1. ¿Chúsiá ta nijí comentarios echoná napawíliwachi?

 ¿CHÚSIÁ ta simía echoná napawíliwachi? Echi namuti we natéami ko ju jiti ta walubéala anénali Jeobá (Sal. 26:12; 111:1). Ayénachó echoná ti iʼwérili naré anakupi niraa jipi jubá rawé we jilí kaachi (1 Tes. 5:11). Echi okuá namuti ta noká japalí ti nijí comentarios echoná napawíliwachi.

2. ¿Chu kabú ti omeri nijía comentarios echoná napawíliwachi?

² Sinibí tarali ati omeri nijía comentarios echoná napawíliwachi. Japi riká echi sábado, oméachi ma, japalí ta biné echi oselí Echi Nawésami. Alí echoná napawíliwachi japi ta olá nasipa tarali, ati omeri ayawia sikala japalí ti biné japoná aní “Aa chu iyiri namuti we natéami aniyá echi Biblia” alí “Napawika binepo echi Biblia”, ayénachó japalí ti nárisiwa.

3. a) ¿Chúsiá isini kaachi jilí ju nijía comentarios? b) ¿Piri ta biné japi aní Hebreos 10:24, 25?

³ Sinéami ti walubéala anénali Jeobá alí ti iʼwérili iyánali echi hermanos echi comentarios jitra japi ta nijí. Nalí isini kaachi a jilí ju jiti ta majaa nili o jiti ta ke iyáliwa suwaba echi comentarios japi ta aninali. Echoná carta japi echi apóstol Pablo osélili echi hebreos, ata riwiboa echi raʼíchali we natéami japi tamó iʼwírima. Japalí raʼíchili echi napawíliwami jitra, echi ko anili japi chu iyiri nalí ju japi ta wabé natéami niraa inésaré: “Iʼwérili nijibo anakupi niraa” (leeri Hebreos 10:24, 25, TNM). Ke ti majaa nílipo ayawia sikala ati newalásaká japi ta iʼwérili iyabo jarecho,  tákoré ti aniyé kuabi raʼíchali. Alí ke ti omériaká nijía suwaba echi comentarios japi ta nakí, ati kanílipo inea japi jarecho nijí comentarios (1 Ped. 3:8).

4. ¿Piri bikiá namuti inepo jenaʼí binelíwami?

⁴ Jenaʼí binelíwami, ati bachá binepo chúriká ti iʼwérili nijibo anakupi niraa echoná congregación japoná kuabi napawí, alí japoná ti a omeri wisabé niraa nijía comentarios. Miná ko binepo chúriká ti nokiboa echoná congregación japoná wiká napawí, alí japoná wiká hermanos nijínali comentarios. Alí upá ko inepo chúriká nísaré echi comentarios japi ta nijí, jiti echi riká iʼwérili iyabo jarecho.

5. ¿Piri ti nokiboa jiti ta iʼwérili iyabo jarecho ati kuabi nísaká japoná ti napawí?

⁵ Echoná congregación japoná kuabi napawí o bilé grupo japoná kuabi ju, ke me nirú hermanos japi omérima nijía comentarios. Jiti la, echi hermano japi wilí echoná plataforma teeli buwésaré jiti echi hermanos ayáwima sikala. Echi jitra a keʼré japi echi napawíliwami ke sapú sunima. ¿Piri nokiboa echi riká nísaká? Ati wisabé niraa nijibo comentarios. Echi riká iʼwíripo jarecho jiti ayénachó ayáwima sikala.

6, 7. ¿Piri mi omeri isiá ami majaa níliaká nijía comentarios?

⁶ Wiká hermanos ko we majaa nili nijía comentarios echoná napawíliwachi. Mujé echi mi níliaká, ¿piri mi omeri isiá? Natá piri namuti mi iʼwírima jiti mi ke majaa nílima nijía comentarios alí echi riká mi iʼwérili iyama jarecho.

⁷ Bilé namuti japi mi iʼwírima ko ju jaré busuréliami japi ma machínali echoná oselí Echi Nawésami. b Bilé echi busuréliami ko ju japi ta we aʼlárika binepo japi ta binéporé (Prov. 21:5). Ami we aʼlá machisáaká japi ta binepo, ke mi jilí nirama ayawia sikala. Bilecho namuti japi mi omérima isiá ko ju aniyá kuabi raʼíchali (Prov. 15:23; 17:27). Kuabi raʼíchali mi anisáaká, ami ke me majaa nílima. Ayénachó echi hermanos ke jilí nirama aʼlá inamia bilé comentario japi ke wilí ju, nalí wilí nísakó ke aʼlá inámima japi ta aní. Ami kuabi raʼíchali anisáaká japi riká mi raʼicha, jarecho inema japi mi we aʼlá bineli alí japi mi we aʼlá inámili japi mi bineli.

8. ¿Piri nata Jeobá japalí ti iʼwérili noká nijía comentarios?

⁸ Ami ma isílaká suwaba echi namuti, nalí ami bijí pe okuá comentarios mi nijí o bilepi bi jiti mi majaa nili, ¿piri mi isísaré? Ami newalásaré japi Jeobá we natéami niraa iné japalí mujé iʼwérili isimí comentarios nijía (Luc. 21:1-4). Nalí Jeobá ko ke nakí japi mujé binoy isínilima echi namuti japi mi machí japi mi ke omeri isiá (Filip. 4:5). Jiti la, aʼlá natá chu ikí comentarios ami omérima aniyá, iʼwérili isí alí tani Jeobá japi mi iʼwírima jiti mi kilí nílima. Bachá, ami omérima aniyá bilé comentario japi ke me wilí ju.

9. ¿Piri ikiméeré echoná congregación japoná wiká napawí?

⁹ Ami napawíaká echoná congregación japoná wiká publicadores nirú, a keʼré japi mi ke omérima nijía bilé comentario o wiká comentarios jiti nirú wiká  hermanos japi ayawi sikala. Natabo echi Danielle jitra, echi ko ju bilé hermana japi we kanili nijía echi comentarios echoná napawíliwachi. c Echi ko we natéami niraa iné nijía echi comentarios jiti nili japi echi riká nóchili Jeobá, iʼwérili iyayá jarecho alí jiti echi comentarios iʼwiri jiti newalama echi namuti we natéami japi bineli echoná Biblia. Nalí japalí chotásili simiyá biléana congregación japoná wiká napawíe, ma ke me iyáliwa comentarios alí isini kaachi ke bilé comentario. Echi ko jéaní: “We ni omona nilie. Ani níliki japi ni ma ke isimí bilé nóchali. Japalí mi ke iyáliwa bilé comentario wisabé niraa, ami chotasi natia japi echi nalí ju japi ke mi iyánali echi comentario”.

10. ¿Piri mi isísaré jiti echi hermano mi iyama bilé comentario?

¹⁰ ¿Ami isini kaachi níliki japi riká Danielle? Japalí mi echi riká inili, ami jériká nátiliré: “Ma ni ke ayáwima sikala, ani kipúa bi asimea”. Nalí kiti siwé. ¿Piri mi isísaré jiti echi hermano mi iyama bilé comentario? Niwá wiká comentarios, ke bilepi bi. Echi riká mi isísaká, ke mi iyásiwaká comentarios echoná bacháwala párrafos, ami omérima aniyá echoná jaréala párrafos. Alí japalí mi binea asisaa japi mi binema echoná oselí Echi Nawésami, natá chúriká ibili echi párrafos ruyé japi riká aní echi título japi chukú echoná binelíwami. Echi riká ke mi jilí nirama aniyá japi mi bineli. Bilecho namuti japi mi omérima isiá ko ju, niwayá comentarios echi párrafos jitra japoná raʼicha echi namuti japi we jilí ju inámilia (1 Cor. 2:10). Jiti we jilí ju ruyea, wiká ke me ayawi echi sikala. Nalí ami ma isílaká suwaba echi namuti alí mi bijí ke nijíaká bilé comentario, ¿piri bilecho namuti mi isísaré? Kecho bijí chotasia echi napawíliwachi ami omeri anea echi hermano chu iyiri pregunta mi ruyénali.

11. ¿Chúriká ti nokiboa japi riká aní Filipenses 2:4?

¹¹ (Leeri Filipenses 2:4). Onorúami ko isili japi echi apóstol Pablo iʼwérili iyama echi cristianos jiti natama piri newalea  jarecho. ¿Chúriká ti nokiboa echoná napawíliwachi japi riká anili Pablo? Ata newalásaré japi echi hermanos ayénachó nijínali comentarios.

12. ¿Chúriká ti nokisáré jiti iʼwérili iyabo echi hermanos echoná napawíliwachi? (Ayénachó iné echi foto).

¹² Jiti we aʼlá inámipo echi namuti, natabo jepuná ejemplo jitra. ¿Kechi ko japalí mi raʼicha mujé amígowala yúa ke mujé bi ju japi mi raʼicha, nalí mujé ko riwé japi echi ayénachó raʼichama? Echi riká cho ju echoná napawíliwachi. Ati nakí japi wiká hermanos nijima comentarios. Bilé namuti japi ta jitra iʼwérili iyabo echi hermanos ko ju, riwea japi echi animea japi bichiwi (1 Cor. 10:24). Ma binepo piri ta omeri nokayá jiti wiká nijima comentarios.

13. ¿Piri ta oméripo nokayá jiti wiká hermanos omérima nijía comentarios?

¹³ Ati oméripo aniyá echi comentarios japi ke wilí ju jiti echi riká wiká hermanos sibama nijía comentarios. Echi japi ancianos ju alí jarecho Testigos japi ma wiká bamíali jonsa nijewi Jeobá, we aʼlá nima japi echi riká nokimea. Ayénachó echi comentarios japi ta aní ke wiká raʼíchali olásaré. Ami anisáaká suwaba japi aní echi párrafo, echi hermanos ke omérima ruyea jarecho namuti. Jenaʼí párrafo nirú okuá busuréliami japi ta omeri nokayá, ami anésiwaká japi mi nijima echi bachá comentario jena párrafo, ¿chúsiá mi ke bilepi bi leeri echi okuá busuréliami japi jenaʼí aní?

14. ¿Chúsiá ti we aʼlá natásaré chu kisapi ayáwipo sikala? (Ayénachó iné echi fotos)

¹⁴ Ami aʼlá natásaré chu kisapi mi ayáwima sikala jiti mi nijima comentarios. ¿Chúsiá? Jiti ata wisabé niraa ayáwisaká sikala, echi hermano japi wilí echoná plataforma tamó iyámiré wiká comentarios tákoré jarecho ko kecho nijili comentarios. Ayénachó jaré nílimiré japi ke me  natéami ju japi iʼwérili nokimea nijía comentarios (Ecl. 3:7).

15. a) ¿Piri ti ke nokiboa ke ti omérisaká nijía comentarios echoná napawíliwachi? b) ¿Piri natásaré echi hermano japi naria wilí echoná plataforma jonsa? (Iné echi recuadro “ Chúriká nijibo bilé parte japoná uchuwi náriwami”).

¹⁵ Japalí wiká hermanos ju japi nijínali comentarios a keʼré japi ta ke oméripo nijía wiká comentarios japi riká ti nakí. Ayénachó isini kaachi ati ke bilé comentario nijíboré echoná napawíliwachi. A bichíwali ju japi ta omona nílipo echi ikisaa, nalí ke ti iyoa nílisaré echi jitra (Ecl. 7:9).

16. ¿Piri ta omeri nokayá iʼwérili iyamia japi a nijili comentarios?

¹⁶ Tákoré ke mi omeri nijía wiká comentarios japi riká mi nakí, aʼlá kipú echi comentarios japi jarecho aní alí echi riká ma sunisa echi napawíliwami ami omérima anea japi we aʼlá nokali. A keʼré japi echi raʼíchali japi mi ané echi hermanos iʼwérili iyama japi riká echi comentarios japi mi nátili nijimia (Prov. 10:21). Japalí ti ané jarecho japi we aʼlá nokali, ayénachó ata iʼwérili iyá.

17. a) ¿Piri nokisáré echi japi kúchuwami ju? b) Japi riká aní echoná video, ¿chu iyiri ju echi naó namuti japi chúriká ti niwásaré bilé comentario? (Ayénachó iné echi nota).

¹⁷ ¿Piri jarecho namuti ta omero nokayá jiti iʼwérili iyabo anakupi niraa echoná  napawíliwachi? Ami kúchuwami nísaká japi kuuchi ju, iʼwiri niwayá comentarios japi echi a omérima aniyá (Mat. 21:16). Isini kaachi echoná napawíliwachi ata biné jaré namuti japi jilí ju, japi riká echi niwíkami jitra, echi nasawíliami o jarecho si namuti. Nalí a keʼré japi nirúlima jaré párrafos japoná emi kúchuwala a omérima nijía comentario. Ayénachó ami omeri ruyea mujé kúchuwala japi ke ne sinibí iyárami nima comentarios tákoré wisabé niraa ayawi sikala. Echi riká mi isísaká, echi ko ke omona nílima japalí ke iyásiwa comentarios (1 Tim. 6:18). d

18. ¿Piri ta ke nokisáré japalí ti nijí comentarios? (Proverbios 27:2).

¹⁸ Sinéami ti omeri nijía we aʼlá comentarios japi iʼwírima echi hermanos alí japi kanílitima Jeobá (Prov. 25:11). Tákoré ti isini a oméripo raʼicha tamujé aboi jitra, ke aʼlá nima japi ta wiká raʼichabo (leeri Proverbios 27:2; 2 Cor. 10:18). Nalí ti we natéami niraa inésaré Jeobá jitra raʼicha, echi Biblia alí echi puéblowala (Apoc. 4:11). Nalí a chukusáaká bilé pregunta japi tamó nari japi ta ikili o japi ta nata, aʼlá ju japi ta aniboa. Echoná biléala párrafo binepo bilé ejemplo.

19. a) ¿Piri ikimea ati natásaká jarecho jitra echoná napawíliwachi? (Romanos 1:11, 12) b) ¿Chúsiá mi we kanili nijía comentarios echoná napawíliwachi?

¹⁹ Tákoré ke ti anéliwa chúriká ti nijísaré echi comentarios, sinéami ati iʼwérika nokisáré jiti echi comentarios japi ta nijí iʼwírima jarecho. ¿Chúriká? Isini kaachi jaré ko iʼwérili nokisáré nijía wiká comentarios, nalí jarecho ko kanílisaré echi comentarios jitra japi omeri nijía alí jiti jarecho ayénachó a nijínali comentarios. Ati natásaká jarecho jitra echoná napawíliwachi, sinéami ti kanílipo iʼwérili nijía anakupi niraa (leeri Romanos 1:11, 12).