BINELÍWAMI 17

¿Chu isíami ju Jesús?

ANERIA ECHONÁ

Ati aminabi mulíwipo Jesús alí echi Onolá Jeobá, japalí ti biné japi isili Jesús japalí biteili jenaʼí Wichimóbachi. ¿Chu iyiri ju jaré namuti japi Jesús we simá isíami nili? Alí, ¿piri ta nokisáré jiti nipo japi riká Jesús?

1. ¿Chúsiá mi aʼlá machisáaká Jesús ayénachó mi we aʼlá machimea Jeobá?

Jesús ko wiká millones bamíali biteili echi Onolá yúa alí binea chúriká ju echi. Jiti la echi ko nata alí isimí japi riká Jeobá (leeri Juan 5:19). Jesús ko ne sojí chopi iyiri ju japi riká echi Onolá, jiti la echi ko jéanili: “Echi mapu tamí ritiwako, échiko ma ritiwá Onorúami” (Juan 14:9). We mi aʼlá machisáaká Jesús ayénachó mi we aʼlá machimea Jeobá. Japi riká, Jesús we galeli echi pagótami alí jepuná newaré japi Jeobá ayénachó we galé echi pagótami.

2. ¿Chúriká newa isili Jesús japi we galé echi Onolá?

Jesús ko jéanili: “Nijeni we galé Onorúami, ayénachó [...] Nijé we olá mapurigá Onorúami tamí nuleli olánala” (Juan 14:31). Japalí Jesús jenaʼí Wichimóbachi biteili sinibí nijéwili Jeobá tákoré we jilí nili, echi riká newa isili japi we galé echi Onolá. Jesús ko we kanilie raʼichia echi Onolá jitra alí iʼwiria jarecho pagótami jiti Jeobá amígowala nima (Juan 14:23).

3. ¿Chúriká newa isili Jesús japi we galé echi pagótami?

Echoná Biblia aní japi Jesús wabé galé echi pagótami (Proverbios 8:31). Echi ko newa isili japi we galé echi pagótami japalí iʼwírili alí ke buweli japi echi ku iʼwírima. Echi milagros japi niwali ke bi néwariwélitili japi we jiwérami ju, nalí ayénachó japi iʼwírinali echi pagótami (Marcos 1:40-42). We simá isíami nili sinéami yúa. Suwaba japi anili Jesús ku kaníliti echi pagótami japi aʼlá nokáami nili. Jesús ko riweli japi risoa olárami nima alí miʼlirúami nima jiti we galé sinéami echi pagótami, nalí ne wabé galé japi a nijewi japi echi bineri (leeri Juan 15:13, 14).

AMINABI NATABO JAPI TA BINÉ

We aʼlá binepo japi Jesús we galéami nili alí iʼwírili jarecho. Ayénachó binepo chúriká tamujé nipo japi riká echi.

4. Jesús ko we galé echi Onolá

Japi riká Jesús isili, tamó binérili chúriká newa nokiboa japi ta we galé Onorúami. Leérisi Lucas 6:12 ayénachó Juan 15:10 alí 17:26. Ma leérisa ibili echi texto, raʼichasi jepuná jitra:

Japi riká isili Jesús, ¿tamujé chúriká newa nokiboa japi ta we galé Jeobá?

Jesús ko we galeli echi Onolá alí sinibí yúa raʼíchali.

5. Jesús ko iʼwírili japi newaleli

Jesús ko wabé nátili japi newaleli jarecho alí binoy ko ke me. Tákoré we risíami ke, Jesús ko iʼwérili isili iʼwiria jarecho. Leérisi Marcos 6:30-44 alí raʼichasi jepuná jitra:

Japi riká aní echi texto, ¿chúriká newa isili Jesús japi we natéami niraa ineli echi pagótami? (Inesi echi versículos 31, 34, 41, alí 42).
¿Chúsiá Jesús iʼwírili echi pagótami? (Inesi echi versículo 34).
Japi riká Jesús ne sojí ju japi riká echi Onolá, ¿piri ta biné Jeobá jitra?
¿Chúriká ti newa nokiboa japi ta natéami niraa iné jarecho japi riká isili Jesús?

6. Jesús ko iyali jarecho japi olali

Tákoré Jesús ke olali wiká namuti, echi ko sinibí iyali jarecho japi olali alí tamó ané japi echi riká cho nokiboa. Leérisi Hechos 20:35 alí raʼichasi jepuná jitra:

Japi riká anili Jesús, ¿piri ju japi tamó kaníliti?

Inesi echi VIDEO alí raʼichasi jepuná jitra:

VIDEO: We kaníliami ju japi iyá jarecho (fragmento) (4:00)

¿Chúriká ti omero iyayá jarecho tákoré ti ke olá wiká namuti?

¿Ami machiyé?

Echi Biblia ko aní japi ta néesaré echi Jesús riwalá japalí ti Onorúami yúa raʼicha (leeri Juan 14:6). Echi riká newa nokiboa japi ta we natéami niraa iné japi Jesús isili jiti ta Onorúami amígowala nipo.

JAPI ANÍ JARÉ PAGÓTAMI: “Tamujé ko risoa nili jiti Onorúami tamó castigo iyá”.