¿Ami siné kaachi bayeri japi mi simea japoná napawí echi testigo Jeobá? Ami riwela níliré kulí simiyá japoná echi napawí. Nalí ami natámiré: “¿Chu noká echi Testigos japoná napawí? ¿Chúsiá we natéami niraa iné napawía? Alí nijé ru, ¿achó simisáré?”. Jenaʼí mi binema japalí mi simí echi napawíliwachi mi iʼwírima jiti mi Onorúami amígowala nima.

1. ¿Chúsiá we natéami ju napawíliwa?

Bilé japi osali echi Biblia anili chúsiá we natéami ju, echi ko jéanili: “Echoná napawíliwachi ani walubéala anema Jeobá” (Salmo 26:12). Jipi echi testigo Jeobá ayénachó napawí alí we kanili echi riká nokayá. Omáana Wichimóbachi echi Testigos sinibí tarali napawí jiti raʼichama Onorúami yúa alí wikaránima. Sinibí bamíali echi riká cho noká, nalí wiká niraa napawí.

2. ¿Piri mi binema echoná napawíliwachi?

Echoná napawíliwachi ata biné japi aní Onorúami Raʼicháala, alí ruyéliwa piri aniwáami ju (leeri Nehemías 8:8). Aminabi mi binema Jeobá jitra alí japi chúriká ju echi. Japalí mi machisaa japi Jeobá we mi galé, mujé ko we inílima echi amígowala nínala. Ayénachó mi machimea chúriká Onorúami mi iʼwiri jiti mi kanílika bitélima (Isaías 48:17, 18).

3. ¿Chúriká mi iʼwírima napawía jarecho yúa echoná napawíliwachi?

Jeobá ko tamó ané japi “aʼnagupi nagúurabo mapurigata ibili niráa waminabi wabé galéami níibo, ayénachó [...] galabé oláami níibo. Alí ketasi galá níima máputa waminá ariwebo napawíi” (Hebreos 10:24, 25). Echoná napawíliwachi ami machimea pagótami japi we galéami ju alí japi we binénali Onorúami jitra. Alí mi kipuma we simárika raʼíchami echi Biblia jitra (leeri Romanos 1:11, 12). Ayénachó mi omérima raʼichia echi yúa japi echoná napawí, niwíkami alí ke niwíkami, japi chúriká noká anachia echi karú ikiwáami. Jiti bela Jeobá nakí japi ta ke siné riwepo simíaya echoná napawíliwachi.

 AMINABI NATABO JAPI TA BINÉ

4. Napawíliwami japi niwá echi testigo Jeobá

Echi cristianos bachá siglo piréami ayénachó napawíe binemia Jeobá jitra (Romanos 16:3-5). Leérisi Colosenses 3:16 alí raʼichasi jepuná jitra:

• ¿Chúriká nokali echi cristianos japalí napawíe?

1. Echoná napawíliwachi ati kipú we natéami nawésali, escenificaciones alí videos. Echi ko chotasi wikaraka alí Onorúami yúa raʼichia, echi riká cho ku suní.

2. Echoná napawíliwachi ayénachó ti omero aniyá japi ta bineli japalí náriwa.

3.   Sinéami omero simíaya echoná napawíliwachi: rijoi, mukí alí echi kuuchi.

4. Japoná napawí echi testigo Jeobá ke bujéliwa, ke tánima winomí japi echoná si.

5. Iʼwérili ti nokisáré jiti simabo echoná napawíliwachi

• ¿Chúsiá ke ti riwésaré simíaya echoná napawíliwachi?

 JAPI MI BINELI

Simiyá echoná napawíliwachi mi iʼwírima jiti mi aminabi mulíwima Jeobá, echi amígowala nima alí mi nijéwima japi riká noká jarecho.

Piri mi animea

• ¿Chúsiá Jeobá nakí japi ta simabo echoná napawíliwachi?

• ¿Piri mi binema echoná napawíliwachi japi niwá echi testigo Jeobá?

• ¿Chúriká ayénachó mi iʼwírima echi napawíliwachi?