Japalí mukusaa bilé japi ta we galé ati we omona nili. Jiti bela echi Biblia ko aní japi echi mukuwáami tamujé sayérala ju (1 Corintios 15:26). Echoná binelíwami 27 mujé ko bineli japi Jeobá ko isima japi ma ke bilé pagótami mukumea. Nalí, ¿chu ikimea japi ma suwili ko? Jenaʼí ami binema japi Jeobá ko ku jawásima wiká millones pagótami japi suwili jiti sinibí kanílika pirélima. ¡A checho ku pirélima! ¿Achi bichíwali echi riká ikimea? ¿Kumi ku pirélima: ripá riwigachi o jenaʼí Wichimóbachi?

1. ¿Piri ma we inili isínala Jeobá?

Jeobá ko we inili ku jawásinalia echi pagótami japi ma suwili. Bilé rijoi Job riwéami, we bichíwili japi Onorúami sinibí echi newalama japalí mukusaa. Jiti bela jéaneli Onorúami: “Mujé tamí raʼíchima, alí nijé ko ku ni wilísima” (leeri Job 14:13-15).

2. ¿Chúriká ta machí japi checho ku pirélima japi ma suwili?

Japalí Jesús biteili jenaʼí Wichimóbachi, Onorúami iyali echi jiwérala jiti ku owíntima japi suwili. Jiti la Jesús ku owíntili bilé tiwé 12 bamíbami alí bilé mukí kunámami ranala (Marcos 5:41, 42; Lucas 7:12-15). Ayénachó japalí echi amígowala mukuli ku owíntili tákoré ma naó rawé tota boʼili mukuá. Ma raʼichasa Onorúami yúa, echi ko sinaka jéaneli: “¡Lásaro, wakiná machina!”. Alí “echi mapu mukúami níili ma ku machínali” (Juan 11:43, 44). ¡Echi Lázaro téemala alí amigos we kanilie jiti echi ko ma ku owínali!

3. ¿A checho ku pirélimiré echi japi mujé we galé?

Echi Biblia ko aní japi “auchecho ku oʼwíntama echi jaré suwíami” (Hechos 24:15). Echi pagótami japi Jesús ku owíntili ke simíali ripá riwigachi japalí suwili (Juan 3:13). Sinéami echi a we kanilie checho ku pirea jenaʼí Wichimóbachi. Japi riká ikili echalí, pe aminana Jesús ayénachó ku owíntima wiká millones pagótami jiti checho ku we kanílika pirélima jenaʼí Wichimóbachi japalí ma we simá rikáachi nisa. Jesús ko anili japi suwaba japi tota bití a checho ku pirélima, echi ko ju sinéami pagótami japi Onorúami a newalá alí japi tamujé ko ke machí (Juan 5:28, 29, TNM).

 AMINABI NATABO JAPI TA BINÉ

4. Jesús néwariwélitili japi a omero ku owintia echi suwíami

Che we aʼlá binepo japi isili Jesús japalí ku owíntili Lázaro. Leérisi Juan 11:14, 38-44 alí raʼichasi jepuná jitra:

• ¿Chúriká ti machí japi Lázaro ne bichíwali mukuli? (Inesi echi versículo 39).

• Lázaro ripá simílaká, ¿achi aʼlá nímili japi Jesús checho ku bayema jiti bitélima jenaʼí Wichimóbachi?

Inesi echi VIDEO.

5. ¡Wiká pagótami checho ku pirélima!

Leérisi Salmo 37:29 alí raʼichasi jepuná jitra:

• ¿Kumi pirélima echi wiká millones pagótami japi ku owínima?

Jesús ke bi owíntima echi pagótami japi Jeobá nijéwili, ayénachó jarecho wikabé pagótami. Leérisi Hechos 24:15 alí raʼichasi jepuná jitra:

• Japalí ku owínisa echi suwíami, ¿jépuká mi kanílisa nili checho ku inea?

• Echi Biblia aní japi ku jawásitami nima japi ma suwili, ¿chúriká iʼwírili jepuná Phelicity wénwala?

 JAPI MI BINELI

Echoná Biblia aní japi wiká millones pagótami a checho ku pirélima. Jeobá ko jiwérili iyali Jesús japi riká ku owíntima japi ma suwili jiti echi ko nakí japi checho ku pirélima.

Piri mi animea

• ¿Chúriká ta machí japi Jeobá alí Jesús we inili ku owíntinilia japi ma suwili?

• ¿Kumi pirélima echi wiká millones pagótami japi ku owínima: ripá riwigachi o jenaʼí kawichí? ¿Chúsiá echi riká mi nata?

• ¿Chúsiá mi bichiwi japi echi pagótami japi mujé galé a checho ku pirélima?