Adán alí Eva ke nijéwili Onorúami, jiti la tamujé ayénachó suwí, risoa nili alí ti ke sébali aʼlá nokáami ju [jepuná anéliwa pecado]. a Nalí ke sinibí echi riká nima jiti Jeobá tamó niyúbili jiti ma ke suwiboa alí checho ku sébali aʼlá nokáami nipo. ¿Chúriká isili Jeobá jiti tamó niyúbima? Echi ko júali Jesús jiti mukumea tamujé jitra. Japalí Jesús mukuli japi riká bilé rijoi japi sébali aʼlá isíami nili, echi ko nili japi riká natetia jiti ta niyúbipo (leeri Mateo 20:28). Jesús ko a oméroli sinibí bitelia jenaʼí Wichimóbachi, nalí echi ko mukuli tamujé jitra jiti ta oméripo pirea japi riká pireili Adán alí Eva. Japi isili néwariwélitili japi Jeobá alí echi, we tamujé galé. Jepuná binelíwami mi iʼwírima aminabi we natéami niraa inea japi isili Jesús mukuyá tamujé jitra.

1. ¿Chúriká tamó iʼwiri jipi jiti Jesús mukuli tamujé jitra?

Jiti ta ke sébali aʼlá nokáami ju, ati noká wiká namuti japi Jeobá ke galé. Nalí ati oméripo Onorúami amígowala niya ati riwésaká nokayá japi chati ju alí wikáwili tánisaká Jeobá néeka Jesús riwalá. Ayénachó ati iʼwérili nokisáaká jiti ma ke che nokiboa echi chati namuti (1 Juan 2:1). Echoná Biblia aní: “Jesucristo ne wabé galabé wachínaga oláami níili, chopi Binói echirigá mukuli tamujé tamí jiti, máputa chati sitíi oláami ju” (1 Pedro 3:18).

2. ¿Chúriká tamó iʼwírima pe aminana jiti Jesús mukuli tamujé jitra?

“Riosi júuli echi Bilepi Binói Ranala jenaʼí wichimóbachi, mapurigata ne sinibí niráa pirélabo, ata galá bichíisagá” (1 Juan 4:9). Adán jitra ati risoa nilia piré, nalí jiti Jesús ma mukuli tamujé jitra Jeobá ko isima japi ma mulipi ati we kanila pirélipo. Ati bichíwisaká japi isili Jesús mukuyá tamujé jitra, ¡ati oméripo we kanílika alí sinibí pirea echoná Wichimóbachi we baʼóachi! (Isaías 65:21-23).

 AMINABI NATABO JAPI TA BINÉ

3. Jiti Jesús mukuli a ti sébali aʼlá nokáami nipo alí ma ke che suwiboa

1. Adán ko sébali aʼlá isíami nili, nalí japalí ma ke nijéwili Onorúami, echi ko isili japi sinéami pagótami ke sébali aʼlá nokáami nima alí suwimea.

2. Jesús ko sébali aʼlá isíami nili, nalí echi ko a nijéwili Onorúami, jiti echi riká isili echi pagótami ko a omero sinibí pirea.

4. Echi Jesús mukúala a omeri iʼwiria sinéami echi pagótami

 5. Jeobá ko nijili echi Jesús jiti mukumea mi jitra

Echi japi Onorúami amígowala ju we natéami niraa iné japi Jeobá nijili Jesús echi jitra. Jiti mi machimea bilé ejemplo, leérisi Gálatas 2:20, TNM, alí raʼichasi jepuná jitra:

• ¿Chu iyiri raʼíchali japi anili Pablo néwariwéliti japi bichili japi Jesús mukuli echi jitra?

Japalí Adán ke nijéwili, isili japi sinéami echi kúchuwala ayénachó suwimea. Nalí Jeobá júali binoy nolá Jesús jenaʼí Wichimóbachi jiti mukumea mi jitra alí jiti echi riká mi omérima sinibí bitea.

Japalí mi leeri jepuná versículos natá chu níaliré Jeobá japalí ineli japi risoa olari echi binoy ranala. Leérisi Juan 19:1-7, 16-18, TNM, alí raʼichasi jepuná jitra:

• ¿Chumi nili machiyá japi nokali Jeobá alí Jesús mi jitra?

 JAPI MI BINELI

Jiti Jesús ma mukuli, Jeobá ko tamujé ku wikawi japi ta ke aʼlá noká, ayénachó ti oméripo sinibí pirea.

Piri mi animea

• ¿Chúsiá mukuli Jesús?

• ¿Chu isili Jesús natétimia jiti tamó niyúbimia?

• ¿Chúriká mi iʼwiri jiti Jesús ma mukuli mi jitra?