Bilé iyela ko iʼwérili isimí jiti echi ranala aʼlárika simea echoná escuela. Echi ko aʼlá iné achi ma úbali alí japi echi napacha a wichórami ju. Jepuná iʼwiri jiti ke me nayuma alí néwariwéliti japi echi ko we galé echi ranala. Jeobá tamujé Onolá ju alí tamó galé, echi ko ayénachó nakí japi ta biʼwíami nipo, tamó ripokala alí japi ta nata. We aʼlá ju japi ta biʼwíami nipo jiti tamó iʼwiri aʼlá pirea alí ayénachó jiti echi pagótami we aʼlá raʼichama Jeobá jitra.

1. ¿Chúriká nokiboa jiti sinibí biʼwíami nipo?

Jeobá ko tamujé ané: “Ne galabé oláami nílasi [o santos]” (1 Pedro 1:16). Jiti santos nipo, ati biʼwíami nísaré tamujé ripokala alí suwaba japi ta noká. Ati néwariwéliti japi ta biʼwíami ju japalí ti sinibí uba, ati uchá napacha japi wichórami ju, japalí ti aʼlárika biʼwá echi troca alí pichika riwé tamujé bitélachi. Ayénachó ti aʼlá biʼwá japoná ti napawí. Ata biʼwíami nísaká, a keʼré japi jarecho we aʼlá raʼichama Jeobá jitra (2 Corintios 6:3, 4).

2. ¿Piri namuti ke nokisáré jiti biʼwíami nipo?

Echi Biblia tamó ané japi “ketasi galá ju máputa chati sitíi olabo, nibilé cho galá ju máputa chati sitíi ʼnatabo” (2 Corintios 7:1). Jiti la ti iʼwérili noká ke nokayá echi namuti japi nayunti tamujé ripokala. Ayénachó ti iʼwérili noká ke natia echi chati namuti, jiti ta nakí japi Onorúami sinibí kanílima tamujé yúa (Salmo 104:34). Alí ati cho iʼwérili noká ke chati sitíi raʼichia (leeri Colosenses 3:8).

¿Piri si jarecho namuti ke nokisáré jiti biʼwíami nipo tamujé ripokala alí japi ta nata? Ke néepo echi namuti japi tamó nayunti, japi riká ke ti pewásaré tabaco, ke ti néesaré drogas alí jarecho si namuti. Ayénachó ke ti néesaré echi ówili japi echi doctor ke risensia tamó iyali japi néepo. Japalí ta ke nee echi namuti, ata tibú tamó ripokala alí natéami niraa iné japi Onorúami tamó iwítili. Ayénachó, ata biʼwíami ju japalí ti iʼwérili noká ke nokayá echi chati namuti japi riká masturbación alí pornografía (Salmo 119:37; Efesios 5:5). A we jilí nímiré riwea echi chati namuti, nalí Jeobá tamó iʼwírima (leeri Isaías 41:13).

 AMINABI NATABO JAPI TA BINÉ

3. Jeobá ko we natéami niraa iné japi ta biʼwíami nipo

Japalí ti leeri echi nulalíwami japi Jeobá iyali echi israelitas, ati machí japi Jeobá ko we natéami niraa iné japi ta biʼwíami nipo. Leérisi Éxodo 19:10 alí 30:17-19, alí raʼichasi jepuná jitra:

• Japi riká aní jepuná versículos, ¿chúriká ti machí japi Jeobá ko we natéami niraa iné japi ta biʼwíami nipo?

• ¿Chúriká ti nokiboa jiti sinibí biʼwíami nipo?

Jiti biʼwíami nipo ati iʼwérili nokisáré. Alí sinéami ta omero echi riká niya tákoré ti risóati ke o wiká namuti níwami ke. Inesi echi VIDEO alí raʼichasi jepuná jitra:

• Echi pagótami japi ta nawesi inésaká japi echi namuti japi ta olá biʼwíami ju, ¿achi iʼwírimiré jiti aʼlá raʼichama Jeobá jitra alí tamujé? ¿Chúsiá?

4. Riwé isiá japi chati ju

Ami péwiami nísaká o néeaká echi drogas, ami machiyéeré japi we jilí ju riwea echi namuti. Nalí ami riwema echi riká isiá, ami natásaká piri mi ikimea echi riká mi isísaká. Leérisi Mateo 22:37-39 alí raʼichasi japi chúriká pewia tabaco alí echi drogas isimí...

• ... japi bilé riwema Jeobá amígowala niya.

• ... japi echi téemala alí jarecho si, ke kanílika pirélima.

Natá piri mi isísaré jiti mi riwema isiá japi chati ju. a Inesi echi VIDEO.

Leérisi Filipenses 4:13, TNM, alí raʼichasi jepuná jitra:

• ¿Achi mi mayé japi raʼichia Onorúami yúa, binea echi Biblia alí simiyá napawíliwachi mi iʼwírima jiti mi riwema isiá japi chati ju? ¿Chúsiá echi riká mi nata?

 5. Iʼwérili isí jiti mi ke isima alí ke natama japi chati ju

Leérisi Colosenses 3:5 alí raʼichasi jepuná jitra:

• ¿Chúriká ti machí japi Jeobá we chijuni echi pornografía, sextear alí masturbación?

• ¿Achi mi mayé japi aʼlá ju japi Jeobá tamó anema chu iyiri namuti ke nokiboa? ¿Chúsiá?

Iné piri mi isísaré jiti mi ke natama japi chati ju. Inesi echi VIDEO.

Jesús ko néeli bilé ejemplo tamujé binérimia japi chúriká ti nokisáré jiti biʼwíami nipo. Leérisi Mateo 5:29, 30, TNM, alí raʼichasi jepuná jitra:

• Jesús ko ke ruyá anili japi ta aboi niraa risoa olabo, echi ko nalí ruyá anili japi ta nokisáré jaré namuti jiti ma ke natabo japi chati ju. ¿Piri namuti ata iʼwérili nokisáré jiti ke natabo japi chati ju? b

Ami ma iʼwérili isíaká ke natia japi chati ju, ami newalásaré japi Jeobá ko we natéami niraa iné japi riká mi isimí. Leérisi Salmo 103:13, 14 alí raʼichasi jepuná jitra:

• Ami we jilí niráaká riwea echi chati namuti, ¿achi mi mayé japi jepuná versículo mi iʼwérili iyama jiti mi ke siwema? ¿Chúsiá?

 JAPI MI BINELI

Ati kanílitipo Jeobá ati biʼwíami nísaká tamujé ripokala, japi ta nata alí ati aʼlá nokisáaká.

Piri mi animea

• ¿Chúsiá we natéami ju japi ta biʼwíami nipo?

• ¿Piri ta nokisáré jiti biʼwíami nipo?

• ¿Piri ta nokisáré jiti japi ta noká alí japi ta nata sinibí biʼwíami nima?