BINELÍWAMI 09
Ami mulíwima Onorúami japalí mi echi yúa raʼicha
¿Ami nili japi mi newalé busuré jiti mi aʼlá bitélima? ¿Ami machinali jaré namuti we natéami japi mi ke machí? ¿Ami omona nili alí mi newalé jiwérili? ¿Achi mi aminabi we mulíwinali Jeobá? Raʼichia Jeobá yúa mi iʼwírima japalí mi echi nili. Nalí, ¿chúriká ti nokiboa? ¿A kipúiré Onorúami suwaba echi oraciones? ¿Chúriká mi isima jiti Onorúami a mi kipuma? Ma binepo.
1. ¿Jépuká yúa raʼichabo? Alí, ¿piri namuti jitra?
Jesús ko binérili japi ta Onorúami bi yúa raʼichásaré japi ripá riwigachi atí. Binoy echi riká isili, jiti la jéanili: “ʼYémitamo jerigá raʼichabo Riosi yuwa: Tamujé Onolá mápumi echoʼná ripá riwigachi atí...” (Mateo 6:9). Japalí ta we raʼicha Jeobá yúa, ata aminabi we aʼlá amigos nipo.
Ata omero anea Jeobá suwaba namuti. Nalí, ati nakiyáaká japi Jeobá isima japi ta ané, ke ti tánisaré echi namuti japi echi ko ke nakí. Echi Biblia aní: “Tánsagá mapurigá Riosi olama bilé namuti, mapurigá Binói chopi nakí olánala, echalí Riosi galá kipukú” (1 Juan 5:14). Jesús ko anili jaré namuti japi ta tánipo japalí ta Jeobá yúa raʼicha (leeri Mateo 6:9-13). Ke tamujé bi jitra raʼichabo, ayénachó matétarabá iyásaré Onorúami japi isili tamujé jitra, alí tánipo japi iʼwírima jarecho pagótami.
2. ¿Chúriká ti raʼichásaré Onorúami yúa?
Echi Biblia aní: “Suwaba anesi Onorúami japi timí nili” (Salmo 62:8). Jiti bela, japalí ti raʼicha Onorúami yúa, ati ne sulachí jonsa raʼíchisaré. Onorúami ko ke aní chúriká asaká raʼichabo echi yúa, ati omero kilí raʼicha o iʼwérika ma. Ayénachó ati omero echi yúa raʼichia japalí tamujé nakí.
3. ¿Chúriká tamó iʼwiri Jeobá japalí ta yúa raʼicha?
Echi ko nee echi Biblia, echi riká tamó ruyé japi ta machinali. Leeria echi Biblia “iʼwiri japi ke machíami ju jiti machíami nima” (Salmo 19:7; leeri Santiago 1:5). Alí japalí ta karúa ikisaa, Jeobá tamó iʼwiri jiti kilí nílipo. Ayénachó isímiré japi echi nijéwami ju, tamó iʼwírima japalí ta newalé.
AMINABI NATABO JAPI TA BINÉ
Binepo chúriká raʼichabo Onorúami yúa jiti tamó kipuma alí chúriká raʼichia echi yúa tamó iʼwiri.
4. Onorúami ko aní chúriká ti echi yúa raʼichásaré
¿A kipúiré Onorúami sinéami pagótami japi echi yúa raʼicha? Inesi echi VIDEO.
Jeobá ko nakí japi ta echi bi yúa raʼichabo. Leérisi Salmo 65:2 alí raʼichasi jepuná jitra:
-
¿Ami mayé japi Onorúami nakí japi mi echi yúa raʼichama? ¿Chúsiá echi riká mi aní?
Ati nakiyáaká japi Onorúami tamó kipuma, ati iʼwérili nokisáré nijewia japi echi aní. Leérisi Miqueas 3:4 alí 1 Pedro 3:12, alí raʼichasi jepuná jitra:
-
¿Chúriká nokiboa jiti Jeobá tamó kipuma japalí ta echi yúa raʼicha?
¿Achi mi mayé japi Onorúami kipuma japalí echi sontarsi tánisa japi echi iʼwírima nakoa?
5. Ati raʼichásaré Jeobá yúa ne sulachí jonsa
Wiká pagótami ko binéritami ju japi echi raʼíchali bi néema japalí raʼicha Onorúami yúa. ¿Achi nakí Onorúami japi ta echi riká yúa raʼichabo? Leérisi Mateo 6:7 alí raʼichasi jepuná jitra:
-
¿Piri ta nokisáré jiti ta ke wisabé niraa aniboa bilepi bi raʼíchali?
Natá bilé namuti aʼláala japi mi ikili echi rawé alí matétarabá iyá Jeobá. Echi riká mi isísaká, bilé tarali ami kichao namuti anema Jeobá japi ke chopi iyiri nili.
Japi riká bilé onolá nakí japi echi ranala ruyema suwaba japi nili, Jeobá ayénachó nakí japi tamujé echi yúa raʼíchipo ne sulachí jonsa.
6. Raʼichawa Onorúami yúa bilé namuti we natéami ju
¿Chúriká tamó iʼwiri Onorúami yúa raʼicha japalí ti ikisaa namuti we jilírami? Inesi echi VIDEO.
Echi Biblia ko aní japalí ta raʼicha Onorúami yúa, ata ku kilí nílipo. Leérisi Filipenses 4:6, 7 alí raʼichasi jepuná jitra:
-
Tákoré raʼíchilia Onorúami ke akarewi echi karú ikiwáami, ¿chúsiá tamó iʼwiri?
-
¿Piri namuti mi ruyénali Onorúami?
¿Ami machiyé?
Echi raʼíchali “amén” aniwáami ju “echi riká nima” o “ne bichíwali”. Ne chabé jonsa aniwá “amén” japalí sunisa raʼicha Onorúami yúa (1 Crónicas 16:36).
7. Sinibí raʼichá Onorúami yúa
Isini kaachi ti noká wiká namuti alí ti ke newalá Jeobá yúa raʼichia. ¿Chúriká newa isili Jesús japi we natéami niraa ineli? Leérisi Mateo 14:23 alí Marcos 1:35, alí raʼichasi jepuná jitra:
-
¿Piri isili Jesús jiti ikírima Onorúami yúa raʼichia?
-
Mujé ru, ¿piri mi isima?
JAPI ANÍ JARÉ PAGÓTAMI: “Ke natéami ju jépuká ti amachiki jiti echi Onorúami ko suwaba kipú”.
-
¿Mujé chu aní?
JAPI MI BINELI
Japalí ti raʼicha Onorúami yúa ne sulachí jonsa ati muliwi echi, ayénachó tamó iʼwiri jiti kilí nílipo alí nijí echi jiwérala jiti nokiboa japi echi galé.
Piri mi animea
-
¿Jépuká ti yúa raʼichabo?
-
¿Chúriká ti raʼichabo Onorúami yúa?
-
¿Chúriká tamó iʼwiri Onorúami yúa raʼichia?
JITI MI CHE BINEMA
Jenaʼí mi binema jaré namuti we natéami japi machisáré echi pagótami japi raʼicha Onorúami yúa.
Leeri chúsiá we natéami ju japi mi Onorúami yúa raʼichama alí chúriká mi isima.
“¿Chúsiá we natéami ju japi mi raʼichama Onorúami yúa?” (Oselí japi nirú echoná jw.org)
Biné japi aní echi Biblia jépuká nalí ta yúa raʼichásaré.
“¿Aʼlá ju japi amachíkipo echi santos?” (Oselí japi nirú echoná jw.org)
Inesi jepuná video japi chúriká ti nokiboa japalí ti raʼicha Onorúami yúa.
