BINELÍWAMI 16
¿Piri isili Jesús japalí biteili jenaʼí Wichimóbachi?
Wiká pagótami iné echi Jesús japi riká taa muchi, bilé profeta, ayénachó iné japi riká bilé rijoi japi ma mulipi mukú. Nalí, ati binésaká japi Jesús isili japalí nawali jenaʼí Wichimóbachi, we ti aʼlá machiboa. Jenaʼí binelíwami, ami binema jaré namuti we natéami japi isili Jesús alí chúsiá aʼlá ju japi mi machimea.
1. ¿Chu iyiri nóchali isimia nawali Jesús?
Jesús ko nawali jenaʼí Wichimóbachi nawisamia echi Onorúami Gobiérnowala jitra (leeri Lucas 4:43). Echi ko nawésili japi Onorúami wilama bilé gobierno japi ku kariwema echi chati namuti japi ikí jenaʼí Wichimóbachi. a Bikiá bamíali aminá nasipa, Jesús ko we iʼwérika isili nawesia jepuná raʼíchali (Mateo 9:35).
2. ¿Piri néwariwélitili echi weli namuti japi niwali Jesús?
Echi Biblia ko aní japi Jesús “wabé omériga olali wikabé namuti mapurigá ke wesi pagótami omero echirigá olayá” (Hechos 2:22). Echi Onorúami jiwérala jitra, Jesús ko omérili ku kilí wilabia echi ukí, kóʼaya wiká pagótami, ku saʼwea echi nayúami alí ku jawasia japi ma suwili (Mateo 8:23-27; 14:15-21; Marcos 6:56; Lucas 7:11-17). Japi isili Jesús néwariwélitili japi Onorúami júali jenaʼí Wichimóbachi. Ayénachó néwariwélitili japi Jeobá ko a omero ku kariwea suwaba echi karú ikiwáami japi ta ikí.
3. ¿Piri tamó bineri japi riká isili Jesús?
Jesús ko sinibí nijéwili Jeobá (leeri Juan 8:29). Echi ko nijéwami nili japalí cheka mukuli, isili suwaba japi aneli echi Onolá, tákoré jarecho ko ke nakili japi echi riká isima. Ayénachó néwariwélitili japi echi pagótami a omero nijewia Onorúami tákoré we jilírami namuti ikiyé. Echi riká Jesús tamó binérili jiti echi riká cho nokiboa (Juan 13:15).
AMINABI NATABO JAPI TA BINÉ
Ma inepo chúriká nawésili Jesús echi Onorúami Raʼicháala alí chúriká niwali echi milagros.
4. Jesús ko nawésili echi aʼláala raʼíchali
Jiti nawésima wiká pagótami echi Onorúami Raʼicháala, Jesús ko wiká kilómetros iyénali omáana buwichimi. Leérisi Lucas 8:1 alí raʼichasi jepuná jitra:
-
Japi echi mulíwili kipumia, ¿echi bi binérili Jesús?
-
¿Piri isili Jesús jiti omérima bineria wiká pagótami?
Onorúami ko anili japi echi Mesías nawisama aʼláala raʼíchali. Leérisi Isaías 61:1, 2 alí raʼichasi jepuná jitra:
-
¿Chúriká isili Jesús japi riká aní echi profecía?
-
¿Achi mi mayé japi jipi ayénachó echi pagótami newalé kipúa echi aʼláala raʼíchali?
5. Jesús ko binérili namuti we natéami
Jesús ko ke bi nawésali echi aʼláala raʼíchali, ayénachó binérili namuti we natéami japi iʼwírili echi pagótami. Ma inepo jaré japi binérili echoná kawírili asaká. Leérisi Mateo 6:14, 34 alí 7:12, alí raʼichasi jepuná jitra:
-
¿Chu iyiri busuréliami we natéami nijili Jesús?
-
¿Ami mayé japi echi busuréliami iʼwírima echi pagótami jipi rawé?
6. Jesús ko niwali milagros
Jeobá ko iyali Jesús binoy jiwérala jiti omérima niwayá wiká milagros o weli namuti. Jiti mi binema bilé ejemplo, leérisi Marcos 5:25-34 o inesi echi VIDEO. Alí raʼichasi jepuná jitra:
-
Japi riká machina echoná video, ¿piri bichíwili echi mukí?
-
¿Piri mi we baʼórili echi milagro jitra?
Leérisi Juan 5:36 alí raʼichasi jepuná jitra:
-
Echi milagros japi niwali Jesús, ¿piri néwariwélitili?
¿Ami machiyé?
Ne sojí suwaba japi ta machí echi Jesús jitra, oserúa uchuwi echoná naó libros Evangelios riwéami. Japi osali echi naó Evangelios—Mateo, Marcos, Lucas alí Juan—suwinárika niraa ruyeli jaré namuti Jesús jitra. Suwaba jepuná libros tamó iʼwiri machiyá japi isili Jesús.
-
MATEO
nili japi ne bachá osali bilé echi Evangelio. Echi libro ko ruyé japi Jesús binérili, nalí we raʼíchali Onorúami Gobiérnowala jitra.
-
MARCOS
osali echi libro japi ke me wilí nili. We sapú ruyeli wiká namuti we natéami japi Jesús isili, nalí we aʼlá niraa.
-
LUCAS
we raʼíchali japi we natéami ju echi oración alí japi Jesús simá isíami nili echi umukí yúa alí riwíwili.
-
JUAN
ruyé japi iyiri nili Jesús, jiti osali japi raʼíchili Jesús echi amígowala yúa alí jarecho pagótami si.
JAPI ANÍ JARÉ PAGÓTAMI: “Jesús Onorúami ju alí we omériami”.
-
Mujé, ¿piri mi nata?
JAPI MI BINELI
Jesús ko nawésili echi Onorúami Gobiérnowala jitra, niwali milagros alí sinibí nijéwili Jeobá.
Piri mi animea
-
¿Chu iyiri nóchali we natéami isili Jesús japalí biteili jenaʼí Wichimóbachi?
-
¿Piri néwariwélitili echi milagros japi niwali Jesús?
-
¿Piri namuti binérili Jesús japi a iʼwírima echi pagótami?
JITI MI CHE BINEMA
¿Chu iyiri namuti we natéami binérili Jesús?
Inepo chúsiá ti bichiwi japi echi milagros japi niwali Jesús a ne bichíwali ikili.
“¿Piri ta biné echi milagros jitra japi niwali Jesús?” (Echi Nawésami, 15 inárachi julio 2004)
Leeri japi isili bilé rijoi japalí bineli chúriká nili Jesús.
“Ani natie japi nijé nalí we natéami ju” (Echi Nawésami, 1 inárachi octubre 2014)
Iné echi namuti we natéami japi isili Jesús japalí biteili jenaʼí Wichimóbachi.
“Japi isili Jesús jenaʼí Wichimóbachi” (Echi Biblia Traducción del Nuevo Mundo, apéndice A7)
a Echi binelíwami 31 aminá 33 che we aʼlá ruyé piri ju echi Onorúami Gobiérnowala.
