BINELÍWAMI 47

¿Achi ma aʼlá ju japi mi pakoma?

ANERIA ECHONÁ

Jiti mi ma bineli japi aní echi Biblia, mujé ko ma machí wiká namuti Jeobá jitra. Ayénachó ami ma riwéliré isiá jaré namuti chati, isimia japi riká mi bineli. Nalí a nirúiré bilé namuti japi isimí japi mi ke sapú katúwima Jeobá yúa alí pakoma. Jena binelíwami ruyé jaré namuti we jilírami japi ikili jaré binéami kecho pakoa, nalí ¿chúriká nokali jiti omérima pakoa alí piri mi omeri isiá mujé ayénachó?

1. ¿Achi mi suwaba machisáré japi aní echi Biblia jiti mi pakoma?

Jiti mi omérima pakoa, mujé ko “galá [machisáré] echi ne Bichíwali” (1 Timoteo 2:4). Nalí jepuná ko ke aniwáami ju japi mi kecho pakoa suwaba machisáré japi mi nari echi pagótami echi Biblia jitra. Echi cristianos japi ma wiká bamíali jonsa pakótami ju ayénachó a bijí aminabi binésimi (Colosenses 1:9, 10). Nalí, ami machisáré echi namuti we natéami japi aní echi Biblia. Echi ancianos echoná congregación mi iʼwírima machiyá achi mi ma aʼlá inamia japi aní echi Biblia.

2. ¿Piri mi isísaré kecho pakoa?

Echoná Biblia aní: “Ku roʼwisi Riosi yuwa” (leeri Hechos 3:19). Alí echi riká mi isísaré kecho pakoa. Nalí, ¿piri aniwáami ju “ku roʼwisi”? Japi mujé we omona nílima echi chati namuti jitra japi mi isili alí japi mi wikáwili tánima Jeobá. Ayénachó japi mi iʼwérili isima ma ke chati namuti isiá, nalí isiá japi Jeobá galé. Ayénachó aniwáami ju japi mujé ke riwésaré simiyá echoná napawíliwachi alí nawesia echi congregación yúa japi riká bilé publicador kecho pakótami.

3. ¿Chúsiá mi ke majásaré pakoa?

Jaré ko majaa nili pakoa jiti nata japi ke omérima nokayá japi Jeobá nulá. A bichíwali ju japi isini kaachi mujé isima namuti japi ke aʼlá ju, japi riká nokali echi mukí alí rijoi we nijéwami japi ruyé echi Biblia. Nalí ami newalásaré japi Jeobá ko ke buwé japi ta sébali aʼlá nokáami nipo (leeri Salmo 103:13, 14). Echi ko we kanílima ami iʼwérili isísaká aʼlá isiá. Ayénachó Jeobá mi iʼwírima. Jiti la echi Biblia ko aní: “[Ke] bilé namuti galá omérama olayá mapurigá Riosi ma ketasi waminabi tamujé tamí galema” (leeri Romanos 8:38, 39).

AMINABI NATABO JAPI TA BINÉ

Jenaʼí binepo okuá namuti japi mi iʼwírima jiti mi pakoma: we aʼlá machiyá Jeobá alí riwea japi echi mi iʼwírima.

4. We aʼlá machí Jeobá

¿Chumi yena machisáré Jeobá jiti mi omérima pakoa? Mujé ko ke newalé sébali machiyá Jeobá, nalí mi newa nílisaré we galea alí nijéwinilia. Inesi echi VIDEO jiti mi machimea japi nokali echi Biblia binéami omáana Wichimóbachi piréami. Alí raʼichasi jepuná jitra:

VIDEO: Japi aní japi pakónali (3:56)

Japi riká machina echoná video, ¿piri iʼwírili jaré binéami jiti omérima pakoa?

Leérisi Romanos 12:2 alí raʼichasi jepuná jitra:

¿Achi mi jaré namuti ke me bichiwia nili japi aní echi Biblia? Japi bineri echi testigo Jeobá, ¿achi mi mayé japi bichíwali ju?
Ami ke me bichíwiaká, ¿piri mi isísaré?

5. Piri mi iʼwírima jiti mi omérima nijewia Jeobá

Sinéami tamujé ata ikili namuti we jilírami japalí ti ma nátili japi ta katúwipo Jeobá yúa alí pakobo. Jiti mi machimea chúriká ikili bilé, inesi echi VIDEO. Alí raʼichasi jepuná jitra:

VIDEO: Ati we galésaká Jeobá ke bilé namuti isima japi ta riwepo echi (5:22)

¿Piri namuti we jilírami ikili Narangerel nijéwimia Jeobá?
Jiti we galeli Jeobá, ¿piri isili?

Leérisi Proverbios 29:25 alí 2 Timoteo 1:7, alí raʼichasi jepuná jitra:

Japalí ta we jilí nirasa nijewia Jeobá, ¿piri tamó iʼwírima?

6. Bichiwi japi Jeobá mi iʼwírima

Jeobá mi iʼwírima isiá japi echi nakí japi mi isima. Inesi echi VIDEO alí raʼichasi jepuná jitra:

VIDEO: Jeobá mi iʼwírima (2:50)

¿Chúsiá ke pakónali echi Biblia binéami japi machina echoná video?
¿Piri iʼwírili jiti ma ke majaa nílima pakoa?

Leérisi Isaías 41:10, 13 alí raʼichasi jepuná jitra:

¿Chúsiá mi we bichíwisaré japi mi a omérima isiá japi riká mi ma aneli Jeobá?

7. Aminabi natá japi Jeobá we mi galé

Japalí mi aminabi we natasa japi Jeobá we mi galé, mujé ayénachó we galema alí mi sinibí nijéwinalima. Leérisi Salmo 40:5 alí raʼichasi jepuná jitra:

¿Chu iyiri regalos japi Jeobá mi iyali wabé mi natéami niraa iné?

Echi profeta Jeremías we galeli Jeobá alí echi raʼicháala, ayénachó we natéami niraa ineli nawesia echi jitra. Echi ko jéanili: “Mujé raʼíchala tamí ku kanílitili alí isili japi ni we kanílima ne sulachí jonsa, jiti nijé ko ruyé mujé riwalá, oh, Jeobá” (Jeremías 15:16). Jipi ko aní japi mi nata jepuná náriwami jitra: