BINELÍWAMI 35
Piri tamó iʼwírima jiti aʼlá nátika nokiboa
Sinéami tamujé natásaré piri ta nokiboa, jiti japi ta nokiboa tamó iʼwírima aʼlá pirelia alí achi ti Jeobá amígowala nipo o ke ma. Japi riká, ati natásaré kumi ta pirélipo, piri ta nochabo alí achi ti niwipo o ke ma. Ati we aʼlá nokisáaká a ti we kaníliami nipo alí ayénachó kanílitipo Jeobá.
1. ¿Chúriká mi iʼwírima echi Biblia jiti mi we aʼlá natama japi mi isima?
Kecho isimia bilé namuti, tani Jeobá japi mi iʼwírima alí aa echoná Bíbliachi piri aniyá Jeobá echi namuti jitra japi mi isínali (leeri Proverbios 2:3-6). Isini kaachi a mi riwimea piri namuti nulá Jeobá japi mi isísaré. Echi riká nísaká, ami nijéwisaré.
Nalí, ¿piri mi isima ke anisáaká echoná Biblia japi mi isísaré? Kiti siwé, Jeobá mi iʼwírima “jiti mi machimea chu iyiri buwérili mi simea” (Isaías 48:17). ¿Chúriká mi iʼwírima? Néeka echi principios japi nirú echoná Biblia. Echi principios jitra, ami aʼlá binema piri nata alí chu nili Jeobá. Ami machimea echi namuti japalí mi leeri echoná Biblia japi ikili chabé. We aʼlá machiyá japi Jeobá nata, tamó iʼwírima jiti nokiboa japi Jeobá galé.
2. Kecho isimia bilé namuti, ¿piri mi bachá natásaré?
Echi Biblia ko aní: “Japi we aʼlá nátami ju ko aʼlá nátika isimí” (Proverbios 14:15). Jepuná ko aniwáami ju japi kecho isimia bilé namuti bachá we aʼlá natásaré ibili niraa echi namuti japi isima. Jiti mi aʼlá machimea nárika isí jepuná: “¿Piri nata Jeobá jepuná namuti jitra? ¿Chu iyiri namuti nalí ni isisa kilí niraa ripima? ¿Chu nílima jarecho echi namuti jitra japi ni isima? Nalí wabé natéami ko ju, ¿achi kanílitima Jeobá?” (Deuteronomio 32:29).
Onorúami ko a omero tamujé anea japi chu iyiri namuti aʼlá ju alí chu iyiri ko ke. Japalí ti aʼlá machí echi nulalíwami alí echi principios alí ti nijewi, tamó nikuuri jiti echi conciencia aʼlá nochama. Nalí, ¿piri ju echi conciencia? Echi ko ju japalí tamujé nata alí machí japi bilé namuti aʼlá ju o ke aʼlá ju (Romanos 2:14, 15). Echi conciencia aʼlá binéritami nísaká japi riká aní echi Biblia, sinibí tamó iʼwírima jiti aʼlá nokiboa.
AMINABI NATABO JAPI TA BINÉ
Ma che we aʼlá binepo chúriká tamó iʼwiri echi conciencia alí japi aní echi Biblia japalí ta nokibóaré jaré namuti.
3. Isí japi riká aní echi Biblia
¿Chúriká tamó iʼwiri japi aní echi Biblia japalí ti nokibóaré jaré namuti? Inesi echi VIDEO alí raʼichasi jepuná jitra:
-
¿Piri riwé Jeobá japi ta nokiboa?
-
¿Chúsiá Jeobá riwé japi ta aboi natabo japi ta nokiboa?
-
¿Piri tamó iyali Jeobá jiti ta we aʼlá natabo japi ta nokiboa?
Ma inepo bilé principio bíblico, leérisi Efesios 5:15, 16. Alí raʼichasi chúriká ti sinibí “we yaa galabé [olabo] suwaba máputamo omero” japi riká...
-
... leeria echi Biblia sinibí rawé.
-
... we aʼlá kunala niya, wénwala alí we aʼlá kúchuwala.
-
... simiyá echoná napawíliwachi.
4. We aʼlá biné echi Biblia jiti mi aʼlá machimea piri mi isima
Japalí echi Biblia a aní japi chu iyiri namuti ke nokiboa, ati ke jilí nirabo nokayá echi namuti japi aʼlá ju. Nalí ke anisáaká, ¿piri mi isima? Inesi echi VIDEO alí raʼichasi jepuná jitra:
-
Japi riká machina echoná video, ¿piri isili echi hermana aʼlá namuti isimia japi Jeobá galé alí echi riká kilí niraa ripimia?
¿Chúsiá ti ke anésaré bilecho japi tamó anema japi ta nokiboa? Leérisi Hebreos 5:14 alí raʼichasi jepuná jitra:
-
Tákoré ti a omero anea bilecho japi tamó anema japi ta nokiboa, ¿chúsiá wabé aʼlá ju japi tamujé aboi natabo japi ta nokiboa?
-
¿Piri tamó iʼwírima jiti aʼlá natabo japi ta nokiboa?
Japi riká bilé pagótami mapa ineka machí kumi simea, echi conciencia ayénachó tamó iʼwiri machiyá piri namuti ta nokiboa.
5. Riwiwi japi riká nata jarecho
Jiti ta ke chopi iyiri ju, sinéami tamujé ke ti chopi iyiri namuti noká. ¿Chúriká ti newa nokiboa japi ta riwiwi japi riká nata jarecho? Ma inepo okuá ejemplos:
Ejemplo 1: Bilé hermana japi we kanili pantalón uchayá, simí biléana congregación japoná echi hermanas cha riká iné japi echi riká iyénima.
Leérisi Romanos 15:1 alí 1 Corintios 10:23, 24, alí raʼichasi jepuná jitra:
-
Japi riká aní jepuná versículos, ¿piri isísaré echi hermana? Alí mujé ru, ¿piri mi isima japalí bilé hermano o hermana cha riká iné bilé namuti japi mujé ko ke cha riká iné?
Ejemplo 2: Bilé hermano aʼlá machí japi echi Biblia aní japi ke chati ju taa bajisa alcohol, nalí echi ko nata japi ke bajima. Siné rawé simí jarecho hermanos yúa alí ritiwá japi a bají alcohol.
Leérisi Eclesiastés 7:16 alí Romanos 14:1, 10, TNM, alí raʼichasi jepuná jitra:
-
Japi riká aní jepuná versículos, ¿piri isísaré echi hermano? Alí mujé ru, ¿piri mi isima japalí bilé hermano o hermana isisa bilé namuti japi mujé cha riká iné?
¿Piri mi isísaré jiti mi we aʼlá natama japi mi isima?
1. Iʼwírili tani Jeobá jiti mi machimea piri mi isima (Santiago 1:5).
2. Aa echoná Biblia alí jaréana publicaciones jiti mi machimea piri nata Jeobá. Ayénachó nari jarecho hermanos japi we machíami ju.
3. Natá achi mi kilí niraa ripima echi namuti jitra japi mi isima alí chu nílima jarecho echi riká mi isisa.
JAPI ANÍ JARÉ PAGÓTAMI: “Mujé binoy isísaré japi riká mi nakí. ¡Ke natéami ju japi jarecho nata!”.
-
¿Chúsiá ti natéami niraa inésaré japi chu nili Jeobá alí japi nili jarecho?
JAPI MI BINELI
Ati aʼlá namuti noká japalí ti bachá aʼlá biné piri nata Jeobá echi namuti jitra alí japalí ti nata achi echi namuti japi ta nokiboa kanílitima jarecho o cha nílitima.
Piri mi animea
-
¿Piri mi iʼwírima jiti mi isima japi Jeobá galé?
-
¿Piri mi isísaré jiti echi conciencia mi anema japi aʼlá ju alí japi ke aʼlá ju?
-
¿Chúriká mi newa isima japi mi natéami niraa iné japi riká nata jarecho?
JITI MI CHE BINEMA
Jiti japi mi isima mi iʼwírima aminabi Jeobá amígowala niya, ¿piri mi isísaré?
“Isí echi namuti japi Onorúami galé” (Echi Nawésami, 15 inárachi abril 2011)
Ami machimea chúriká tamó busuré iyá Jeobá.
Jeobá ko iʼwiri echi puéblowala jiti machimea japi nokimea 9:50
Ami machimea piri iʼwírili bilé rijoi jiti aʼlá nátika isima bilé namuti we natéami.
Che we aʼlá biné piri mi iʼwírima jiti mi kanílitima Jeobá japalí echi Biblia ke aní japi mi isísaré.
