Echi japi kulí niwili sinibí we kanila pirélinali japi riká nílili echalí rawé japalí niwili. Alí a omérima echi riká pirea. Wiká cristianos japi wiká bamibi niwika pirea, aʼlá machí japi a omérima kanila pirea a nijéwisaká japi aní echi Biblia.

1. ¿Piri busuréliami iyá echi Biblia echi kunala?

Jeobá ko nuleli echi kunala japi nuláami nima echoná bitichí (leeri Efesios 5:23). Alí nakí japi aʼlá nátika isima jiti iʼwírima echi téemala. Echi Biblia ko ané echi kunala: “[Galesi] aboni jubila” (Efesios 5:25). ¿Piri aniwáami ju jepuná? Echi kunala japi we galé echi upila, simá isimí echi yúa japalí awénili muchuwi alí japoná wiká muchuwi. Echi ko tibú alí iʼwérili isimí iyayá suwaba japi newalé, alí machí japi inili alí iʼwiri (1 Timoteo 5:8). Ayénachó echi iʼwérili isimí iʼwiria echi upila jiti aminabi mulíwima Jeobá (Mateo 4:4). Japi riká, omeri napawika leeria echi Biblia alí raʼichia Jeobá yúa. Echi kunala a we galeka tibúsaká echi upila, we aʼlá Jeobá amígowala nima (leeri 1 Pedro 3:7).

2. ¿Piri busuréliami iyá echi Biblia echi upila?

Echi Biblia ko aní japi echi upila we aʼlá riwíwisaré echi kunala (Efesios 5:33). ¿Chúriká isísaré? Natásaré echi aʼlá namuti japi echi kunala isimí alí chúriká iʼwérili isimí echi tibúa alí ayénachó echi kúchuwala. Ayénachó newa isísaré japi riwiwi echi kunala japalí iʼwiri japi echi aní, simárika raʼicha alí ke cha riká raʼicha echi jitra tákoré echi ko ke bichíyami ju Jeobá.

3. ¿Piri nokisáré echi niwíkami jiti aminabi we galema anakupi niraa?

Echi japi ma niwíkami ju, echi Biblia ko ané: “Okuánika ne bilepi sapá chopi níima” (Mateo 19:5). Jepuná ko aniwáami ju japi okuánika aʼlá tibuka nokisáré jiti ke bilé namuti isima japi ku rojama. Jiti bela iʼwérili noká napawika simaria, simárika raʼichia alí anakupi niraa ruyea japi inili alí japi nata. Okuánika wabé natéami niraa inésaré Jeobá alí anakupi niraa, alí ke ko jarecho namuti. Alí ayénachó okuánika iʼwérika nokisáré jiti ke we mulíwima bilecho japi ke ju echi kunala o upila ma.

 AMINABI NATABO JAPI TA BINÉ

4. Kunala, galé alí tibú mujé upila

5. Upila, galé alí riwiwi mujé kunala

Echi Biblia ko ané echi upila japi riwíwisaré echi kunala, tákoré echi a nijéwami ju Jeobá o ke ma. Leérisi 1 Pedro 3:1, 2 alí raʼichasi jepuná jitra:

• Mujé kunala ke bichíyami nísaká Jeobá, ati machí japi mujé ko nakí japi bichíyami nima. Nalí, ¿piri iʼwírima mujé kunala jiti bichíyami nima: japi mi sinibí raʼíchima Biblia jitra, o japi mi simá isíami nima echi yúa alí mi riwíwima? ¿Chúsiá mi echi riká nata?

Echi upila alí echi kunala a omero aʼlá nátika nokayá echi namuti japi nokinali. Nalí isini kaachi echi upila ke aʼlá nirámiré japi aní echi kunala.  Echi riká nísaká, echi upila ko a omero ruyea echi kunala kilí niraa alí riwíwika japi nata. Nalí ayénachó newalásaré japi Jeobá wilali echi kunala jiti animea japi chúriká nokimea echoná bitichí. Jiti la, iʼwérili isísaré iʼwiria japi anili echi kunala. Echi riká isísaká, sinéami we kaníliami nima. Leérisi 1 Pedro 3:3-5 alí raʼichasi jepuná jitra:

• ¿Chu nili Jeobá japalí iné japi echi mukí riwiwi echi kunala?

6. Echi niwíkami a omérima kanílika pirea tákoré nirú karú ikiwáami

 JAPI MI BINELI

Echi kunala alí echi upila a omérima kanílika pirea anakupi galésaká, riwíwisaká alí nijéwisa japi aní echi Biblia.

Piri mi animea

• ¿Chúriká omero isiá echi kunala jiti okuaka we kaníliami nima?

• ¿Chúriká omero isiá echi upila jiti okuaka we kaníliami nima?

• Ami niwíkami nísaká, ¿chu iyiri busuréliami japi aní echi Biblia mi iʼwírima jiti timí aminabi we galéami nima?