BINELÍWAMI 21
¿Chúriká ti noká nawesia echi raʼíchali aʼláala?
Ma mulipi, néeka echi Gobiérnowala, Jeobá ko suwábima echi chati namuti japi nirú. Jiti la we aʼlá ju japi ta ruyepo jarecho pagótami jepuná raʼíchali aʼláala. Jesús ko nakiyé japi echi discípulos, omáana Wichimóbachi nawisama echi raʼíchali (Mateo 28:19, 20). ¿Chu noká echi testigo Jeobá nijéwimia japi Jesús nulali?
1. ¿Chúriká ikísimi jipi japi aní Mateo 24:14?
Jesús ko anili: “Jeʼná Galabé Riosi Raʼíchala galá nawisárami níima ne suníami jenaʼí wichimóbachi” (Mateo 24:14). Tamujé testigo Jeobá we ti kanili nokayá jepuná nóchali. Ati nawesa echi raʼíchali aʼláala omáana Wichimóbachi simírikami 1,000 sinúrika raʼicháliami. Waʼlú nóchali ju, nalí ke nikúurisaká Jeobá ke ti oméripo nokayá jepuná nóchali.
2. ¿Chúriká ti noká nawesia?
Ata nawesa japoná nirú echi pagótami alí ta simía “ibílana kalílachi” niraa japi riká nokali echi cristianos bachá siglo piréami (Hechos 5:42). Jiti ta echi riká noká, ati omero nawesia wiká millones pagótami sinibí bamíali. Nalí wiká ke muchuwi echoná bitélachi, jiti la ti nawesa japoná jari echi pagótami. Sinibí ti iʼwérili noká ruyea echi pagótami Jeobá jitra alí japi echi isima.
3. ¿Jépuká ju japi nawisásaré echi raʼíchali aʼláala?
Sinéami echi ne bichíwali cristianos nawisásaré echi raʼíchali aʼláala. Tamujé ko we natéami niraa iné jepuná nóchali, jiti la ti iʼwérili noká nawesia japi yena ti omeri jiti echi pagótami niyúbima (leeri 1 Timoteo 4:16). Ke wesi tamujé nateti jiti nokiboa jepuná nóchali, jiti echi Biblia ko aní japi ta ke bujepo jiti ta ke natétika nareli (Mateo 10:7, 8). Tákoré jaré pagótami ke tamujé kipú ati aminabi nawesa jiti echi riká ti nijewi alí kaníliti Jeobá.
AMINABI NATABO JAPI TA BINÉ
Ma binepo chúriká ta noká tamujé testigo Jeobá, nawesia omáana Wichimóbachi alí chúriká Jeobá tamó iʼwiri.
Ata nawesa omáana Wichimóbachi: A) Costa Rica, B) Estados Unidos, C) Benín, D) Tailandia, E) Yap (Micronesia), F) Suecia.
4. Iʼwérili ti noká nawesia sinéami pagótami
Tamujé testigo Jeobá ati iʼwérili noká nawesia echi raʼíchali aʼláala japoná nirú echi pagótami. Inesi echi VIDEO alí raʼichasi jepuná jitra:
-
Japi riká noká echi testigo Jeobá nawesia, ¿piri mi we baʼori?
Leérisi Mateo 22:39 alí 1 Tesalonicenses 2:4, alí raʼichasi jepuná jitra:
-
Japalí ta nawesa, ¿chúriká ti newa noká japi ta we galé echi pagótami?
-
¿Chúriká iné Jeobá echi japi nawesa raʼíchali aʼláala?
5. Japalí ta nawesa ata Onorúami yúa nocha
Wiká ejemplos nirú japi newaré japi Jeobá tamó iʼwiri japalí ta nawesa. Ma inepo japi ikili echomí Nueva Zelanda. Siné rawé bilé testigo, Paul riwéami, simili nawisasia echi pagótami bitélachi alí raʼíchili bilé mukí yúa. Echalí rawé biʼá echi mukí ko tánili Onorúami, néeka echi riwalá Jeobá, japi bilé julama jiti iʼwírima machiyá echi jitra. Bikiá horas bi simírisa, Paul nawali echi mukí bitélachi.
Leérisi 1 Corintios 3:9 alí raʼichasi jepuná jitra:
-
¿Chúriká newaré japi ikili Paul japi Jeobá tamujé iʼwiri japalí ta nawisasia simía?
Leérisi Hechos 1:8 alí raʼichasi jepuná jitra:
-
¿Chúsiá ti newalé japi Jeobá tamó iʼwírima japalí ti simía nawisasia?
¿Ami machiyé?
Echi napawíliwachi japi nirú nasipa tarali, tamujé bineri japi chúriká nawisásaré. Mujé ami simílaká echoná napawíliwachi, ¿chúriká mi ineli japi ta binériwa echoná?
6. Japalí ta nawesa ata nijewi japi Jeobá nulá
Echi cristianos bachá siglo piréami sayératami nili jiti ke nawisama. Echi cristianos iʼwérili nokali yúa raʼicha echi wéala jáwami jiti riwérami nima japi nawisama (Filipenses 1:7). Jipi rawé tamujé testigo Jeobá ayénachó echi riká noká. a
Leérisi Hechos 5:27-29, 31, 33-42 alí raʼichasi jepuná jitra:
-
¿Chúsiá ti ke riwepo simiyá nawisasia? (Leérisi echi versículos 29, 38 alí 39).
JAPI NARI JARÉ PAGÓTAMI: “¿Chúsiá echi testigo Jeobá bitichí niraa simiba nawisasia?”.
-
¿Piri mi animea?
JAPI MI BINELI
Jesús ko nuleli echi discípulos japi nawisama echi raʼíchali aʼláala omáana Wichimóbachi alí Jeobá tamó iʼwiri jiti ta nokiboa echi nóchali.
Piri mi animea
-
¿Chúriká ti noká jiti oméripo nawesia echi raʼíchali aʼláala omáana Wichimóbachi?
-
Japalí ta nawesa, ¿chúriká ti newa noká japi ta we galé echi pagótami?
-
¿Achi tamó kanílitima japalí ta nawesa echi raʼíchali aʼláala? ¿Chúsiá?
JITI MI CHE BINEMA
Iné chúriká nawesa echi testigo Jeobá echoná weli ciudades.
¿Chúriká noká echi testigo Jeobá nawesia echi pagótami japi júmisikami ju jaréana país ka jonsa?
Ati iʼwiri echi pagótami japi júmisikami ju jiti machimea Onorúami (5:59)
¿Chúsiá bilé hermana we kaníliami ju nawesia echi raʼíchali aʼláala? Jiti mi machimea iné echi video.
Leeri chúriká niyúrili echi testigo Jeobá jiti omérima aminabi nawesia echi Onorúami Raʼicháala.
a Onorúami ju japi tamó nulé japi simabo nawisasia. Jiti la, tamujé testigo Jeobá ke ti newalé japi echi gobiernos tamó risensia iyama jiti nawisabo echi raʼíchali aʼláala.
