mi echi amígowala nima. Wiká ko nátiré japi ke omérima Onorúami amígowala niya jiti ke ritiwá. Nalí Onorúami ko tamó iyali echi Biblia jiti ta echi machiboa, alí echi riká mulíwipo echi yúa. Japalí ti leeri echi Biblia, aminabi ti muliwi Jeobá tákoré ti ke ritiwá.
2. ¿Chúsiá Jeobá we aʼlá amigo ju?
Ke nirú bilecho japi mi we galé japi riká Jeobá. Echi ko nakí japi mi we kanílika bitélima alí japi mi sinibí echi iʼwírili tánima. Ané Jeobá suwaba japi mi nili, jiti echi ko mi iʼwírinali (1 Pedro 5:7). Jeobá ko sinibí kipú alí iʼwiri echi amígowala (leeri Salmo 94:18, 19).
3. ¿Piri nokisáré echi Jeobá amígowala?
Jeobá ko we galé sinéami pagótami, nalí be “amígowala ju echi japi we aʼlá noká” (Proverbios 3:32). Jeobá ko nakí japi echi amígowala nokimea japi aʼlá ju alí ke nokimea japi echi aní japi chati ju. Jaré ko a natámiré japi ke siné omérima nokayá japi Jeobá aní. Nalí be, Jeobá ko we galéami ju alí naré sinéami echi pagótami japi iʼwérili noká echi nijewia (Salmo 147:11; Hechos 10:34, 35).
AMINABI NATABO JAPI TA BINÉ
Binepo jarecho namuti japi chúriká Jeobá amígowala nipo alí chúsiá ke nirú bilecho amigo japi riká echi.
4. Abrahán ko Jeobá amígowala nili
Echi Biblia ko raʼicha Abrahán jitra (japi ayénachó riwéwami nili Abrán), echi jiti ta machí chu nokáami nísaré Onorúami amígowala. Leérisi Abrahán jitra echoná Génesis 12:1-4 alí raʼichasi jepuná jitra:
-
¿Piri tánili Jeobá Abrahán japi isima?
-
¿Piri aneli Jeobá japi iyama?
-
¿Chu isili Abrahán kipusa japi Jeobá aneli japi isima?
5. Piri tani Jeobá japi nokimea echi amígowala
Sinéami ta nakí japi tamujé amígowala nokimea jaré namuti.
-
¿Piri mi nakí japi nokimea mujé amígowala mi jitra?
Leérisi 1 Juan 5:3 alí raʼichasi jepuná jitra:
-
¿Piri nakí Jeobá japi nokimea echi amígowala?
Ata nijéwinalaká Jeobá, isini kaachi sinúrika ti nokisáré japi ta iyiri ju o riwésaré nokiyá jaré namuti. Leérisi Isaías 48:17, 18 alí raʼichasi jepuná jitra:
-
¿Chúsiá Jeobá tani echi amígowala japi riwema cha nokayá alí nokimea japi echi galé?
6. Chúriká iʼwiri Jeobá echi amígowala
Jeobá ko iʼwiri echi amígowala anachia echi karú ikiwáami. Inesi echi VIDEO alí raʼichasi jepuná jitra:
-
¿Piri iʼwírili echi mukí japi machina echoná video jiti ke risoa nilia bitélima?
Leérisi Isaías 41:10, 13 alí raʼichasi jepuná jitra:
-
¿Piri aní Jeobá japi isima echi amígowala jitra?
-
¿Achi mi mayé japi Jeobá ko we aʼlá amigo nima? ¿Chúsiá?
7. Jiti Jeobá amígowala nipo we natéami ju japi ta echi yúa raʼichabo
Japalí ta raʼicha tamujé amígowala yúa, ata aminabi we aʼlá amigos ju. Leérisi Salmo 86:6, 11 alí raʼichasi jepuná jitra:
-
¿Chúriká ti oméripa raʼichia Jeobá yúa?
-
¿Chúriká raʼicha Jeobá tamujé yúa?
JAPI ANÍ JARÉ PAGÓTAMI: “Ke ti siné oméripo Onorúami amígowala niya”.
-
¿Chu iyiri texto mi ruyema jiti machimea japi ta a omero Jeobá amígowala niya?
JAPI MI BINELI
Jeobá ko mujé amígowala nínali alí mi iʼwírima jiti mi echi mulíwima.
Piri mi animea
-
¿Chúriká iʼwiri Jeobá echi amígowala?
-
¿Chúsiá Jeobá tani echi amígowala japi riwema cha nokayá alí nokimea japi echi galé?
-
¿Achi we jilí ju japi Onorúami tani echi amígowala? ¿Chúsiá echi riká mi nata?
JITI MI CHE BINEMA
¿Chúriká mi iʼwírima Onorúami amígowala niya?
“¿Chúsiá we aʼlá ju machiyá echi Onorúami Jeobá?” (Echi Nawésami, 15 inárachi febrero 2003)
Biné piri mi isísaré jiti mi Onorúami amígowala nima.
Leeri chúsiá bilé mukí aní japi Jeobá amígowala niya iʼwírili.
Kipú japi anijó jaré kúruwi alí iwé Jeobá jitra.