BINELÍWAMI 34

¿Chúriká néwariwélitipo Jeobá japi ta we galé echi?

ANERIA ECHONÁ

Japalí mi jonsa biné echi Biblia, ¿ami iné Onorúami japi riká mujé amígowala? ¿Achi mi kanílisa nili che aminabi we aʼlá amigo niya echi yúa? Echi riká mi níliaká alí mi we galéaká Jeobá, ami newalásaré japi echi ayénachó we mi galema alí sinibí mi tibuma. ¿Chúriká mi néwariwélitima japi mi we galé Jeobá?

1. ¿Chúriká ti néwariwéliti Jeobá japi ta we galé echi?

Japalí ti nijewi Jeobá, ata néwariwéliti japi ta we galé (leeri 1 Juan 5:3). Nalí echi ko ke bilé iʼwérili ané japi echi nijéwima. Echi ko nalí nakí japi ta aboi natabo achi ti nijéwipo o ke. ¿Chúsiá? Jiti echi ko nakí japi ta ne sulachí jonsa nijéwipo (Romanos 6:17). Nakí japi ta echi nijéwipo jiti ta galé alí ke ko iʼwérili niraa. Echoná secciones 3 alí 4 jepuná libro, binepo okuá namuti japi tamujé iʼwírima néwariwélitia japi ta we galé Jeobá: japalí ti noká japi echi galé alí japalí ti ke noká japi echi kichí.

2. ¿Chúsiá a jilí nímiré néwariwélitia Jeobá japi ta we galé?

“Wiká ju echi karú ikiwáami japi ikí echi japi nijéwami ju” (Salmo 34:19). Sinéami tamujé we ti jilí niraa nokayá japi aʼlá ju jiti ta ke sébali aʼlá nokáami ju. Nalí ke echi bi ju, ayénachó isini kaachi ke ti olá winomí, jarecho tamó cha olá alí ti ikí jarecho si namuti. Japalí ti ikí jepuná namuti, a jilí nímiré nijewia japi Jeobá aní. Nalí japalí mi iʼwérili isimí nijewia japi Jeobá mi tani, ami newa isimí japi mi we galé echi, tákoré we jilí ke. Ayénachó mi newa isimí japi mi ke riwénali Jeobá alí echi ko echi riká cho isima mi yúa, ke siné mi riwema (leeri Salmo 4:3).

AMINABI NATABO JAPI TA BINÉ

Ma inepo japi Jeobá ko we natéami niraa iné japi ta nijéwami nipo alí piri tamó iʼwírima sinibí nijéwami niya.

3. Japi anili Satanás ayénachó mi jitra anili

Echoná libro Job riwéami, aní japi Satanás we cha riká raʼíchili Job jitra, nalí ke echi bi jitra cha riká raʼíchili, ayénachó echi pagótami jitra japi nijéwinali Jeobá. Leérisi Job 1:1 alí 1:6-2:10, alí raʼichasi jepuná jitra:

Japi riká anili Satanás, ¿chúsiá Job nijéwili Jeobá? (Inesi Job 1:9-11).
¿Piri namuti aní Satanás sinéami pagótami jitra alí ayénachó mi jitra? (Inesi Job 2:4).

Leérisi Job 27:5b alí raʼichasi jepuná jitra:

¿Chúriká néwariwélitili Job japi ne bichíwali we galeli Jeobá?

Job ko sinibí nijéwami nili, echi riká néwariwélitili japi we galé Jeobá.

Japalí ta nijéwami ju ata néwariwéliti japi ta we galé Jeobá.

4. Kaníliti Jeobá sulala

Leérisi Proverbios 27:11 alí raʼichasi jepuná jitra:

¿Chu nili Jeobá japalí mi we aʼlá nátika isimí echi namuti alí mi nijewi? ¿Chúsiá?

5. Mujé ko a omérima sinibí nijewia Jeobá

Japalí ta we galé Jeobá ata raʼicha jarecho yúa echi jitra. Jiti ta we galé Jeobá, ata echi riká noká tákoré isini kaachi a we jilí ke. Inesi echi VIDEO alí raʼichasi jepuná jitra:

VIDEO: Ke majaka nimipo japi ta bichí (5:09)

¿Achi mi jilí niraa ruyea jarecho Jeobá jitra?
Japi riká machina echoná video, ¿piri isili Grayson jiti ke majaka ruyema japi bichí?

Ke me jilí ju nijewia Jeobá japalí ta galé japi echi galé alí japalí ta kichí japi echi kichí. Leérisi Salmo 97:10 alí raʼichasi jepuná jitra:

Japi mi ma bineli, ¿chu iyiri ju jaré namuti japi Jeobá galé? Alí, ¿chu iyiri ju echi namuti japi Jeobá kichí?
¿Chúriká mi isima jiti mi galema japi aʼláala ju alí mi kichima japi chati ju?

6. Nijewia Jeobá sinibí we aʼlá ju

Nijewia Jeobá sinibí we aʼlá ju. Leérisi Isaías 48:17, 18 alí raʼichasi jepuná jitra:

¿Achi mi mayé japi Jeobá we aʼlá machí japi chu iyiri namuti aʼlá ju japi mi isima? ¿Chúsiá mi echi riká aní?
Japalí mi jonsa biné Jeobá jitra alí echi Biblia, ¿chúriká mi iʼwírili?

JAPI ANÍ JARÉ PAGÓTAMI: “Onorúami ko ke natéami niraa iné japi ni isimí”.