Japalí mi jonsa chotásili binea jepuná libro, mujé ko ma bineli wiká namuti Jeobá jitra. Alí isiá echi namuti mi iʼwírili jiti mi aminabi we galema Jeobá alí a keʼré japi mi ma pakoli. Kecho echi riká isíaká, ami ma nátiré pakomia. Japalí ma pakosa, mujé ko aminabi iʼwérili isísaré we aʼlá Jeobá amígowala niya alí ami omérima sinibí echi riká isiá. Ma inepo chúriká mi isima.

1. ¿Chúsiá mi aminabi iʼwérili isísaré we aʼlá Jeobá amígowala niya?

Ata iʼwérili nokisáré aminabi Jeobá amígowala niya. ¿Chúsiá? “Mapurigata ketasi chakena rujuibo” alí jiti ta ke riwepo echi nijewia (Hebreos 2:1). ¿Piri tamó iʼwírima jiti ta ke riwepo aminabi nóchilia Jeobá? Ke ti riwésaré simíaya nawisasia alí nokayá jarecho namuti nóchilia Jeobá (leeri Filipenses 3:16). ¡Ke nirú bilecho namuti we aʼláala japi ta omeri nokayá! (Salmo 84:10).

2. ¿Piri mi ke riwésaré isiá?

Tákoré mi ma suní binea na libro, mujé ko kulí chotásimi nijewia Jeobá. Echi Biblia ko aní japi ibili cristiano “siʼnú ne wabé galabéala niráa ku nakulíwarami níibo” (Efesios 4:23, 24). Ami sinibí binésaká japi aní echi Onorúami Raʼicháala alí mi ke riwésaká simiyá napawíliwachi, mujé ko aminabi mulíwima Jeobá alí mi we aʼlá machimea japi chúriká ju echi. Ayénachó iʼwérili isí niya japi riká Jeobá jiti mi we kanílitima echi.

3. ¿Chúriká tamó iʼwiri Jeobá jiti aminabi echi nijéwipo?

Echi Biblia ko aní: “Riosi ʼyemi mi ne sébali galabé niráa ku niwáma. Alí bichétamo ne wabé galá bichíyami níibo” (1 Pedro 5:10). Sinéami ta nokinali isini kaachi japi chati ju, nalí Jeobá tamó iʼwiri jiti ke echi riká nokiboa (Salmo 139:23, 24). Alí ayénachó tamó ané japi tamó iyama jiwérili jiti sinibí echi nóchilipo alí nijéwipo (leeri Filipenses 2:13).

 AMINABI NATABO JAPI TA BINÉ

4. Kiti riwé raʼichia mujé amígowala yúa

Raʼichia Jeobá yúa alí sinibí leeria echi Biblia mi iʼwírili jiti mi Jeobá amígowala nima. Nalí isiá echi namuti, ¿chúriká mi iʼwírima aminabi we muliwia Jeobá?

Leérisi Salmo 62:8 alí raʼichasi jepuná jitra:

• ¿Chúriká mi raʼichásaré Jeobá yúa jiti mi aminabi echi amígowala nima?

Leérisi Salmo 1:2 alí raʼichasi jepuná jitra:

• Japalí mi leeri echi Biblia, ¿piri mi isísaré jiti mi aminabi Jeobá amígowala nima?

¿Chúriká mi isísaré jiti mi aminabi we aʼlá binema japi aní echi Biblia? Jiti mi machimea chúriká mi omero isiá, inesi echi VIDEO alí raʼichasi jepuná jitra:

• Echi namuti japi mi ineli echoná video, ¿chu iyiri mi isínali?

• ¿Chu iyiri namuti jitra aminabi mi we aʼlá machinali?

 JAPI MI BINELI

Aminabi iʼwérili isí nóchilia Jeobá alí echi muliwia. ¡Echi riká mi kanílika bitélima sinibí!

Piri mi animea

• ¿Chúsiá mi bichiwi japi Jeobá mi iʼwírima sinibí echi nijewia?

• ¿Piri mi iʼwírima jiti mi aminabi we aʼlá Jeobá amígowala nima?

• Natia chúriká mi aminabi nóchilima Jeobá, ¿chúriká mi iʼwiri echi amígowala niya?