BINELÍWAMI 38
We natéami niraa inepo japi Onorúami tamó iwítili
Tákoré nirú chati namuti, a nirú jarecho wiká namuti we baʼóami japi isimí japi ta kanila pirélipo. ¿Chúriká ti newa nokiboa japi ta matétara iyá Jeobá jiti tamó iwítili? Alí, ¿chúsiá we natéami ju japi ta matétara iyabo?
1. ¿Chúsiá ti we natéami niraa inésaré japi ta piré?
Ati we natéami niraa inésaré japi ta piré, jiti Jeobá “isili iwitia japi piré” alí echi isili niwayá suwaba japi ikí nirú (Salmo 36:9). “Echi Binói ju mapu siʼnéami tamujé tamí ʼya máputa pirélabo [...] ayénachó máputa galá iwipo. [...] Tamujé tamí ʼya suwaba namuti” (Hechos 17:25, 28). Jeobá ju japi nijí suwaba japi ta newalé jiti nakí japi kanila pirélipo (leeri Hechos 14:17).
2. ¿Chúriká ti newa nokiboa japi ta natéami niraa iné japi Onorúami tamó iwítili?
Japalí mi kulí ocheria asali pachana ropachí, Jeobá ko ma mi we natéami niraa ineli. Bilé rijoi we nijéwami David riwéami, jériká aneli Onorúami: “Mujé ko tamí riwali ke ni cho bijí aʼlá ochériachi” (Salmo 139:16). Jeobá ko we natéami niraa mi iné (leeri Mateo 10:29-31). Echi ko we risoa nílima japalí bilé bilecho miʼasa o binoy miʼlisáaká (Éxodo 20:13). a Ayénachó we omónima japalí tamujé ke aboi tibuka nokisaa alí japalí ti ke tibusa jarecho. Jiti la, japalí ti aboi tibuka noká alí jarecho si, ata néwariwéliti japi ta we natéami niraa iné japi Onorúami tamó iwítili.
AMINABI NATABO JAPI TA BINÉ
Ma inepo jaré namuti japi chúriká newa nokiboa japi ta we natéami niraa iné japi Onorúami tamó iwítili.
3. We aʼlá tibú mujé ripokala
Echi cristianos japi ma aneli Jeobá japi sinibí nijéwima, sinibí we aʼlá tibuka noká japi riká Jeobá nakí. Ma nijili echi ripokala japi riká bilé sacrificio, jiti la we aʼlá tibuka nokisáré. Leérisi Romanos 12:1, 2 alí raʼichasi jepuná jitra:
-
¿Chúsiá mi tibúsaré mujé ripokala?
-
Alí, ¿chúriká mi isísaré?
4. Aʼlá binoy tibuka isí alí jarecho si
Echi Biblia tamó busuré iyá jiti ta aʼlá aboi tibupo alí echi riká ke risoa ikiboa. Inesi echi VIDEO alí natasi chúriká timí sinibí aʼlá tibuka nokiboa.
Leérisi Proverbios 22:3 alí raʼichasi chúriká timí tibuka nokiboa...
-
... echoná bitichí.
-
... echoná nóchali.
-
... japalí mi riʼé.
-
... japalí mi troca ulichia inárisa o echoná mi asá inárisa.
5. We mi natéami niraa inésaré echi taa muchi japi kulí ocheri pachana ropachí
David we simárika raʼíchika anili japi Jeobá we natéami niraa iné japi ta piré alí echi taa muchi japi kulí ocheri pachana ropachí. Leérisi Salmo 139:13-17 alí raʼichasi jepuná jitra:
-
Jeobá ko, ¿chu kabú jonsa ma we natéami niraa iné japi ta piré: japalí ti pachana ropachí boʼí o japalí ti ma nawasa?
Echi nulalíwami japi Jeobá iyali echi israelitas, anili japi tibúsaré echi mukí ropéami alí echi taa japi pachana ropachí boʼí. Leérisi Éxodo 21:22, 23 alí raʼichasi jepuná jitra:
-
¿Piri nátili Jeobá japalí bilé pagótami miʼlisá echi taa pachana ropachí boʼíami tákoré ke nakili echi riká isiá?
-
Alí, ¿chu nílima Jeobá japalí bilé binoy nátika echi riká isimí? b
-
Mujé ru, ¿chúriká mi iné japi Jeobá nata?
Tákoré bilé mukí we natéami niraa iné japi Onorúami iwítili, nalí japalí ikisaa namuti we jilírami, isini kaachi a natámiré japi aʼlá ju bochokasia. Leérisi Isaías 41:10 alí raʼichasi jepuná jitra:
-
Japalí bilé mukí iʼwérili anésiwa japi bochokásima, ¿jépuká iʼwírili tánisaré? Alí, ¿chúsiá?
JAPI ANÍ JARÉ PAGÓTAMI: “Ibili mukí machí achi bochokásima o ke, jiti binoy ripokala ju”.
-
¿Chúriká mi machí japi Jeobá ko we natéami niraa iné echi mukí ropéami alí echi taa muchi japi pachana ropachí boʼí?
JAPI MI BINELI
Jeobá tamujé iwítili, jiti la echi Biblia aní japi ta aʼlá tibuka nokisáré alí japi tibúsaré jarecho.
Piri mi animea
-
¿Chúriká ta machí japi Jeobá ko we natéami niraa iné japi ta piré?
-
¿Chu nili Jeobá japalí bilé binoy miʼlisá o miʼlisá bilecho?
-
¿Chúsiá mi we natéami niraa iné japi Jeobá isili tamujé iwitia?
JITI MI CHE BINEMA
¿Chúriká ti matétara iyabo Jeobá jiti tamó iwítili?
¿Achi wikáwima Jeobá bilé mukí japi ma chabé bochokásili?
“¿Piri aní echi Biblia echi bochokásiliami jitra?” (Oselí japi nirú echoná jw.org)
Jiti Onorúami tamó iwítili, ¿piri nata echi namuti jitra japi riká ti noká riʼea?
Biné piri busuréliami mi riwimea echoná Biblia japalí bilé binoy miʼlinálisa.
a Jeobá ko we galé echi japi we risoa nilia muchuwi (Salmo 34:18). Japalí bilé binoy miʼlinali, Jeobá ko we aʼlá machí japi chu nili alí piri jitra echi riká isínali alí echi ko iʼwírinali. Ami machimea japi we aʼlá ju echi busuréliami japi Biblia aní, leérika echi artículo “¿Achi tamí iʼwírima japi aní echi Biblia japalí ni ma ke bitélinali alí ni binoy miʼlinali?”, echi ko chukú japoná aní “Jiti mi che binema” jenaʼí binelíwami.
b Echi japi aboi nátika bochokásili chabé, ke omona nílisaré echi jitra japi nokali, jiti Jeobá a ku wikáwima. Ami che machináliaká echi jitra, leeri echi artículo “¿Piri aní echi Biblia echi bochokásiliami jitra?”, jepuná ko chukú japoná aní “Jiti mi che binema” jenaʼí binelíwami.
