BINELÍWAMI 39
Piri aní Jeobá echi la jitra
Echi la ko we natéami ju jiti ta echi jitra piré. Jiti Onorúami tamó niwali, echi bi ju japi tamó anésaré japi chúriká néepo echi la. ¿Piri aní Jeobá echi la jitra? ¿Achi ti okésaré echi la o soka roʼésaré? ¿Piri mi iʼwírima jiti mi aʼlá nátika isima?
1. ¿Piri aní Jeobá echi la jitra?
Chabé, Jeobá ko aneli echi puéblowala: “Echi la jitra pirea ko sinéami” (Levítico 17:14). Jeobá ju japi tamó iwítili. Alí echi ko we natéami niraa iné echi la jiti ta echi jitra piré.
2. ¿Piri ke nakí Onorúami japi nokiboa echi la jitra?
Kecho nirúachi echi congregación cristiana, Jeobá ko aneli japi echi nijéwami ju japi ke okésaré echi la (leeri Génesis 9:4 alí Levítico 17:10). Japalí ma niruili echi congregación Jeobá checho echi riká aneli. Jaré apóstoles alí ancianos japi aʼlá nisériami nili echalí, jériká nuleli echi cristianos: “Kiti néesi [...] echi la” (leeri Hechos 15:28, 29, TNM).
¿Chúriká nijéwipo japi aní echi texto? Natá jepuná: echi doctor mi anésaká japi mi riwésaré bajía alcohol. ¿Achi mi soka roʼema echi alcohol? Ke tasi. Echi riká cho ju japi Jeobá nulá japi ke kopoa echi la, echi sapá japi léami ju alí japi ke cho bajibo. Ayénachó japi ta ke soka roʼebo echi la japalí ta nayusa.
Nalí, ¿achi aʼlá ju japi ta néepo echi la japi riká ówiliami? Ke, tamujé ko ke naré echi tratamientos japi olá echi la jiti ta nijéwinali japi Jeobá nulá. Japi riká ke ti soka roʼé echi la alí ke cho echi naó namuti japi olá: glóbulos rojos, glóbulos blancos, plaquetas alí plasma. Nalí isini kaachi ati ke me aʼlá machibóoré achi aʼlá ju japi narepo bilé tratamiento, jiti jaré tratamientos olá fracciones echi naó namuti jitra japi olá echi la. Ayénachó, isini kaachi echi doctores nee echi nayúami lalá echi a ku ówimia. Ma binesa suwaba echi namuti, ibili niraa natásaré piri isima (Gálatas 6:5). a
AMINABI NATABO JAPI TA BINÉ
Ma binepo piri ta bachá natásaré jiti ta machiboa chu iyiri tratamiento narepo.
3. Isí japi Jeobá galé japalí mi nayusa
Jiti mi nijéwima japi aní Jeobá echi la jitra, ¿piri namuti mi iʼwírima jiti mi we aʼlá natama? Inesi echi VIDEO alí miná ko raʼichasi chúsiá we natéami ju japi ta nokiboa japi riká aní jenaʼí rilé:
-
Iʼwírili tani Jeobá (Santiago 1:5).
-
Aa echi principios echi namuti jitra japi mi machinali alí iné chúriká mi isima nijewia (Proverbios 13:16).
-
Aa chu iyiri tratamientos alí ówili nirú japoná mi bité.
-
Iné chu iyiri ju japi mi ke narema.
-
We aʼlá nátika isí jiti mi kanila ripima (Hechos 24:16). b
-
Ayénachó ami natásaré japi ke bilé mi anésaré japi mi isima, japi riká mujé kunala, upila, bilé anciano, ke cho echi japi mi bineri Biblia jitra (Romanos 14:12).
-
Osá japi riká mi nátili isimia.
4. Tamujé testigo Jeobá ati amí we aʼlá procedimientos alí ówili jiti ku saʼwiboa
Tákoré ti ke naré echi la jiti ta nijéwinali japi Onorúami nulá, nalí ati naré jarecho tratamientos japi we aʼlá ju. Inesi echi VIDEO.
Leérisi Tito 3:2 alí raʼichasi jepuná jitra:
-
¿Chúsiá ti aʼlá raʼichásaré alí riwíwika echi doctores yúa?
|
Japi ta ke naré |
Ibili machí japi isima |
|---|---|
|
A. Plasma sanguíneo |
Fracciones de plasma |
|
B. Glóbulos blancos |
Fracciones de glóbulos blancos |
|
C. Plaquetas |
Fracciones de plaquetas |
|
D. Glóbulos rojos |
Fracciones de glóbulos rojos |
5. ¿Achi aʼlá ju japi narepo echi fracciones sanguíneas?
Echi la ko olá naó namuti we natéami japi riká glóbulos rojos, glóbulos blancos, plaquetas alí plasma. Alí ibili niraa echi ko olá jarecho namuti, japi riwéami ju fracciones sanguíneas. c Jaré echi fracciones jitra niwáliwa ówili jiti ówima hemorragias alí jarecho si nayulí.
Ibili cristiano binoy natásaré achi narema echi fracciones sanguíneas. A keʼré japi jaré ke nakí japi echi doctores ówima néeka echi fracciones sanguíneas nalí jarecho ko a nakí.
Ma mi aʼlá natásaká japi mi isima, nárika isí:
-
¿Chúriká ni ruyema echi doctor chúsiá ni a naré jaré fracciones sanguíneas alí jarecho ko ke?
JAPI NARI JARÉ PAGÓTAMI: “Echi la iʼwiri jiti ta ke suwiboa, nalí ¿chúsiá ke aʼlá nima ba japi narepo echi la?”.
-
Mujé, ¿piri aní?
JAPI MI BINELI
Jeobá ko ke nakí japi ta soka roʼepo echi la, ke cho japi okebo alí jarecho si namuti.
Piri mi animea
-
¿Chúsiá Jeobá we natéami niraa iné echi la?
-
¿Chúriká ti machí japi Jeobá ko ke nakí japi ta soka roʼepo echi la?
-
¿Piri namuti mi iʼwírima machiyá achi mi narema jaré tratamientos?
JITI MI CHE BINEMA
Jiti mi machimea achi mi narema bilé procedimiento japi nee mujé níwala la, ¿piri mi namuti bachá machisáré?
“Echi leériami ko machinali” (Echi Nawésami, 15 inárachi octubre 2000)
Jiti mi machimea achi mi narema echi fracciones sanguíneas, ¿piri mi namuti bachá machisáré?
“Echi leériami ko machinali” (Echi Nawésami, 15 inárachi junio 2004)
¿Chúsiá bilé doctor a we aʼlá niraa ineli japi Onorúami nulá echi la jitra?
Iné chúriká echi ancianos japi nocha echoná Comités de Enlace con los Hospitales iʼwiri echi hermanos.
a Leeri echi binelíwami 35, “Piri tamó iʼwírima jiti aʼlá nátika nokiboa”.
b Iné echi punto 5, “¿Achi aʼlá ju japi narepo echi fracciones sanguíneas?”, echi nota 3, “Procedimientos japoná néeliwa echi la”.
c Jaré doctores ko aní japi echi naó namuti japi olá echi la ma fracciones ju. Jiti la, mujé binoy ruyésaré echi doctor chúsiá mi ke naré echi la alí echi naó namuti japi olá echi la, japi riká glóbulos rojos, glóbulos blancos, plaquetas alí plasma.
