BINELÍWAMI 22
¿Chúriká mi ruyema jarecho echi raʼíchali aʼláala?
Japalí mi biné japi ne bichíwali ju japi aní echoná Biblia, ami natámiré japi jarecho ayénachó machisáré. Alí a bichíwali ju, ¡sinéami machisáré! Nalí, ami majaa níliré ruyea jarecho japi mi biné. Ma binepo chumi isima jiti mi ke majama alí japi mi we kanílima ruyea jarecho japi mi biné echoná Biblia.
1. ¿Chúriká mi ruyema jarecho japi mi biné?
Echi Jesús discípulowala ko anijoli: “Tarapé chirigá ariwebo nawésiya mapurigata ma námali, ayénachó mapurigata ma riwali” (Hechos 4:20). Echi discípulos ko we natéami niraa ineli japi bineli jiti la ruyénali jarecho. Ami echi riká níliaká, natá chu kabú mi omero raʼicha mujé téemala yúa alí amigos si japi mi biné, nalí riwíwika niraa (leeri Colosenses 4:6).
Japi mi iʼwírima chotasia
-
Japalí mi chotasi raʼichia mujé téemala yúa echi Biblia jitra, ami omero jéaniyá: “Jepuná tarali nijé ko bineli jepuná namuti we semati”.
-
Japalí mujé amígowala nayusa o risoa nílisa ami omero ruyea bilé texto japi iʼwérili iyama.
-
Japalí echi compañeros japi mi yúa nocha mi nárisa piri mi isili sábado alí oméachi, ami omero ruyea japi mi bineli echoná Bíbliachi o japi mi bineli echoná napawíliwachi.
-
Riwiri mujé amígowala echi página internet jw.org.
-
Bayé jarecho japalí mi biné echi Biblia o ruyé japoná aní “Taa jiti bilé testigo Jeobá simea mi binérisia” echoná jw.org.
2. ¿Chúsiá aʼlá ju japi mi simea nawisasia echi congregación yúa?
Echi Jesús discípulowala ke bi ruyeli echi téemala echi raʼíchali aʼláala. Jesús ko júali “okuá niráa [...] ne suníami rijówachi” jiti nawisama echoná (Lucas 10:1). Echi riká nawesia iʼwírili jiti wiká pagótami kipuma echi raʼíchali aʼláala. Ayénachó echi discípulos we kanilie napawika nawesia (Lucas 10:17). Aʼlá nima japi mujé echi riká cho isima echi congregación yúa.
AMINABI NATABO JAPI TA BINÉ
Inepo piri mi iʼwírima jiti mi ke majaa nílima alí mi we kanílima nawesa echi raʼíchali aʼláala.
3. Jeobá mi iʼwírima
Jaré ko a ruyénali jarecho japi biné, nalí majaa nili japi animea echi pagótami o japi natama echi jitra.
-
Alí mujé ru, ¿ami majaa nili ruyea jarecho japi mi biné? ¿Chúsiá?
Inesi echi VIDEO alí raʼichasi jepuná jitra:
-
¿Chu nokali echi remalí alí iwé jiti ke majama?
Leérisi Isaías 41:10 alí raʼichasi jepuná jitra:
-
¿Chúsiá mi Jeobá yúa raʼichásaré ami majaa níliaká nawesia?
¿Ami machiyé?
Wiká japi ma testigo Jeobá ju, mayeli japi ke siné omérima nawesia jarecho pagótami. Japi riká bilé rijoi Sergey riwéami, echi ko nilie japi ke natéami ju alí we jilí nirali raʼichia jarecho pagótami yúa. Nalí chotásili binea echi Biblia. Echi ko jéanili: “Tákoré ni we majaa nilie, ani chotásiki ruyea jarecho pagótami japi ni biné. Jepuná ko we aʼlá nili jiti tamí iʼwírili ke me riwélami niya alí we aʼlá moʼayá japi aní echi Biblia”.
4. Riwíwika raʼichá
Kecho ruyemia bilecho japi aní echi Biblia, ke bi natá piri mi anema nalí ayénachó chúriká mi anema. Leérisi 2 Timoteo 2:24 alí 1 Pedro 3:15, alí raʼichasi jepuná jitra:
-
¿Chúriká mi isima japalí mi raʼicha echi Biblia jitra jarecho yúa?
-
Mujé téemala alí amigos si naʼáwisaká japalí mi ruyé japi mi biné, ¿piri mi isima alí piri mi ke isima?
-
¿Chúsiá ta kilí niraa raʼichásaré alí ke iʼwérili anésaré japi bichíwima japi ta bichiwi?
5. Nawesia echi raʼíchali aʼláala tamó kaníliti
Jeobá ko nuleli Jesús japi nawisama echi raʼíchali aʼláala. ¿Chúriká ineli Jesús echi nóchali? Leérisi Juan 4:34 alí raʼichasi jepuná jitra:
-
Echi koʼwáami tamó iʼwiri jiti pirélipo alí kanílipo. ¿Chúsiá Jesús anili japi nijewia alí nawesia Jeobá jitra, ju japi riká koʼyá koʼwáami?
-
¿Piri aʼláala namuti mi ikimea ami raʼichásaká jarecho yúa japi mi biné?
Jaré namuti japi mi iʼwírima
-
Echoná napawíliwachi japi ta olá nasipa tarali, ami omérima inea chúriká mi chotásima raʼichia echi pagótami yúa.
-
Raʼichá japi mi yúa biné jiti mi ruyema piri mi isísaré jiti mi ayénachó olama bilé asignación echoná napawíliwachi. Jepuná ko mi iʼwírima jiti mi ke majaa nílima raʼichia jarecho yúa japi mi biné.
-
Nee echi sección “Japi aní jaré pagótami” alí “Japi nari jaré pagótami” jiti mi machimea chúriká mi ruyema japi nari o japi aní echi pagótami.
JAPI NARI JARÉ PAGÓTAMI: “¿Chumi riká atí? ¿Piri mi namuti isiki?”.
-
Mujé, ¿chúriká mi chotásima raʼichia japi mi bineli echoná Bíbliachi?
JAPI MI BINELI
Nawesia echi raʼíchali aʼláala we tamujé kaníliti alí chotasia raʼichia echi pagótami yúa ke me jilí ju.
Piri mi animea
-
¿Piri mi iʼwírima jiti mi ruyema jarecho echi aʼláala raʼíchali?
-
¿Chúriká mi newa isima japi mi riwiwi echi pagótami japalí mi raʼicha echi Biblia jitra?
-
¿Piri mi isima jiti mi ke me majaa nílima?
JITI MI CHE BINEMA
Iné naó ejemplos japi chúriká mi nawisama néeka echi tarjeta de contacto jw.org.
Japi ta aniboa japalí ta nawisasia simía néeka echi tarjeta de contacto jw.org (1:43)
Biné naó namuti japi mi iʼwírima jiti mi raʼichama jarecho yúa echi raʼíchali aʼláala.
“¿Ami binérinali echi pagótami?” (Echi Nawésami, septiembre 2020)
Ami machimea bilé ejemplo echoná Biblia japi tamó iʼwírima jiti ke majaa nílipo nawesia tákoré kuuchi ke.
Leeri chúriká mi raʼichama echi Biblia jitra mujé téemala yúa japi kecho machí Jeobá.
“Chúriká binéripo tamujé téemala japi ke bichíyami ju” (Echi Nawésami, 15 inárachi marzo 2014)
