1. ¿Chúriká néwariwélitili bilé towí japi we bichíwili japi echi suwíami checho ku pirélima?

 BILÉ TOWÍ Matthew riwéami olá bilé nayulí we chati alí ma wisabé niraa operáritami nili. Japalí siete bamibi, ikili bilé namuti we semati. Siné rawé, echi alí echi téemala inea mochili JW Broadcasting^®. Japalí ma mulipi suní, ineli bilé video bilé canción jitra japoná machina wiká hermanos japi we kanila mutú echi japi suwili alí japi we galeli. b Japalí ma sunili, Matthew mulíwili echi wénwala, chapili echi sikala alí jéaneli: “Mamá alí papá, ¿a timí riwali japi ni mukusáaká ani checho ku bitélima? A timí omérima tamí buwea. Kiti chibi lasi”. ¿Ami nata chu nílili echi wénwala kipúa japi echi ranala we bichíyami nili? Matthew ko we bichíwili japi echi suwíami a checho ku pirélima.

2, 3. ¿Chúsiá we aʼlá ju japi ta natabo japi echi suwíami checho ku pirélima?

² Aʼlá ju japi isini kaachi ati natabo japi ku jawásitami nima echi japi ma suwili (Juan 5:28, 29, TNM). ¿Chúsiá? Jiti ta ke machí japi chu ikiboa baʼalínala rawé. A keʼré japi ta we nayupo o mukuméeré bilé japi ta we galé (Ecl. 9:11; Sant. 4:13, 14). Machiyá japi ku jawásitami nima echi japi ma suwili, tamó iʼwírima anachia echi karú ikiwáami (1 Tes. 4:13). Echi Biblia aní japi tamujé Onolá Jeobá we aʼlá tamujé machí alí we tamó galé (Luc. 12:7). Natá japi Jeobá we aʼlá tamó machí jiti tamó ku niwama japi riká ti nili chabé alí jiti ku newalabo japi riká ti nátami nili. Echi ko we tamujé galé, jiti la isima japi ta sinibí pirélipo alí ati suwisáaká echi ko tamó ku jawásima.

³ Jenaʼí binelíwami, ata binepo chúsiá ti bichíwisaré japi  a checho ku pirélima japi ma suwili. Ayénachó tamó iʼwírima aminabi bichiwia binea echi milagro jitra japi chukú echoná texto japoná machiburi na binelíwami, japi aní: “¡Echi mujé rijimala auchecho ku bitélama!” (Juan 11:23). Alí jubá ko binepo, piri ta nokisáré jiti we bichíwipo japi echi suwíami a checho ku pirélima.

4. ¿Piri ta we aʼlá machisáré jiti bichíwipo japi bilé tamó ané? Ruyé bilé ejemplo.

⁴ Jiti bichíwipo japi bilé tamó ané, ati machisáré japi echi ko a echi riká isínali alí japi a omeri echi riká isiá. Natabo jepuná ejemplo jitra. Bilé ukí we jiwérami najúnali tamó kalila alí bilé amigo tamó ané: “Mi ni iʼwírima ku atewia mujé kalila”. Ati machí japi echi ko ne bichíwali aní alí japi a tamó iʼwírinali. Ayénachó ti machí japi echi ko a omeri tamó iʼwiria jiti echi ko we aʼlá machí niwayá kalí alí olá suwaba namuti japi newalé. Jiti la ti bichiwi japi echi aní. Nalí, ¿achi ti omero bichiwia japi ku jawásitami nima echi suwíami? ¿Achi Onorúami echi riká isínali alí a omérima echi riká isiá?

5, 6. ¿Chúsiá ti we bichiwi japi Jeobá we inili ku jawásinalia japi ma suwili?

⁵ ¿Achi Jeobá ne bichíwali we inili ku jawásinalia echi suwíami? Ayena, echi riká isínali. Jiti la echi ko isili japi jaré Biblia osáami osimea japi checho ku jawásitami nima echi suwíami (Is. 26:19; Os. 13:14; Apoc. 20:11-13, TNM). Alí japalí Jeobá aní bilé namuti, sinibí echi riká isimí (Jos. 23:14). Tamujé ko machí japi Jeobá we inili ku jawásinalia echi suwíami. Nalí, ¿chúsiá echi riká ti aní?

⁶ Natabo japi anili Job. Echi ko we bichíwili japi mukusáaká, Jeobá ko we inílima echi ku wilásinalia (Job 14:14, 15, nota). Jeobá echi riká cho inili sinéami yúa japi echi nijéwami nili alí japi ma suwili. Echi ko we inili ku jawásinalia alí nakí japi ke nayúa pirélima, nalí we kanílika. ¿Alí chu níliré Jeobá sinéami echi pagótami jitra japi ma suwili ke machisaa echi bichíwali? Jeobá ayénachó we inili ku jawásinalia echi (Hech. 24:15). Ayénachó nakí japi echi amígowala nima alí sinibí pirélima jenaʼí Wichimóbachi (Juan 3:16, TNM). Ati we aʼlá machí japi Jeobá a ku jawásinili japi ma suwili.

7, 8. ¿Chúsiá ti bichiwi japi Jeobá a omeri ku jawasia japi ma suwili?

⁷ ¿Achi Jeobá omeri ku jawasia japi ma suwili? Ayénaʼá. Jiti echi ko “Suwaba Omériami ju” (Apoc. 1:8, TNM). Echi ko a omeri niyuria suwaba echi sayérala, ayénachó omeri isiá japi ma ke che suwiboa (1 Cor. 15:26). Machiyá jepuná tamó iʼwérili iyá alí tamó ku kaníliti. Ma inepo japi ikili echi hermana Emma Arnold. Echi alí echi téemala ikili namuti we jilírami japalí niruili Segunda Guerra Mundial. Ku kanílitimia echi ranala japi we omona nílili echi téemala jitra japi suwili echoná campos de concentración nazis, echi ko jéaneli: “Echi pagótami sinibí a suwiyá pirélisaká, ¿kechi ko echi mukuwáami wabé jiwérami nima Onorúami yúa?”. Nalí ke echi riká ju, ke ité bilecho japi we jiwérami ju japi riká Jeobá. Echi tamó niwali, jiti la echi ko a omeri checho ku owintia japi ma suwili.

⁸ Bilecho namuti japi jitra ta machí japi Onorúami a omeri ku jawasia japi ma suwili, echi ko ju, jiti echi ko suwaba newalá. Echi Biblia ko aní japi echi ko ibili niraa rewá echi sipolí (Is. 40:26). Jeobá ko newalá sinéami echi pagótami japi ma suwili (Job 14:13; Luc. 20:37, 38, TNM). Alí newalá suwaba echi namuti japi chúriká nili echi  pagótami ripokala japi ku jawásima, ayénachó newalá japi chúriká nátami nili, japi chúriká pireili alí piri níliami nili.

9. ¿Chúsiá mi bichiwi japi ku jawásitami nima echi suwíami?

⁹ Japi riká ti ma bineli, tamujé a omeri bichiwia japi Jeobá ku jawásima echi suwíami jiti echi ko echi riká isínali alí ayénachó a omeri echi riká isiá. Bilecho namuti japi jitra ti machí japi echi ko a echi riká isima, echi ko ju jiti ma ku jawásili jaré pagótami japi suwili. Chabé, Jeobá ko iyali echi jiwérala jaré pagótami alí Jesús jiti omérima ku jawasia echi suwíami. Ma inepo echi capítulo 11 echoná Juan japoná ruyé japi Jesús ku wilásili bilé mukúami.

10. ¿Piri ikí japalí Jesús iyena nawesia japi okuá rawé ju echoná Betania jonsa, alí piri isili echi? (Juan 11:1-3).

¹⁰ (Leeri Juan 11:1-3). Echomí Betania, Jesús ko olá jaré amigos: Lázaro alí okuánika echi rejimala, María alí Marta (Luc. 10:38-42). Ma suwénachi bamíali 32, Lázaro nayú alí echi rejimala ko we majaa alí júali bilé jiti ruyema Jesús japi ikili, echi ko atí baʼomi echomí Jordán, we miká japi okuá rawé ju sibamia echomí (Juan 10:40). Japalí Jesús kulí machili japi Lázaro nayú, echi ko ma mukuli. Tákoré Jesús ma machiyé japi binoy amígowala mukuli, a bijí okuá rawé ripí echoná japoná iyena alí miná ko simí Betania. Jiti la, japalí nawá echoná, Lázaro ko ma naó rawé boʼili mukuá. Jesús ko isínali bilé namuti iʼwírimia echi amígowala jiti echi riká Jeobá walubéala anérami nima (Juan 11:4, 6, 11, 17).

11. ¿Piri tamó bineri jepuná historia echi amigos jitra?

¹¹ ¿Piri tamó bineri jepuná historia echi amigos jitra? Japalí María alí Marta júali bilé jiti anema Jesús japi Lázaro nayú, echi ko ke aneli japi simisáré echomí Betania. Echi ko pe aneli bi japi echi amígowala nayú (Juan 11:3). Japalí Lázaro mukuli, Jesús ko a omérili miká jonsa ku owintia. Nalí echi ko ke echi riká isili, echi ko nalí simili echomí Betania inesia japi chúriká muchuwa echi amígowala Marta alí María. ¿Achi mi olá bilé amigo o amiga japi binoy nátika mi iʼwiri? Echi riká nísaká, mujé ko machí japi echi mi iʼwírima japalí mi “risoa níliachi” (Prov. 17:17). Ati nokisáaká japi riká Jesús, ati we aʼlá amigos nipo. Ma checho ku inepo echi historia alí binepo piri ikili.

12. ¿Piri aneli Jesús echi Marta, alí chúsiá bichíwili japi a echi riká isima? (Juan 11:23-26).

¹² (Leeri Juan 11:23-26). Japalí Marta machí japi Jesús ma mulipi nawá echoná Betania, echi ko sapú simí inesia alí jéané: “¡Keni Walubélawa, a mi bukulí jenaʼí asisáagá, ketasi mukumeli keni rijimá!” (Juan 11:21). A bichíwali ju japi Jesús ko a omérili ku saʼwea Lázaro, nalí echi ko nátili isimia bilé namuti japi wabé aʼlá ju. Jesús ko ané echi Marta: “Mujé rijimala auchecho ku bitélama”. Echi Marta  ko aminabi we bichiwi japalí Jesús aní jepuná raʼíchali: “Nijeni ku oʼwíntiami ju, ayénachó Nijeni nijá echi sinibí pirélawami”. Ayena, Onorúami ko iyali binoy jiwérala echi Jesús jiti omérima ku jawasia japi ma suwili. Echalí, Jesús ko ma ku wilásili bilé tiwé japi ma wilí pe boʼili mukuá alí ku wilásili bilé remalí japi echalí rawé mukuli (Luc. 7:11-15; 8:49-55). Nalí, ¿achi omérimili ku wilasia bilé japi ma naó rawé boʼili mukuá alí japi ma bikáami nílisili?

13. Japi riká aní Juan 11:32-35, ¿piri isimí Jesús japalí iné María alí jarecho nalákiami? (Ayénachó iné echi dibujo).

¹³ (Leeri Juan 11:32-35). Natabo japi ikili. María, japi ayénachó Lázaro rejimala ju, muliwi Jesús alí ayénachó aní japi riká Marta anili: “¡Keni Walubélawa, a mi bukulí jenaʼí asisáagá, ketasi mukumeli keni rijimá!”. María alí sinéami echi pagótami we risoa nili. Japalí Jesús ineni nalákiami, echi ko we omona nili. Jiti echi ko we natimá echi amígowala, ayénachó nalá. Jesús ko aʼlá machí japi chu ju japalí bilé mukusá, jiti la echi ko isínali japi echi amígowala ma ke risoa nílima.

14. Machiyá japi Jesús nalali inea María naláami, ¿piri ta biné Jeobá jitra?

¹⁴ Japi riká isili Jesús nalá japalí ineli María naláami, ata biné japi Jeobá bilé Onorúami we natimáami ju. ¿Chúsiá echi riká ti aní? Jiti japi riká ti ineli biléala binelíwami, Jesús ko néwariwéliti japi riká ju binoy Onolá, japi riká nata alí japi riká nili (Juan 12:45). Jiti la, japalí ti leeri japi Jesús nalali inenia japi echi amígowala we risoa nili, ata machí japi Jeobá ayénachó echi riká cho nili japalí tamujé we risoa nili (Sal. 56:8). Machiyá jepuná, ¿kechi ko tamó iʼwiri japi ta aminabi mulíwinalipo echi Onorúami japi we galéami ju?

15. Japi riká aní Juan 11:41-44, ¿piri ikí echoná risochí japoná boʼili Lázaro? (Ayénachó iné echi dibujo).

¹⁵ (Leeri Juan 11:41-44). Japalí Jesús nawá echoná risochí japoná boʼili Lázaro, ané echi pagótami japi iyema echi waʼlú rité japi jitra értami nili echi risochí. Nalí Marta ko ané japi ma cha júkiré echi sapala. Alí Jesús ko jéané: “Ma nimí aneli mapu ami  galá bichíisagá mujemi riwimea mapu Riosi ne wabé Walubela ju” (Juan 11:39, 40). Miná ko, sinéami iné japalí Jesús ripá ineka raʼicha Jeobá yúa, jiti echi ko nakí japi Jeobá nalí walubéala anérami nima echi namuti jitra japi isima. Jiti la weli sinaka echi ko jéaní: “¡Lásaro, wakiná machina!”. Alí Lázaro machina risochí jonsa. Jesús ko isili bilé namuti japi echi pagótami ke mayeli japi ikimea (iné echi nota de estudio japi chukú echoná Juan 11:17).

16. ¿Chúriká tamó iʼwiri japi aní echi capítulo 11 echoná Juan jiti aminabi bichíwipo japi echi suwíami a checho ku pirélima?

¹⁶ Japi aní echi capítulo 11 echoná Juan, tamó iʼwiri aminabi bichiwia japi echi suwíami checho ku jawásitami nima. Newalabo japi Jesús aneli Marta: “¡Echi mujé rijimala auchecho ku bitélama!” (Juan 11:23). Japi riká echi Onolá, Jesús nakí japi echi riká ikimea alí a omeri echi riká isiá. Japi riká isili Jesús nalá, néwariwéliti japi echi ko we inili ne sulachí jonsa isínilia japi ta ma ke suwiboa alí risoa nílipo. Japalí Jesús owíntili Lázaro, echi ko checho néwariwélitili japi olá jiwérali jiti ku jawásima echi japi ma suwili. Ayénachó natabo japi Jesús newalárili Marta: “Ma nimí aneli mapu ami galá bichíisagá mujemi riwimea mapu Riosi ne wabé Walubela ju” (Juan 11:40). A nirú wiká namuti japi ta jitra bichíwipo japi Onorúami a ku jawásima echi japi ma suwili. Nalí, ¿piri ta nokisáré jiti aminabi we bichíwipo japi a echi riká ikimea?

17. ¿Piri ta nokisáré japalí ti leeri echi pagótami jitra japi ku jawásitami nili?

¹⁷ Leéripo echi pagótami jitra japi ku jawásitami nili alí natabo piri ta biné. Echoná Biblia raʼicha osá naó pagótami jitra japi jawásitami nili jenaʼí Wichimóbachi. c ¿Chúsiá ti ke biné ibili niraa echi jitra? Japalí ti leeria mochisa natabo japi echi pagótami a ne bichíwali pireili, japi riká: echi rijoi, umukí alí kuuchi. Aapo piri ta biné alí  natabo chúriká ibili ejemplo néwariwéliti japi Onorúami ko we inili alí omeri ku jawasia japi ma suwili. Ayénachó natabo bilé jitra japi ku wilásitami nili japi wabé natéami ju jarecho yúa, echi ko Jesús ju. Japalí Jesús ma owínili, wiká pagótami riwali. Echi jitra, ati aminabi we bichiwi japi ku jawásitami nima echi suwíami (1 Cor. 15:3-6, 20-22).

18. ¿Piri ta nokisáré jiti we aʼlá binepo echi canciones japi raʼicha japi echi suwíami checho ku pirélima? (Ayénachó iné echi nota).

¹⁸ We aʼlá binepo echi canciones japi raʼicha japi ku jawásitami nima echi suwíami (Efes. 5:19, TNM). d Echi canciones tamó iʼwiri aminabi bichiwia japi a echi riká ikimea. Jiti la, we aʼlá ju japi ta kipubo, wikarabo alí raʼichabo piri ta biné echi jitra japalí ti binea muchuwi tamujé téemala yúa. We aʼlá binepo japi aní echi canciones alí newalabo echi semati raʼíchali japi ta biné echoná; alí echi riká ti nokisáaká, japalí ti sojí mukusaa o mukusaa bilé téemala, echi Onorúami jiwérala tamó iʼwírima ku néwalayá echi canciones. Jepuná tamó ku kanílitima alí tamó iʼwérili iyama.

19. ¿Piri ta nokisáré? (Iné echi recuadro “ ¿Piri mi nárinali?”).

¹⁹ Natabo japi chúriká nima pe aminana. Jeobá ko tamó niwali jiti ta oméripo natia japi riká ko ti ma pirea echoná kulíwami Wichimóbachi. Bilé hermana jéaní: “Ani we nata japi chúriká nima echoná kulíwami Wichimóbachi. Jiti la ni nili japi riká ko ma sáaya echi siwá japi nirúlima echoná”. Natabo japi chúriká nima machiyá echi pagótami we nijéwami japi jitra raʼicha echi Biblia. ¿Jepi ju japi mi we inili machinalia? ¿Piri namuti ju japi mi nárinali? Ayénachó natabo chúriká nima checho ku inea echi japi ma suwili alí japi ta we galé. Natá japi mi we kanílima ku inea, japi mi we jiwérika mutuma alí piri raʼíchali mi bachá anema.

20. ¿Piri ta aminabi nokisáré?

²⁰ Ata waʼlú matétara iyá Jeobá jiti echi ko tamó ané japi echi suwíami checho ku pirélima. Ati bichiwi japi echi riká ikimea jiti echi ko we inili echi riká isínilia alí echi ko a omeri echi riká isiá. Echi ko ju japi riká Jeobá ibili niraa tamujé anea: “Echi japi suwili alí japi mi we galé checho ku owínima”. Jiti la, iʼwérili nokiboa jiti aminabi we bichíwipo japi echi suwíami checho ku pirélima. Echi riká ti nokisáaká, ati aminabi mulíwipo Jeobá jiti echi ju japi echi riká tamó ané.