1. ¿Piri ta we aʼlá machí?

 JAPI ta Jeobá nijéwami ju, ati machí japi echi ko we tamó galé alí nakí japi ta aʼlá pirélipo (Rom. 8:35-39, TNM). Ayénachó ti we aʼlá machí japi nijewia echi busuréliami japi uchuwi echoná Biblia, sinibí tamó iʼwiri (Is. 48:17, 18). Nalí, ¿ati ikisáaká namuti jilírami japi ta ke buweli japi ikimea?

2. ¿Piri karú ikiwáami a keʼré japi ta olabo, alí piri nárika nokibóaré?

² Sinéami japi ta Jeobá nijéwami ju ati olá karú ikiwáami. Japi riká, a keʼré japi bilé tamujé téemala isima o animea bilé namuti japi ke tamó kaníliti. O ati olayéeré bilé nayulí japi isimí japi ta ke me oméripo nóchilia Jeobá. O ati risoa níliré echi desastre naturales jitra. Ayénachó a keʼré japi ta sayériwa jiti ta bichíyami ju. Japalí ti ikí echi iyiri namuti jilírami, ati nárika nokibóaré: “¿Chúsiá ni echi riká ikí? ¿Ani isili bilé namuti japi ke aʼlá ju? ¿Achi aniwáami ju echi japi Jeobá ke tamí iʼwiri?”. Mujé ami siné kaachi echi riká níliaká, kiti siwé, jiti wiká japi we aʼlá Jeobá nijéwami nili chabé piréami ayénachó echi riká nílili (Sal. 22:1, 2; Hab. 1:2, 3).

3. ¿Piri tamó bineri Salmo 34:19?

³ (Leeri Salmo 34:19). Jepuná versículo ruyé okuá namuti we natéami: 1) echi japi nijéwami ju ikí namuti jilírami alí 2) Jeobá tamó iʼwiri anachia. Nalí, ¿chúriká tamó  iʼwiri Jeobá? Echi ko tamó iʼwiri jiti newalabo chúsiá wiká karú ikiwáami nirú jipi rawé. A bichíwali ju japi Jeobá ko tamó ané japi ta we kaníliami nipo echi nóchilisaká, nalí echi ko ke aniwáami ju japi ta sinibí aʼlá pirélipo alí ke karú ikiboa (Is. 66:14). Onorúami ko nakí japi ta natabo japi chúriká nima piréliwa echoná Wichimóbachi we baʼóachi; echi riká nakí japi ta pirélipo (2 Cor. 4:16-18). Nalí, kecho bijí séachi echi rawé japalí baʼóami nima, echi ko tamó iʼwiri anachia suwaba japi ta ikí (Lam. 3:22-24).

4. ¿Piri ta binepo jena binelíwami?

⁴ Jenaʼí binelíwami binepo jaré pagótami jitra japi we aʼlá nijéwami nili Jeobá alí japi oserúa uchuwi echoná Biblia, alí ayénachó echi jitra japi jipi piréami ju. Binepo japi jipi ata ikibóaré namuti jilírami japi ta ke buwé japi ikimea. Nalí, ati bichíwisaká Jeobá, echi ko sinibí tamó iʼwírima (Sal. 55:22). Japalí mi biné ibili niraa echi ejemplos, nárika isí: “¿Piri ni isímili nijé nílaká japi echi riká ikí? ¿Chúriká tamí iʼwiri jepuná ejemplo aminabi bichiwia Jeobá? ¿Piri namuti we natéami ni biné jepuná jitra?”.

5. ¿Piri namuti ke aʼlá isili Labán Jacob yúa? (Iné echi bachá dibujo japi chukú jena oselí).

⁵ Jaré japi Jeobá nijéwami nili chabé piréami, ikili namuti jilírami japi ke buweli japi ikimea. Ma binepo Jacob jitra. Echi onolá ko aneli japi niwima Labán malala yúa japi téemala nili alí nijéwami nili Jeobá. Ayénachó aneli japi Jeobá ko iyama wiká namuti aʼláala (Gén. 28:1-4). Jacob echi riká isili: echi ko simili echomí Canaán japoná biteili Labán, japi okuá maléami nili, Lea alí Raquel. Nalí Jacob wabé galeli echi Raquel japi táala nili. Jiti omérima niwía echi yúa, echi ko nóchili Labán kichao bamíali (Gén. 29:18). Nalí ke ikili japi riká Jacob nakili. Labán ékili Jacob alí iyali Lea, japi walúala malala nili jiti echi upila nima. Alí miná ko iyali Raquel jiti ayénachó echi upila nima, nalí aneli japi checho kichao bamíali nochama echi jitra (Gén. 29:25-27). Nalí ke echi bi nili. Labán ayénachó ékili Jacob japalí echi nóchili. ¡Echi riká isili 20 bamíali! (Gén. 31:41, 42).

6. ¿Chu iyiri jarecho namuti we jilírami ikili Jacob?

⁶ Jacob ikili jarecho namuti jilírami. Echi téemala ko wiká nili, nalí echi kúchuwala ko ke sinibí kanila pireili anakupi niraa, jiti la ralineli José japi riká pioni. Ayénachó okuá Jacob kúchuwala, Simeón alí Leví, nokali namuti japi isili japi cha riká raʼichárami nima Jeobá riwalá jitra alí japi we risoa nílitili echi téemala. Jacob we galeli Raquel, nalí echi ko mukuli japalí bilecho raneli. Ayénachó japalí Jacob ma we ochérami nili ke me niruili koʼwáami, jiti la simili bitélisia echomí Egipto (Gén. 34:30; 35:16-19; 37:28; 45:9-11, 28).

7. ¿Chúriká néwariwélitili Jeobá echi Jacob japi ke bineli riweli?

⁷ Tákoré Jacob ikili wiká namuti jilírami, ke riweli bichiwia Jeobá alí echi namuti japi echi isima. Jeobá ko néwariwélitili Jacob japi ke bineli riweli. Tákoré Labán wisabé niraa ékili Jacob, echi ko a olali wiká namuti jiti Jeobá iʼwírili. Japalí Jacob checho ku ineli José, a keʼré japi waʼlú matétara iyali Onorúami jiti echi ko ma wiká bamíali jonsa natia biteili japi ma mukuli. Jacob anáchili suwaba  jepuná namuti jiti echi ko we aʼlá amigo nili Jeobá yúa (Gén. 30:43; 32:9, 10; 46:28-30). Tamujé ayénachó anachabo echi jilírami namuti japi ta ke buwé japi ikimea, ati we aʼlá amigos nísaká Jeobá yúa.

8. ¿Piri isínali David ne sulachí jonsa?

⁸ Echi silíami David ke omérili isiá suwaba namuti japi nakili nóchilimia Jeobá. Japi riká, echi ko ne sulachí jonsa niwílinali bilé kalí echi Onorúami. Japalí David ruyeli Natán japi isínali, echi profeta ko aneli: “Isí japi riká mi ané mujé sulala, jiti echi Onorúami ne bichíwali mi yúa atí” (1 Crón. 17:1, 2). ¿Kechi ko we kanílili David kipusa echi raʼíchali? Ayena, alí a keʼré japi sapú nátili japi chúriká niwama echi kalí.

9. ¿Piri isili David japalí ke omérili isiá japi echi nakili?

⁹ Nalí echi profeta Natán sapú ku nawali anesia David bilé raʼíchali japi ke kanílitima. Echalí rokojó, Jeobá ko aneli Natán japi ke David nima japi niwama echi kalí, nalí bilé echi nolá (1 Crón. 17:3, 4, 11, 12). ¿Piri isili David kipusa echi raʼíchali? Echi ko isili jarecho namuti japi a omérili isiá. Japi riká, echi ko napabuli echi winomí alí jarecho si namuti japi newalema Salomón niwamia echi kalí (1 Crón. 29:1-5).

10. ¿Piri katúwika aneli Jeobá echi David?

¹⁰ Pe aminana japalí Jeobá aneli David japi ke echi nima japi niwama echi kalí, echi ko katúwika isili David yúa alí aneli japi bilé echi téemala nuláami nima sinibí (2 Sam. 7:16). Japalí we baʼóachi nisa jenaʼí Wichimóbachi alí ma nuláachi Jesús echi mili bamíali, David we kanílima machiyá japi bilé echi téemala ju japi nulá. Jepuná historia tamó bineri japi Onorúami tamó iyama wiká namuti aʼláala tákoré ti ke omeri nokayá suwaba namuti japi ta nokinali Jeobá jitra.

11. Tákoré ke ikili japi buweli echi cristianos bachá siglo piréami, ¿chúriká iʼwírili Jeobá? (Hechos 6:7).

¹¹ Echi cristianos bachá siglo piréami ikili namuti jilírami japi ke buweli japi ikimea. Japi riká, echi ko ma nakiyé japi nulama echi Onorúami Gobiérnowala, nalí ke machiyé chu kabú ma nulama (Hech. 1:6, 7). Jiti la, ¿piri nokali? Echi ko iʼwérili nokali nawesia. Japalí ineli japi echi ko a omérili jaréanachó nawesia echi raʼíchali aʼláala, echi ko machili japi Jeobá ju japi echi iʼwirie (leeri Hechos 6:7).

12. Japalí lochea pireili omáana Wichimóbachi, ¿piri nokali echi cristianos bachá siglo piréami?

¹² Jaré bamíali echalí bachá siglo, echi pagótami lochea pireili “ne suníami jenaʼí wichimóbachi” (Hech. 11:28). Echi cristianos ayénachó lochea pireili. Alí a keʼré japi echi wénwala we nátili japi chúriká iyama echi kúchuwala japi newalé. Ayénachó echi remalí japi natia mochili aminabi we nóchilimia Jeobá, a keʼré japi nátili japi pe aminana echi riká nokimea. Tákoré echi riká ikili, echi ko ke siweli. Nalí echi ko iʼwérili nokali nawesia alí iʼwiria echi hermanos Judea piréami nijika echi kuabi namuti japi olayé (Hech. 11:29, 30).

13. ¿Piri namuti aʼláala nareli echi cristianos japalí omáana lochea pireili?

¹³ ¿Piri namuti aʼláala nareli echi cristianos japalí omáana lochea pireili? Jaré echi ko nareli koʼwáami alí jarecho si namuti alí ineli japi Jeobá ke siné awénili riweli (Mat. 6:31-33, TNM). Ayénachó  a keʼré japi echi ko we mulipi nílili echi hermanos yúa japi echi iʼwírili. Alí echi japi nijili winomí o japi simíali tóolia koʼwáami echi hermanos a keʼré japi we kanílili (Hech. 20:35). Jeobá ko iʼwírili sinéami echi, jiti ke siweli.

14. ¿Piri ikili Bernabé alí Pablo, alí piri aʼláala namuti ikili pe aminana? (Hechos 14:21, 22).

¹⁴ Echi cristianos bachá siglo piréami risoa olárami nili, jepuná ko wisabé niraa ikili japalí echi ke buweli japi echi riká ikimea. Ma binepo japi ikili Bernabé alí Pablo japalí nawesia járili echomí Listra. Ne kulí ko, echi pagótami we kanílika nareli alí we aʼlá kipuli. Nalí miná ko, jaré pagótami sayérili Pablo alí ne sojí miʼali basibuka rité jitra. Ayénachó nokali japi jarecho echi yúa napawima echi sayérimia (Hech. 14:19). Japalí echi riká ikili, Pablo alí Bernabé biléanachó simíali nawisasia. Alí, ¿piri namuti aʼláala ikili? “Wikabé pagótami galá bichíirali”, ayénachó japi riká nokali echi, iʼwérili iyali echi hermanos (leeri Hechos 14:21, 22). Tákoré sayéritami nili, Bernabé alí Pablo ke siweli alí jepuná ko we iʼwírili wiká pagótami. Echi riká cho, ati ke siwésaká alí ti aminabi nokisáaká echi nóchali japi Jeobá tamó iyali, echi ko tamó iyama wiká namuti aʼláala.

15. ¿Piri mi biné echi hermano Alexander Macmillan jitra?

¹⁵ Kecho bijí séachi bamíali 1914, echi japi Jeobá nijéwami nili buwea pireili bilé namuti. Bilé echi ko nili echi hermano Alexander Macmillan. Wiká japi echalí pireili, nátili japi ma mulipi simama ripá siyónachi alí echi hermano echi riká cho nátili. Echoná nawésali japi echi nijili septiembre 1914, echi ko anili: “A keʼré japi jepuná ju echi jubá nawésali japi ni nijima”. Nalí ke echi riká nili, jiti pe aminana echi ko osali: “Jaré ko ati mayeli japi ti ma mulipi simabo ripá siyónachi”. Alí ayénachó anili: “Japi ta nokisáré ko ju aminabi we nóchilia Jeobá”. Alí echi riká isili. Echi ko iʼwérika isili nawesia alí ayénachó iʼwérili iyali echi hermanos japi erta mochili jiti bichíyami nili. Ke riweli simiyá napawíliwachi tákoré ma we ochérami nili. Isili suwaba japi omérili nóchilia Jeobá alí kilí niraa buweli echi namuti japi narema. Isiá echi namuti, ¿chúriká iʼwírili? Kecho bijí mukuyá echalí bamíali 1966, echi ko osali: “Jipi ani we bichíyami ju japi riká ni nili sinibí”. Sinéami japi ta ma wiká bamíali jonsa buwé japi suwábitami nima echi chati namuti, ati nokisáré japi riká isili echi hermano (Heb. 13:7).

16. ¿Piri namuti we jilírami ikili echi hermano Jennings alí echi upila? (Santiago 4:14).

¹⁶ Wiká japi Jeobá nijéwami ju, nayúa piré bilé nayulí jitra japi ke mayeli japi nayuma. Japi riká, echi hermano Herbert Jennings anili japi echi alí echi upila we kanila pireili japalí misioneros nili echomí Ghana. b Nalí pe aminana echi ko nayuli bilé nayulí we chati echoná mochokóala japi isili japi ke aʼlá natama. Echi hermano Jennings anili japi echi ko ke siné mayeli japi echi riká ikimea japi riká aní Santiago 4:14 (leeri). Jiti la, echi alí echi upila aneli echi hermanos alí amigos echoná Ghana piréami japi ku simama Canadá naremia echi ówili. Jeobá ko iʼwírili echi hermano  Jennings alí echi upila jiti ke riwema aminabi echi nóchilia tákoré we jilírami namuti ikili.

17. Japi riká isili echi hermano Jennings, ¿chúriká iʼwírili jarecho?

¹⁷ Japi riká anili echi hermano Jennings we iʼwírili jarecho. Bilé hermana ko anili: “Ke bilé artículo isili japi ni omona nílima japi riká jepuná [...]. Machiyá japi echi hermano Jennings riweli misionero niya naremia echi ówili echi nawilí we chati jitra, tamí iʼwírili jiti ni ke me natama echi namuti japi ni ikí”. Bilecho hermano anili: “Makoy bamíali anciano nisa, ani ma riweki echi nóchali jiti ni nayuli bilé nayulí nijé mochokóalachi japi isili japi ni ke me aʼlá natama. Ani we omona nili alí ni we jilí nirae leeria japi riká biteili jarecho [...]. Nalí, inea japi echi hermano Jennings ke riweli nóchilia Jeobá tákoré nayuli, tamí iʼwírili”. Jepuná ko tamó bineri japi ati anachásaká echi karú ikiwáami japi ta ke buweli japi ikimea alí ti ke pirélisaká japi riká ti nakí, ati iʼwérili iyabo jarecho alí iʼwíripo (1 Ped. 5:9).

18. ¿Piri ta biné echi mukí kunámami Nigeria bitéami jitra? (Iné echi fotos japi néwariwéliti japi chúriká ikíliré).

¹⁸ Nayulí japi riká COVID-19 we risoa nílitili japi Jeobá nijéwami ju. Japi riká, bilé hermana kunámami Nigeria bitéami olali pe kuabi koʼwáami alí winomí. Siné biʼá japalí ma bilepi taza arroz bi olali, echi ranala ko nárili echi iyela piri koʼmea aminá ko. Echi hermana ko aneli japi ma ke niruili koʼwáami alí winomí, nalí japi nokisaa riweili japi riká isili echi mukí kunámami Sarepta bitéami: wasia echi koʼwáami bi japi olali alí we bichiwia Jeobá (1 Rey. 17:8-16). Japalí kecho bijí nátili piri koʼmea echalí biʼá, echi hermanos iyali bilé bolsa koʼwáami muchúwami japi júali echi comité de socorro. ¡Echi bolsa  ko muchúwami nili koʼwáami japi koʼmea okuá tarali simírikami! Echalí echi hermana ko machili japi Jeobá we aʼlá kipuli japi echi aneli echi ranala. Echi riká cho, tamujé we bichíwisaká Jeobá, ati we mulipi nílipo echi yúa tákoré ti ikiyé namuti jilírami japi ta ke buweli japi ikimea (1 Ped. 5:6, 7).

19. ¿Piri namuti jilírami ikili echi hermano Alexéi Yershov?

¹⁹ Ma jaré bamíali jonsa, wiká japi Jeobá nijéwami ju ikí namuti we jilírami japi ke buweli japi ikimea: risoa olárami ju. Ma inepo japi ikili echi hermano Alexéi Yershov, Rusia bitéami. Japalí echi pakoli, bamíali 1994, echi testigos we kanila nóchili Jeobá jiti kecho sayéritami nili. Nalí pe aminana ikili namuti we jilírami echoná Rusia. Bamíali 2020 jaré sontarsi sili echi hermano Yershov bitélachi alí chibi riká riweli echi namuti aaya japi echi nakili, ayénachó iyeli wiká namuti japi echi olali. Miná ko, echi weli jáwami anili japi echi isili wiká chati namuti. Nalí ke echi bi nili, ayénachó riwírili jaré videos japi grabáritami nili bilé pagótami jitra japi ma bilé bamíali Biblia binea asali echi yúa alí japi isili japi riká ko we natéami niraa inea japi biné, nalí ke bichíwali nili.

20. ¿Piri isili echi hermano Yershov aminá we aʼlá amigo nimia Jeobá yúa?

²⁰ Nalí, ¿chúriká iʼwírili echi hermano Yershov echi jilírami namuti japi ikili? Echi ko wabé aʼlá amigo ju Jeobá yúa. Echi ko aní: “Nijé alí nijé upila ati aminá we raʼicha Jeobá yúa. Nijé ko aʼlá machí japi ni ke anachama echi jilírami namuti ke Jeobá tamí iʼwírisaká”. Ayénachó aní: “Binea echi Biblia tamí iʼwiri jiti ni ke siwema. Ani nata echi pagótami jitra chabé piréami japi we aʼlá Jeobá nijéwami nili. Echoná Biblia nirú wiká historias japi néwariwéliti japi we natéami ju japi ta kilí nílipo alí we bichíwipo Jeobá”.

21. ¿Piri ta bineli jena binelíwami?

²¹ ¿Piri ta bineli jena binelíwami? Tákoré jipi ati ikí namuti japi ta ke buwé japi ikimea, nalí ati we bichíwisaká Jeobá, echi ko sinibí tamó iʼwírima. Alí japi riká aní echi texto japoná machiburi na binelíwami, “wiká ju echi karú ikiwáami japi ikí echi japi nijéwami ju, nalí Jeobá ko iʼwiri jiti anachama suwaba japi ikí” (Sal. 34:19). Jiti la, ke we natabo echi jilírami namuti japi ta ikí, nalí natabo japi Jeobá tamó iʼwírima. Echi riká ti nokisáaká, ati aniboa japi riká Pablo: “Jiti Onorúami tamí iʼwiri, ani omérima anachia suwaba japi ikí” (Filip. 4:13, TNM).