BINELÍWAMI 19
¿Achi ne bichíwali cristianos ju echi testigo Jeobá?
Japi ta testigo Jeobá ju, ata bichiwi japi ta ne bichíwali cristianos ju. ¿Chúsiá? Jenaʼí binepo piri ta bichiwi, chúsiá ti testigo Jeobá riwewi alí chúriká ti newa noká japi ta galé jarecho.
1. ¿Piri bichiwi echi testigo Jeobá?
Jesús ko aneli Onorúami: “Mujé Raʼíchala echi ne Bichíwali ju” (Juan 17:17). Echi testigo Jeobá noká japi riká isili Jesús: suwaba japi echi bichiwi oserúa chukú echoná Onorúami Raʼicháala. ¿Chúriká chotásili echi testigo Jeobá? Bamíali 1870 jaré pagótami Biblia binéami we aʼlá bineli japi aní Onorúami Raʼicháala. Echi ko bichíwili japi aní echi Biblia, tákoré echi Iglesias ke echi riká binérili. Pe aminana ko, chotásili bineria jarecho japi bineli echoná Biblia. a
2. ¿Chúsiá ta testigo Jeobá riwewi?
Jeobá ko aní japi echi pagótami japi echi nijewi, echi testígowala ju, jiti bineri jarecho echi jitra (Hebreos 11:4-12:1). Japi riká chabé Onorúami ko aneli echi puéblowala: “Emi ko nijé testígowala ju” (leeri Isaías 43:10). Alí Jesús anéliwa Testigo Fiel (Apocalipsis 1:5). Jiti la bamíali 1931 jonsa, ati testigo Jeobá riwewi. Ati we kanili jiti ta echi riká riwewi.
3. Japi riká Jesús, ¿chúriká newa noká echi testigo Jeobá japi galéami ju?
Jesús ko we galeli echi discípulos alí ineli japi riká echi téemala (leeri Marcos 3:35). Echi testigo Jeobá omáana Wichimóbachi piréami ayénachó ju japi riká téemala. Jiti la, sinéami anakupi niraa ti ané “rijimala” (Filemón 1, 2). Ayénachó ti nijewi jepuná nulalíwami: “Ne wabé galesi siʼnéami echi auché jaré ritémtami” (1 Pedro 2:17). Echi testigo Jeobá ata newa noká japi we galéami ju jarecho; japi riká, ata iʼwiri echi hermanos omáana Wichimóbachi piréami japalí karúa ikisaa.
AMINABI NATABO JAPI TA BINÉ
We aʼlá machiboa chúriká chotásili echi testigo Jeobá alí piri namuti néwariwéliti japi ta ne bichíwali cristianos ju.
Echi cristianos ne bichíwali, bichiwi japi aní echi Biblia alí ayénachó bineri jarecho japi aní echoná.
4. Japi ta bichiwi oserúa chukú echoná Biblia
Jeobá ko anili japi echi bichíwali japi aní echi Biblia we aʼlá machirúami nima riweili. Leérisi Daniel 12:4 alí raʼichasi jepuná jitra:
-
¿Piri aʼlá machimea echi japi Onorúami nijéwami ju aminabi binésaká japi aní echi Biblia?
Inepo chúriká bineli japi aní Onorúami Raʼicháala jaré Biblia binéami, bilé echi ko nili Charles Russell. Inesi echi VIDEO alí raʼichasi jepuná jitra:
-
Japi riká machina echoná video, ¿chúriká nokali binea echi Onorúami Raʼicháala Charles Russell alí jarecho si Biblia binéami?
¿Ami machiyé?
Isini kaachi, jaré namuti bilecho riká ti ku bichiwi japi riká ti aniyé chabéi. ¿Chúsiá? Natá jepuná ejemplo: japi riká kulí chiléachi echi rayénali isimí japi ta kilipi niraa oméripo inea echi namuti japi ikí nirú, echi riká cho Onorúami isimí japi ta kilipi niraa inámipo echi Raʼicháala (leeri Proverbios 4:18). Tákoré echi Biblia ke nakuliwi, japalí ti aʼlá inámisa japi aní echoná, ata bilecho riká ku bichiwi.
5. Ati nawesa echi bichíwali Jeobá jitra
¿Chúsiá ti testigo Jeobá riwewi? Inesi echi VIDEO alí raʼichasi jepuná jitra:
-
¿Chúsiá we aʼlá ju japi ta testigo Jeobá riwewi?
Jiti wiká ikaleka bineri Jeobá jitra, echi ko chapili jaré pagótami japi riká echi testígowala nima alí jiti nawisama echi ne bichíwali echi jitra. Ma inepo jaré namuti japi ikaleka binériwa Jeobá jitra.
Jaré religiones ko bineri japi Onorúami ko nakí japi ta néepo echi imágenes jiti echi mulíwipo. Nalí, ¿a bichíwali ju? Leérisi Levítico 26:1 alí raʼichasi jepuná jitra:
-
Japi riká aní jepuná versículo, ¿achi bichíwali ju japi Onorúami nakí japi ta néepo echi imágenes?
Jaré religiones ko bineri japi Jesús Onorúami ju. Nalí, ¿achi bichíwali ju? Leérisi Juan 20:17 alí raʼichasi jepuná jitra:
-
Japi riká aní jepuná versículo, ¿achi bichíwali ju japi Jesús Onorúami ju?
-
¿Chumi nili machiyá japi Jeobá ko júula echi testigos jiti nawisama echi ne bichíwali echi jitra alí Jesús?
6. Ata we galé anakupi niraa
Echi Biblia ko aní japi echi cristianos ju japi riká bilé ripokala. Leérisi 1 Corintios 12:25, 26 alí raʼichasi jepuná jitra:
-
¿Piri nokisáré echi cristianos japi ne bichíwali ju japalí jarecho cristianos risoa nili?
-
¿Chúriká newa noká echi testigo Jeobá japi galéami ju?
Japalí jaréanami echi testigo Jeobá risoa ikisaa, echi hermanos omáana Wichimóbachi piréami sapú iʼwiri. Jiti mi machimea, inesi echi VIDEO alí raʼichasi jepuná jitra:
-
¿Achi mi mayé japi echi testigo Jeobá galéami ju japalí iʼwiri jarecho risoa ikisaa? ¿Chúsiá?
Echi cristianos ne bichíwali néwariwéliti japi we galé jarecho alí iʼwiri.
JAPI ANÍ JARÉ PAGÓTAMI: “Echi testigo Jeobá ko bilé religión kulíwami ju”.
-
¿Chu kabú jonsa Jeobá rewali “testigos” echi japi binoy nijéwami ju?
JAPI MI BINELI
Echi testigo Jeobá ne bichíwali cristianos ju alí sinéami omáana Wichimóbachi piréami a ju japi riká téemala, ayénachó ti bichiwi japi aní echi Biblia alí ti nawesa echi bichíwali Jeobá jitra.
Piri mi animea
-
¿Chúsiá ti testigo Jeobá riwewi?
-
¿Chúriká ti newa noká japi ta we galé anakupi niraa?
-
¿Achi mi mayé japi echi testigo Jeobá ne bichíwali cristianos ju?
JITI MI CHE BINEMA
Aminabi biné tamujé jitra.
Echi testigo Jeobá: chúriká chotásili. Parte 1: Kilipi niraa machísili japi bichíwali ju (1:00:53)
Iné bilé namuti japi jarecho ikaleka bineri nalí japi echi testigos ko bichíwali bineri.
Leeri jaré namuti japi mujé machináliré echi testigo Jeobá jitra.
“Preguntas japi jaré machinali echi testigo Jeobá jitra” (Sección echoná jw.org)
Stephen isili wiká namuti chati jiti we nasínili jarecho. Jenaʼí mi machimea chúriká iʼwírili japi nokali echi testigo Jeobá jiti riwema cha isiá.
“We ni chati namuti isíami nili” (Echi Nawésami, 1 inárachi julio 2015)
a Echi oselí riwéami Echi Nawésami, bilé oselí ju japi ta we nee alí japi 1879 jonsa sinibí mechá machina.
