BINELÍWAMI 43
¿Piri aní echi Biblia echi alcohol jitra?
Omáana Wichimóbachi echi pagótami suwinárika nata echi alcohol jitra. Jaré ko isini kaachi bají echi amigos yúa. Jarecho ko ke tasi bají. Alí a nirú pagótami japi we rikuka bají. Nalí, ¿piri aní echi Biblia echi alcohol jitra?
1. ¿Achi we chati ju bajíliwa alcohol?
Echi Biblia ke aní japi chati ju bajíliwa alcohol. Nalí echoná aní japi echi “vino [ju] japi kaníliti echi pagótami sulala”, echi ayénachó ju japi Onorúami chiliweli echi pagótami (Salmo 104:14, 15). Ayénachó echi Biblia ruyé japi jaré pagótami we nijéwami, isini kaachi bajili vino (1 Timoteo 5:23).
2. ¿Chu iyiri busuré iyá echi Biblia echi japi nata bajimia alcohol?
Jeobá ko ke bi aní japi chati ju echi rikúliami, ayénachó aní japi chati ju waʼlú bajíliwa (Gálatas 5:21, TNM). Echi Biblia ko aní: “Kiti yúa napawí echi japi waʼlú bají vino” (Proverbios 23:20). Jiti bela, ati bajínalaká alcohol, bineli asaa o jarecho yúa, ke ti siné waʼlú bajísaré japi yena ko ti ma rikú alí ma ke aʼlá nata alí ke machí japi ta noká. Ayénachó ke ti waʼlú bajísaré jiti ke nayupo. Ati rikúaká pe taa bajisa, ke ti bajísaré.
3. ¿Chúriká ta newa noká japi ta riwiwi japi jarecho nata?
Ibili tamujé ati aboi natásaré achi ta bajibo alcohol o ke ma. Ke ti cha riká raʼichásaré echi jitra japi pe taa bají alcohol. Ayénachó ke ti iʼwérili anésaré bilé japi bajísaré, ma binoy anisáaká japi ke bajima (Romanos 14:10). Alí ke ti bají ata machisáaká japi jarecho cha riká natama (leeri Romanos 14:21). Tamujé japi riká cristianos ati iʼwérili noká bachá natia japi newalé jarecho, ke ko japi tamujé aboi nakí (leeri 1 Corintios 10:23, 24).
AMINABI NATABO JAPI TA BINÉ
Ma inepo jaré busuréliami japi nirú echoná Biblia japi mi iʼwírima aʼlá natia achi mi bajima alcohol o ke ma, alí chu chulú mi bajima. Ayénachó inepo piri mi isísaré ami riwénalaká bajía.
4. Natá achi mi bajima o ke
¿Piri nátali Jesús echi alcohol jitra? Jiti ta machiboa, ma inepo echi bachá milagro japi niwali. Leérisi Juan 2:1-11 alí raʼichasi jepuná jitra:
-
Japi riká aní echi versículos, ¿chúriká ineli Jesús echi alcohol alí echi japi bají?
-
Japi riká Jesús ke cha riká ineli bajía alcohol, ¿piri natásaré bilé cristiano japalí iné bilé japi a bají?
Tákoré ke chati ju japi bilé cristiano bajima alcohol, echi ko ke aniwáami japi sinibí aʼlá ju japi bajima. Leérisi Proverbios 22:3 alí inesi achi aʼlá ju japi bilé bajima japalí...
-
... ulinama echi troca o waʼlú máquina.
-
... mukí ropéami nisa.
-
... echi doctor anesa japi ke bajísaré.
-
... we jilí niraa riwea bajía.
-
... echi ko bité japoná echi gobierno aní japi ke bajísaré alcohol.
-
... echi yúa atí bilé japi we bajíami nili alí echi ko ma ke bajínali.
¿Achi mi nijísaré alcohol japalí nirúlisa bilé boda o japalí timí napawí téemala yúa o amigos si? Jiti mi machimea piri mi newalásaré, inesi echi VIDEO.
Leérisi Romanos 13:13 alí 1 Corintios 10:31, 32. Ma leérisa ibili texto raʼichasi jepuná jitra:
-
¿Chúriká mi iʼwírima jepuná texto jiti mi isima japi aʼlá ju alí mi kanílitima Jeobá?
Ibili cristiano aboi natásaré achi bajima alcohol o ke. Isini kaachi bilé cristiano a natámiré japi a bajima alí isini ko ke.
5. We aʼlá natá chu chulú mi bajima
Jeobá ko ke cha riká iné japi ta bajibo alcohol, nalí ami bajínalaká, mujé ko newalásaré japi Jeobá ke nakí japi ta rikuka bajibo. ¿Chúsiá? Leérisi Oseas 4:11, 18 alí raʼichasi jepuná jitra:
-
¿Piri ikiméeré japalí bilé pagótami waʼlú bají?
¿Piri tamó iʼwírima jiti ke waʼlú bajibo? Ati we aʼlá machisáré chúriká ti ju ibili niraa tamujé alí chu chulú ti omero bajía jiti ke rikupo. Leérisi Proverbios 11:2 alí raʼichasi jepuná jitra:
-
¿Chúsiá we natéami ju japi mi bachá we aʼlá natama chu chulú mi bajima?
6. Piri mi iʼwírima ke rikuka bajía
Iné piri iʼwírili bilé rijoi jiti riwema bajía. Inesi echi VIDEO alí raʼichasi jepuná jitra:
-
Jiti we bajíami nili, ¿chúriká nili Dimitri?
-
¿Achi sapú o sinepi riweli bajía?
-
¿Piri iʼwírili jiti omérima riwea bajía?
Leérisi 1 Corintios 6:10, 11, TNM, alí raʼichasi jepuná jitra:
-
¿Achi we chati ju rikúsiwa? ¿Chúsiá?
-
¿Chúriká ti machí japi bilé japi we bajíami ju a omérima riwea?
Leérisi Mateo 5:30, TNM, alí raʼichasi jepuná jitra:
-
Japalí Jesús anili japi ripuna pabo tamujé sikala, echi ko ruyá anili japi ta iʼwérili nokisáré nijéwimia Jeobá. Mujé ami we jilí niráaká riwea bajía, ¿piri mi isísaré? a
Leérisi 1 Corintios 15:33 alí raʼichasi jepuná jitra:
-
¿Piri ikimea ami yúa napawísaká japi waʼlú bají?
JAPI NARI JARÉ PAGÓTAMI: “¿Achi we chati ju bajíliwa?”.
-
Mujé, ¿piri mi animea?
JAPI MI BINELI
Jeobá ko chiliweli alcohol echi pagótami jiti kanílima, nalí echi ko ke nakí japi rikuka bajima alí japi waʼlú bajima.
Piri mi animea
-
¿Piri aní echi Biblia echi alcohol jitra?
-
¿Piri ta ikibóaré ata waʼlú bajísaká?
-
¿Chúriká ta newa noká japi ta riwiwi japi nata jarecho echi alcohol jitra?
JITI MI CHE BINEMA
¿Piri machisáré echi remalí natásaká bajimia?
Ami machimea piri namuti mi iʼwírima jiti mi omérima riwea bajía.
“Chúriká mi riwema bajía” (Echi Nawésami, 1 inárachi enero 2010)
¿Achi aʼlá ju japi echi cristianos niwama “brindis”?
“Echi leériami ko machinali” (Echi Nawésami, 15 inárachi febrero 2007)
Leeri chúriká bilé rijoi riweli bajía, echoná biografía “We ni bajíami ke”.
“Binesa echi Biblia jipi ko we kaníliami ju” (Echi Nawésami, 1 inárachi mayo 2012)
a Echi pagótami japi we bajíami ju newalé japi iʼwíritami nima. Echi doctores aní japi echi pagótami japi we bajíami nili chabé, ma ke siné ku bajísaré.
