Jeobá ko nakí japi ta machiboa echi téemala japi piré echoná ripá riwigachi. Jepuná ko ju echi ángeles japi “Onorúami kúchuwala” ju (Job 38:7). ¿Piri aní echi Biblia echi ángeles jitra? ¿Chu nokáami ju echi ángeles? ¿Achi sinéami echi ángeles nijéwami ju Onorúami?

1. ¿Jépuká ju echi ángeles?

Kecho bijí niwayá jena Wichimoba, Jeobá bachá niwali echi ángeles, echi ko espíritus ju japi riká Jeobá alí piré ripá riwigachi (Hebreos 1:14). Nirú wiká millones ángeles alí ke suwaba chopi iyiri ju (Apocalipsis 5:11). Echi ko “noká japi echi [Jeobá] aní alí nijewi japi echi nulá” (Salmo 103:20). Chabé ko, Jeobá isini kaachi júlali echi ángeles jiti nawisama alí iʼwírima echi puéblowala. Jipi, ayénachó echi ángeles iʼwiri echi cristianos ne bichíwali jiti riwimea echi pagótami japi machinali Onorúami jitra.

2. ¿Jépuká ju Satanás alí echi demonios?

Jaré ángeles ma ke nijéwili Jeobá. Echi japi bachá ke nijéwili ko ju japi anéliwa Satanás o Diablo, echi ko “ʼyékiami ju jenaʼí wichimóbachi piréami” (Apocalipsis 12:9). Satanás ko nulénali jarecho, jiti la isili japi echi bacháwala rijoi alí mukí, ayénachó ke nijéwima Onorúami. Alí miná ko isili japi jarecho ángeles echi riká cho nokimea. Jepuná ángeles ke nijéwami anéliwa demonios. Jeobá ko ma ke nakili japi jepuná ángeles ripá pirélima, jiti la awali jenaʼí Wichimóbachi alí pe aminana suwábitami nima (leeri Apocalipsis 12:9, 12).

3. ¿Chúriká ta ékiwa Satanás alí echi demonios jitra?

Satanás alí echi demonios eki wiká pagótami néeka echi espiritismo alí ocultismo, suwaba jepuná namuti we chati ju jiti muliwi echi demonios. Japi riká, wiká pagótami machinali japi ikimea pe aminana, jiti la leeri echi horóscopo, nari echi astrólogos, adivinos, videntes alí sukurúami. Alí jaré ko japalí nayusa simía echi owirúami yúa. Satanás alí echi demonios mayeri echi pagótami japi a omero raʼichia echi suwíkami yúa. Nalí Jeobá ko tamó ané: “Kiti simasi echi japi raʼicha suwíkami yúa alí kiti nárisi echi adivinos” (Levítico 19:31). Jeobá ko tamó tibúnali echi Satanás alí demonios jitra, jiti echi sayérala ju alí ke nakí japi ta risoa olárami nipo.

 AMINABI NATABO JAPI TA BINÉ

6. Ami omérima niyuria Satanás alí echi demonios

Satanás ko nulé echi demonios. Jesús japi ayénachó riwewi arcángel Miguel, echi ko nulé echi ángeles nijéwami. ¿Achi we jiwérami ju Miguel? Leérisi Apocalipsis 12:7-9 alí raʼichasi jepuná jitra:

• ¿Jépuká nalí wabé omérami ju: Miguel alí echi ángeles, o Satanás alí echi demonios?

• Echi cristianos ne bichíwali, ¿a majásaré Satanás alí echi demonios?

Tákoré Satanás alí echi demonios mi sayeri, mujé ko a omérima niyuria. Leérisi Santiago 4:7 alí raʼichasi jepuná jitra:

• Jiti Satanás alí echi demonios ke tamujé cha olama, ¿chúriká ta tibuka nokiboa?

 JAPI MI BINELI

Echi ángeles japi nijéwami ju tamó iʼwiri. Satanás alí echi demonios Jeobá sayérala ju alí nee echi ocultismo ékimia echi pagótami.

Piri mi animea

• ¿Chu noká echi ángeles japi nijéwami ju jiti echi pagótami machimea Jeobá?

• ¿Jépuká ju Satanás alí echi demonios?

• ¿Chúsiá we chati ju japi mi isima echi namuti japi espiritismo ju?