Sinéami tamujé ati kanili sinúrika napachia alí siputia. Nalí, ati kanílitipo Jeobá japi riká ti napachi alí siputi ati nijéwisaká echi busuréliami japi uchuwi echoná Biblia. Ma inepo chu iyiri ju jaré echi.

1. ¿Chu iyiri busuréliami tamó iʼwírima jiti ta aʼlá napachabo alí siputabo?

Echi cristianos ko we aʼlá niraa siputásaré alí napachásaré. Ayénachó biʼwíami nísaré jiti néwariwélitima japi bichíyami ju Onorúami (1 Timoteo 2:9, 10). Ma inepo naó busuréliami. 1) Japi riká ti siputi alí napachi we aʼlárika nísaré. Japi simía echoná napawíliwachi ke chopi iyiri napachi alí siputi, ayénachó ke chopi iyiri tichíkami ju, nalí sinéami néwariwéliti japi nijewi alí riwiwi Onorúami. 2) Ke chaʼíami nísaré alí ke isísaré japi jarecho we tamó inema. 3) Néwariwélitipo japi ta aʼlá nátami ju japalí ta ke chuwé napachi o siputi tákoré wiká ju japi echi riká uchá o we baʼori. 4) Japi riká ti siputi alí napachi néwariwélitisaré japi ta nijewi Onorúami alí echi riká jarecho ayénachó machimea japi ta bichíyami ju echi Onorúami ne bichíwali (1 Corintios 10:31).

2. ¿Chúsiá ti natásaré echi hermanos jitra japalí ti nata chúriká ti napachabo alí siputabo?

A bichíwali ju japi ibili niraa tamujé omero aniyá chúriká ti napachabo alí siputabo. Nalí, ata natásaré japi chu nílima jarecho o piri natama tamujé jitra. Ata iʼwérili nokinali jiti ke bilé cha nílima inea japi riká ti napachi alí siputi. Sinéami nijéwisaré na busuréliami: “Galá níima ibili tamujé galá kanílatasa echi auché jaré, [...] mapurigá aboni ne bichíwali kuʼwíratami níima” (leeri Romanos 15:1, 2).

3. ¿Chúriká iʼwíripo jarecho jiti machinálima Jeobá jitra?

Ata sinúrika napachi alí siputi ibili rawé. Nalí japalí ta simía echoná napawíliwachi o japalí ta nawesa, wabé natéami ju japi chúriká ti simía. Ke ti nakí japi echi pagótami cha riká natama echi aʼláala raʼíchali jitra japi ta nawesa. Nalí tamujé ko nakí japi binénilima echi bichíwali alí japi Jeobá “walubéraga anérami níima” (Tito 2:10).

 AMINABI NATABO JAPI TA BINÉ

4. Japalí ti aʼlárika napachi alí siputi néwariwéliti japi ta riwiwi Jeobá

¿Piri namuti jitra ata we natéami niraa inésaré japi riká ti napachi alí siputi? Leérisi Salmo 47:2 alí raʼichasi jepuná jitra:

• Jiti tamujé ko nochi Jeobá, ¿chúriká ti napachásaré alí siputásaré?

• ¿Achi mi mayé japi we natéami ju japi aʼlárika napáchika simabo echoná napawíliwachi alí nawisasia? ¿Chúsiá mi echi riká nata?

 5. Piri tamó iʼwírima jiti ta aʼlá machiboa chúriká ti napachabo alí siputabo

Inesi echi VIDEO.

Ke me natéami ju chu kipu natijí japi ta napachi. Nalí wabé natéami ju japi biʼwíami nima alí aʼlárika nima echi chiní. Leérisi 1 Corintios 10:24 alí 1 Timoteo 2:9, 10. Alí raʼichasi chúsiá ke aʼlá ju japi ta uchabo...

• ... napacha o sipucha chiwákami, uwíkami o japi we rasía waʼlú ju.

• ... napacha o sipucha we chaʼíami, japi we riwiri sapala o japi isimí japi jarecho cha riká natama.

Tákoré tamujé ma ti ke nijéwisaré echi nulalíwami japi anili Moisés, nalí echi ko a bijí tamó iʼwiri machiyá piri nata Jeobá. Leérisi Deuteronomio 22:5 alí raʼichasi jepuná jitra:

• ¿Chúsiá ke aʼlá ju japi bilé mukí napachama japi riká bilé rijoi o bilé rijoi siputama japi riká bilé mukí?

Leérisi 1 Corintios 10:32, 33 alí 1 Juan 2:15, 16, alí raʼichasi jepuná jitra:

• ¿Chúsiá we natéami ju japi riká ti napachi alí siputi ke cha nílitima jarecho japoná ti piré o echoná congregación?

• ¿Chúriká napachi alí siputi echi pagótami japoná mujé bité?

• ¿Achi mi mayé japi riká napachi echoná, aʼlá ju japi bilé cristiano echi riká cho napachama? ¿Chúsiá mi echi riká nata?

 JAPI MI BINELI

Japalí ti aʼlárika napachi alí siputi, ata néwariwéliti japi ta riwiwi Jeobá alí ayénachó jarecho.

Piri mi animea

• ¿Chúsiá Jeobá we natéami niraa iné japi riká ti tichíkami ju, napachi alí siputi?

• ¿Chu iyiri ju jaré busuréliami japi tamó iʼwírima machiyá chúriká ti napachabo alí siputabo?

• Japalí jarecho iné japi riká ti napachi alí siputi, ¿achi iʼwírimaré japi aʼlá natama echi Jeobá puéblowala jitra? ¿Chúsiá?