Japi ta ne bichíwali cristianos ju ke ti nakí japi bilé namuti o bilé pagótami isima japi ta riwepo nijewia Jeobá. Ati machí japi mujé echi riká cho nili alí Jeobá ko we natéami niraa iné japi mi echi bi nijewi (leeri 1 Crónicas 28:9). ¿Piri namuti isímiré japi mi riwema nijewia Jeobá? Alí, ¿piri namuti mi isima echi riká ikisaa?

1. ¿Piri namuti nokiméeré jarecho jiti ta riwepo nijewia Jeobá?

Jaré pagótami nokiméeré japi ta riwepo nijewia Jeobá. ¿Jepi echi riká nokimea? Jaré ko ju echi pagótami japi ma riweli nijewia Jeobá alí jipi ko ikaleka raʼicha echi organización jitra japi Jeobá wilali, jiti ta riwepo bichiwia Jeobá. Echi pagótami anéliwa apóstatas. Ayénachó nirú líderes religiosos japi ikaleka raʼicha tamujé jitra jiti echi japi ke me bichíyami ju riwema nijewia Jeobá. We chati ju japi ta raʼichabo echi yúa japi sayeri Onorúami puéblowala, leeria echi libros japi echi osá o japi uchá echoná internet alí inea echi videos. Jiti la Jesús ko tamujé busuré iyali, echi ko jéanili: “Ariwesi echi [...]. Aboni chopi mapurigá jaré ke machíliami ju mapu we bayera auché jaré ke machíliami. Aʼlí a bilé ke machíliami rijói miná bayérasagá auché bilé ke machíliami, okuánika echoʼná biléana jochi rujuímiré” (Mateo 15:14).

Alí, ¿piri ta nokiboa japalí bilé japi ta machí o japi ta galé, ma ke testigo Jeobá nínali? Japalí bilé echi riká isisa, ati we risoa níliporé. Jepuná isímiré japi ta néwariwélitipo jépuká nalí ti wabé galé: Jeobá o echi pagótami. Nalí tamujé ko iʼwérili nokisáré Jeobá nalí nijewia (Mateo 10:37). Jiti la ti ke napawísaré echi pagótami yúa (leeri 1 Corintios 5:11).

2. ¿Piri jarecho namuti isímiré japi ta riwepo nijewia Jeobá?

Jiti ta we galé Jeobá, ke ti nokinali echi namuti japi noká echi religiones japi ke bichíwali ju. Japi riká japoná ti nocha, echi organizaciones japi iʼwiri echi pagótami o jarecho si namuti, ke nísaré japoná jonsa machina echi religión japi ke bichíwali ju. Jeobá ko jériká ané echi puéblowala: “Echoʼná walúlachi [Babilonia] jonsa waminá simasi” (Apocalipsis 18:2, 4).

 AMINABI NATABO JAPI TA BINÉ

3. Ke tasi kipú japi ikaleka bineri

¿Piri ta nokisáré ata kipúsaká japi jaré ikaleka raʼicha Jeobá organizaciónwala jitra? Leérisi Proverbios 14:15 alí raʼichasi jepuná jitra:

• ¿Chúsiá ti we aʼlá nátami nísaré alí ti ke bichíwisaré suwaba japi ta kipú?

Leérisi 2 Juan 10 alí raʼichasi jepuná jitra:

• ¿Chúriká ti nokiboa echi apóstatas yúa?

• Tákoré ke ti raʼicha echi apóstatas yúa, nalí ¿piri namuti isímiré japi ta echi mulíwipo?

• Ata kipúsaká echi japi cha riká raʼicha Jeobá jitra alí echi organización, ¿chu nílimiré Jeobá?

4. Newariwéliti japi mi Jeobá nalí we galé japalí bilé hermano cha isisa

Ati machisáaká japi bilé echoná congregación we cha isili, ¿piri ta nokisáré? Jiti ta machiboa inepo bilé nulalíwami japi Jeobá iyali echi israelitas. Leérisi Levítico 5:1.

Japi riká aní echi texto, ati machisáaká japi bilé pagótami isili bilé namuti we chati, ati ruyésaré echi ancianos. Nalí kecho bijí ruyea, ati bachá yúa raʼichásaré echi pagótami japi cha isili alí ti anésaré japi echi binoy ruyema echi ancianos. Echi ke nijéwisaká, tamujé ju japi ta ruyepo jiti ta nijéwinali Jeobá. ¿Chúsiá echi riká ti nokisaa, néwariwélitipo japi ta nijewi alí we galé...

• ... Jeobá?

• ... echi pagótami japi cha isili?

• ... echi congregación?

 5. Kiti isí echi namuti japi isima japi mi mulíwima echi Walúala Babilonia

 JAPI MI BINELI

Ati sinibí nijéwinalaká Jeobá, ke ti yúa napawísaré echi pagótami japi ma ke nijewi echi. Ayénachó ke bilé namuti nokiboa japi noká echi religiones ke bichíwali.

Piri mi animea

• ¿Chúsiá ti ke leérisaré, inésaré o kipúsaré japi aní echi apóstatas?

• ¿Chúriká ti nokiboa echi yúa japi ma ke testigo Jeobá nínali?

• ¿Chúriká ti nokiboa nijewia japi aní Jeobá japi ta buyapo echi Walúala Babilóniachi jonsa?