BINELÍWAMI 25
¿Chúriká nakí Onorúami japi pirélima echi pagótami?
Echi Biblia ko aní japi echi pagótami ke wilí piré alí ayénachó risoa nilia piré (Job 14:1). Nalí, ¿a nakí Onorúami japi ta echi riká pirélipo? ¿O nakí japi ta kanila pirélipo? Echi riká nakiyáaká, ¿chu kabú echi riká isima? Ami we kanílima machiyá japi aní echi Biblia.
1. ¿Chúriká nakí Onorúami japi ta pirélipo?
Jeobá ko nakí japi ta we aʼlá pirélipo. Japalí niwali echi bacháwala pagótami, Adán alí Eva, echi ko iyali bilé weʼé we baʼóami Edén riwéami alí jéaneli: “Wiká kúuchisi jiti wiká pirélima echoná wichimóbachi, alí aʼlá tibusi echi weʼé alí aʼlá nulesi” (Génesis 1:28). Jeobá ko nakiyé japi wiká kúuchima, japi we simárika niwama omáana Wichimóbachi alí japi tibuma echi namuti jákami. Echi ko nakiyé japi suwaba pagótami ke siné nayuma alí sinibí pirélima.
Tákoré jipi ko ke ti echi riká piré, a Onorúami ko a bijí nakí japi echi riká nima (Isaías 46:10, 11). Echi ko nakí japi echi pagótami japi nijéwami ju, sinibí kanílika pirélima (leeri Apocalipsis 21:3, 4).
2. ¿Piri ta nokisáré jiti jipi jonsa kanila pirélipo?
Jeobá tamó niwali jiti ta kipubo echi raʼicháala, jiti ta echi machiboa alí ayénachó jiti echi nijéwipo (leeri Lucas 11:28). Onorúami ko nakí japi ta echi amígowala nipo, japi ta simabo “echi buwérili” japi echi tamó bineri, japi ta we galepo echi alí nijéwipo ne sulachí niraa (Deuteronomio 10:12; Salmo 25:14). Echi riká ti nokisáaká, ati kanílika pirélipo tákoré namuti jilírami ikiyé. Japalí ti nijewi japi Jeobá nulá tamó iʼwiri jiti aʼlá pirélipo alí ti machí japi ta noká we aʼlá ju.
AMINABI NATABO JAPI TA BINÉ
Inepo japi echi Biblia tamó ruyé chúsiá ta piré, ayénachó binepo japi Jeobá néwariwélitili japi we tamujé galé jiti niwali echi Wichimóbachi we baʼóami.
3. Jeobá ko nakí japi echi pagótami we kanílika pirélima
Inesi echi VIDEO alí raʼichasi jepuná jitra:
-
¿Chúsiá Jeobá we simárika niwali echi Wichimoba?
Leérisi Eclesiastés 3:11 alí raʼichasi jepuná jitra:
-
¿Piri tamó bineri jepuná Jeobá jitra?
4. Jeobá ko isima japi ma anili ne chokichí jonsa
Leérisi Salmo 37:11, 29 alí Isaías 55:11, alí raʼichasi jepuná jitra:
-
¿Chúriká ta machí japi Jeobá a isima japi ma anili ne chokichí jonsa?
Echi pagótami we cha riká wilali na kawí. Nalí japi riká bilé kalí japi najúa wilí a ti omero ku atewia, echi riká cho Onorúami ku atéwima na kawí alí ku iyama echi pagótami japi a binoy galé.
5. Ata nijéwisaká Jeobá we kanílipo
Machiyá chúsiá ta piré, tamó kaníliti. Inesi echi VIDEO alí raʼichasi jepuná jitra:
-
¿Chúriká iʼwírili Terumi machiyá chúsiá ta piré?
Leérisi Eclesiastés 12:13 alí raʼichasi jepuná jitra:
-
Jeobá ko isili wiká namuti tamujé jitra, ¿chúriká ti newa nokiboa japi ta matétara iyá?
JAPI NARI JARÉ PAGÓTAMI: “¿Chúsiá ti piré?”.
-
Mujé ru, ¿piri mi animea?
JAPI MI BINELI
Jeobá ko nakí japi ta we kanílika pirélipo sinibí jenaʼí Wichimóbachi. Nalí jipi we kanílika pirélipo ata nijéwisaká Jeobá ne sulachí jonsa.
Piri mi animea
-
Japalí Jeobá niwali Adán alí Eva, ¿chúriká nakili japi pirélima?
-
¿Chúriká ti machí japi a bijí ikimea japi Jeobá anili ne chokichí jonsa?
-
¿Piri mi iʼwírima jiti mi kanílika bitélima?
JITI MI CHE BINEMA
Ami binema chúsiá ta machí japi echi weʼé we baʼóami Edén riwéami a ne bichíwali nili.
“¿Achi ne bichíwali nili echi weʼé we baʼóami Edén riwéami?” (Echi Nawésami, 1 inárachi enero 2011)
Ami machimea chúsiá ta bichiwi japi echi Wichimóbachi ke siné suwábitami nima.
“¿Achi suwábitami nima echi Wichimóbachi?” (Oselí japi nirú echoná jw.org)
Biné japi aní echi Biblia chúsiá ta piré.
Iné japi bilé rijoi japi wiká namuti níwami nili ke kanila biteili.
a Biléala binelíwami binepo chúsiá jipi ko ke ti aʼlá piré.
