BINELÍWAMI 19
¿Piri ta nokiboa jiti aminabi bichíwipo japi echi Wichimoba we baʼóami nima?
“Japalí echi [Jeobá] aní bilé namuti, ¿wechi ke echi riká isimí?” (NÚM. 23:19).
CANCIÓN sjj 142 Ata buwé japi isímaré Jeobá
JAPI BINÉPORÉ a
1, 2. ¿Piri ta nokisáré kecho bijí séachi echi Wichimóbachi we baʼóachi?
ATI waʼlú matétara iyá Jeobá jiti echi ko aní japi jenaʼí Wichimoba japoná we cha riká wilí, checho ku we aʼlá niwama (2 Ped. 3:13). Tákoré ti ke machí chu kabú we simá riwélima jenaʼí, nalí ineka echi namuti japi ikísimi omáana ati machí japi ma mulipi echi riká ikimea (Mat. 24:32-34, 36; Hech. 1:7).
2 Jaré ko ma wiká bamibi Testigos ka alí jaré ko pe kuabi, nalí sinéami ata iʼwérili nokisáré jiti ke riwepo bichiwia echi aʼláala namuti japi ikimea. ¿Chúsiá echi riká nokiboa? Jiti echi japi we bichíyami ju siné kaachi ayénachó ma ke me bichiwia nílimiré. Pablo anili japi ata ke bichíyami nísaká “echi chati sitíi oluwáwami mapu tamujé tamí ne buchuwí [o we sapú], ne noligá bulé” (Heb. 12:1). Jiti ke echi riká ikiboa, ati sinibí binésaré echi namuti japi néwariwéliti japi ma mulipi we baʼóami nima jenaʼí Wichimóbachi (Heb. 11:1).
3. ¿Piri binepo jenaʼí binelíwami?
3 Jenaʼí binelíwami binepo bikiá namuti japi tamó iʼwírima aminabi we bichiwia japi we baʼóami nima jenaʼí Wichimóbachi: 1) natabo japi Jesús mukuli tamujé jitra, 2) natia japi Jeobá we jiwérami ju alí 3) we natéami niraa inepo nóchilia Jeobá. Miná ko binepo japi echi raʼíchali japi Jeobá aneli Habacuc ayénachó tamó iʼwiri jiti aminabi we bichíwipo. Nalí bachá binepo chúsiá we natéami ju japi ti we bichíwipo japi pe aminana we simá riwélima jenaʼí Wichimóbachi.
CHÚSIÁ TI NEWALÉ JAPI TA WE BICHÍYAMI NIPO
4. ¿Chu iyiri namuti japi ta noká newalé japi ta we bichíyami nipo?
4 Sinibí rawé ati noká namuti japoná newalé japi ta we bichíyami nipo. Japi riká ati sinibí nata chúriká ti nokiboa jepuná namuti jitra: amigos, japi ta binepo, niwíkami, kúchuwala alí echi nóchali. Nárika nokiboa: “¿Piri néwariwéliti japi ni isimí? ¿Achi ni néwariwéliti japi ni we bichiwi japi suwábitami nima echi namuti japi nirú jenaʼí Wichimóbachi alí japi we baʼóami nima? ¿O achi ni néwariwéliti japi ni ju japi riká jarecho pagótami japi nata japi ma ke ku pirélipo?” (Mat. 6:19, 20; Luc. 12:16-21). Ati iʼwérili nokisáaká aminabi bichiwia japi echi Wichimóbachi we baʼóachi ma mulipi nima, ati aʼlá namuti nokiboa.
5, 6. ¿Chúsiá ti we bichíyami nísaré japalí ti ikí namuti we jilírami? Ruyé bilé ejemplo.
5 Ayénachó ati ikí namuti we jilírami japoná ti newalé japi ta we bichíyami nipo. Japi riká, japalí ti najátarami ju, echi nayulí we chati o jarecho si namuti japi isima japi ta majabo. A keʼré japi ne kulí ko ati iʼwérili nokiboa anachia echi karú ikiwáami, nalí ma wilí rojorásakó ati newaléboré japi ta we bichíyami nipo jiti sinibí anachabo alí jiti ke riwepo kanílika nóchilia Jeobá (Rom. 12:12; 1 Ped. 1:6, 7).
6 Japalí ti ikí namuti jilírami ati níliporé japi Jeobá ke siné isima japi we baʼóachi nima jenaʼí Wichimóbachi. Echi riká ti nílisaká, ¿aniwáami ju japi ta ke me bichíyami ju? Ke. Natabo bilé ejemplo. Japalí we rulálisa ati níliporé japi ke ku sibama japalí ratáachi ju, nalí ke echi riká ju jiti sinibí a ku sea japalí ratáachi ju. Echi riká cho ju japalí ti we siwea nili, ati níliporé japi ke siné sibama echi Wichimóbachi baʼóachi. Nalí ati we bichíyami nísaká, ati machí japi a echi riká ikimea (Sal. 94:3, 14, 15; Heb. 6:17-19, TNM) Ayénachó japalí ti we bichiwi tamó iʼwírima japi sinibí ne bachá we natéami niraa inepo nijewia Jeobá.
7. ¿Piri ta ke natásaré?
7 Japalí ti simía nawisasia ayénachó ti newalé japi we bichíyami nipo. ¿Chúsiá? Jiti japalí ti raʼicha echi pagótami yúa japi Onorúami we simá rikáachi niwama jenaʼí Wichimóbachi, wiká ko aní japi ke bichíwali ju (Mat. 24:14; Ezeq. 33:32). Nalí tamujé ko iʼwérili nokiboa jiti ke echi riká cho natabo. Jiti la we natéami ju japi ta we bichíyami nipo. Ma binepo bikiá namuti japi tamó iʼwírima echi riká nokayá.
NATABO JAPI JEOBÁ ALÍ JESÚS NOKALI TAMUJÉ JITRA
8, 9. Japi riká nokali Jeobá alí Jesús, ¿chúriká tamó iʼwiri aminabi bichiwia?
8 Bilé namuti japi tamó iʼwírima aminabi we bichiwia, echi ko ju natia japi Jesús mukuli tamujé jitra. ¿Chúsiá? Jiti echi jitra ta machí japi a ne bichíwali ikimea japi riká Onorúami anili. We natéami ju japi ta natabo chúsiá Jesús mukuli alí chúsiá Jeobá riweli japi mukumea tamujé jitra. Echi riká ti nokisáaká, ati aminabi we bichíwipo japi Jeobá isima japi ma mulipi we simárika riwélima jenaʼí Wichimóbachi, japoná ti we kanílika pirélipo sinibí. ¿Chúsiá ti echi riká aní?
9 Natabo chúsiá we natéami nili japi nokali Jeobá alí Jesús. Jeobá echoná ripá riwigachi jonsa júali binoy nolá japi we galeli alí japi echi amígowala nili, jiti ochérima jenaʼí Wichimóbachi japi riká bilé rijoi nalí sébali aʼlá isíami. Japalí Jesús biteili jenaʼí Wichimóbachi, ikili namuti we jilírami alí we risoa olari japalí miʼliiri. Jeobá ko we jilí nirali inea japalí echi nolá mukuli. Jiti Jeobá we galéami ju, ati machí japi echi ko ke siné isima riweili japi binoy nolá we risoa ikimea jiti tamujé pe kuabi bamíali pirélipo (Juan 3:16, TNM; 1 Ped. 1:18, 19). Jeobá nijili binoy nolá japi riká mukumea tamujé jitra, jiti la echi ko isima japi ta sinibí pirélipo jenaʼí Wichimóbachi.
NATABO JAPI JEOBÁ WE JIWÉRAMI JU
10. Japi riká aní Efesios 3:20, ¿piri omeri isiá Jeobá?
10 Bilecho namuti japi tamó iʼwírima aminabi we bichíyami niya, echi ko ju natia japi Jeobá we jiwérami ju. Echi ko a omeri isiá suwaba japi echi aní. A bichíwali ju japi tamujé ko ati jilí niráboré natia japi ta a oméripo sinibí pirea jenaʼí Wichimóbachi, nalí Jeobá ko sinibí aní japi isima namuti japi tamujé ko inili japi ke siné ikimea, jiti echi ko we jiwérami ju (Job 42:2; Mar. 10:27). Jiti la tamujé ko bichiwi japi echi ko a omérima isiá japi tamujé we jilí niraa (leeri Efesios 3:20).
11. Aní bilé namuti japi Jeobá anili japi ikimea riweili alí a echi riká ikili (iné echi recuadro “ Jaré namuti japi Jeobá anili japi ikimea riweili alí a echi riká ikili”).
11 Natabo jaré namuti japi Jeobá aneli japi echi nijéwami nili alí japi wiká mayeli japi ke echi riká ikimea. Japi riká, echi ko aneli Abrahán japi Sara ranélima tákoré echi ko ma wiláami nili (Gén. 17:15-17). Ayénachó aneli Abrahán japi iyama echi kúchuwala echi weʼé japi cananeos níwala nili. Nalí wiká bamíali echi israelitas, japi Abrahán kúchuwala nili, pireili japi riká pioni echomí Egipto, jiti la mayéliré japi Jeobá aneli Abrahán ke siné echi riká ikimea. Nalí, a echi riká ikili. Miná ko ma wiká bamíali simírisa, Jeobá aneli Elisabet japi ranélima bilé towí tákoré ma wiláami nili. Ayénachó aneli bilé tiwé María riwéami japi ranélima echi binoy Nolá. Echi ko ikimea riweili japi riká ma anili wiká mili bamíali jonsa echoná weʼé we baʼóachi Edén riwéami (Gén. 3:15).
12. Japi riká aní Josué 23:14 alí Isaías 55:10, 11, ¿chúriká ti machí japi Jeobá a omeri isiá japi aní?
12 Ata iné japi Jeobá we jiwérami ju jiti echi ko suwaba isili japi anili. Jepuná tamó iʼwiri jiti aminabi bichíwipo japi we simárika niwama jenaʼí Wichimóbachi (leeri Josué 23:14; Isaías 55:10, 11). Ati we bichíyami nísaká, ati oméripo iʼwiria jarecho jiti ayénachó bichíwima japi jenaʼí Wichimoba baʼóami nima. Jeobá ko anili echi kulíwami ripá rewegachi alí kulíwami wichimóbachi jitra: “Suwaba jeʼná raʼíchali [...] ne bichíwali ju” (Apoc. 21:1, 5).
NOKIBOA ECHI NAMUTI JAPI TAMÓ IʼWIRI AMINABI WE BICHÍYAMI NIYA
ECHI NAPAWÍLIWAMI
¿Chúriká tamó iʼwiri jepuná namuti jiti aminabi bichíyami nipo? (Iné echi párrafo 13).
13. ¿Chúriká tamó iʼwiri echi napawíliwami jiti aminabi we bichíyami nipo?
13 Bilecho namuti we natéami ko ju, nokayá echi namuti japi tamó iʼwírima aminabi we bichíyami niya, japi riká echi napawíliwami. Anna, b japi ma wiká bamíali nóchili Jeobá tiempo completo niraa alí sinúrika nóchali, aní: “Echi napawíliwami we tamí iʼwiri jiti ni aminabi bichíyami nima. Tákoré echi japi nawesia wilí ke me machí nijía nawésali o ke aní bilé namuti japi kulíwami ju, sinibí ni a kipú bilé namuti japi tamí iʼwiri we aʼlá inamia japi aní echi Biblia, echi tamí iʼwiri aminabi we bichiwia”. Echoná napawíliwachi ayénachó ti kipú comentarios japi tamó iʼwiri aminabi we bichiwia (Rom. 1:11, 12; 10:17).
NAWESIA
¿Chúriká tamó iʼwiri jepuná namuti jiti aminabi bichíyami nipo? (Iné echi párrafo 14).
14. ¿Chúriká tamó iʼwiri simiyá nawisasia jiti ta aminabi we bichíyami nipo?
14 Ayénachó japalí ti simía nawisasia, tamó iʼwiri jiti aminabi bichíyami nipo (Heb. 10:23). Bárbara, japi 70 bamíali simírikami jonsa testigo Jeobá ju, aní: “Simiyá nawisasia sinibí tamí iʼwiri jiti ni we bichíyami nima. Japalí ni we raʼicha Jeobá jitra alí echi semati namuti japi isima, ani iné japi echi tamí iʼwiri jiti ni aminabi we bichíyami nima”.
BINELI NIRAA BINEA
¿Chúriká tamó iʼwiri jepuná namuti jiti aminabi bichíyami nipo? (Iné echi párrafo 15).
15. ¿Chúriká tamó iʼwiri aminabi we bichíyami niya japalí ti bineli niraa biné? (Ayénachó iné echi dibujos).
15 Echi upáwala namuti japi tamó iʼwírima aminabi we bichiwia, echi ko ju japalí mi bineli niraa biné. Susan ko aní japi echi we iʼwiri olayá bilé hora japi chúrikó binema. Echi ko aní: “Oméachi ko ni biné oselí Echi Nawésami japi binepo biléala tarali. Lunes alí martes ko ni biné japi binepo echoná napawíliwachi japi ju nasipa tarali. Alí jaréala rawé ko ani biné echi namuti jitra japi ni machinali”. Jiti echi riká isimí binea, Susan ko aminabi we bichíyami ju. Irene, japi wiká bamíali nochi echoná central mundial, we iʼwiri aminabi we bichíyami niya binea echi profecías japi uchuwi echoná Biblia. Echi ko aní: “We ni kanili inea japi echi profecías japi Jeobá anili a ne echi riká ikísimi”. c
“NE BICHÍWALI ECHI RIKÁ IKIMEA”
16. ¿Chúsiá ta machí japi Jeobá aneli Habacuc ke echi bi aneli? (Hebreos 10:36, 37).
16 Jaré japi Jeobá nijéwami ju ma chabé jonsa buwé japi suwábitami nima echi chati namuti. Jiti la wiká ko natámiré japi ke siné echi riká ikimea. Jeobá ko a machí japi chu nili japi echi nijéwami ju, jiti la echi ko aneli echi profeta Habacuc: “Jiti a bijí wiliri japi sibama echalí rawé japi mi ineli, alí ma mulipi nílisimi japalí ikimea, alí ne echi riká ikimea. Tákoré wilí isimí, ¡aminabi a buwésiki! Ne bichíwali echi riká ikimea. ¡Tasi wilí sika nawama!” (Hab. 2:3). ¿Achi Jeobá Habacuc bi aneli echi raʼíchali, o ayénachó tamó iʼwérili iyá jipi rawé? Jeobá ko isili japi echi apóstol Pablo anema echi raʼíchali echi cristianos japi buwea muchuwi echi Wichimóbachi we baʼóami (leeri Hebreos 10:36, 37, TNM). Ati níliaká japi wilí isimí, newalabo japi Jeobá aní: “Ne bichíwali echi riká ikimea. ¡Tasi wilí sika nawama!”.
17. ¿Chúriká nijéwili bilé hermana japi Jeobá aneli Habacuc?
17 Wiká cristianos a nijéwili japi Jeobá anili japi ta buwésaré alí echi riká nokali wiká bamíali. Echi riká ikili bilé hermana Louise riwéami japi chotásili nóchilia Jeobá bamíali 1939. Echi ko jéaní: “Ke ni siné nátiki japi ni sibama 18 bamiba, jiti ni mayéi japi bachá nawama echi Armagedón. Nalí ke echi riká ikili. Japi tamí iʼwírili suwaba echi bamíali ko ju leeria echi historias echi pagótami jitra japi kilí buweli, japi riká Noé, Abrahán, José alí jarecho si japi Jeobá nijéwami nili. Echi ko kilí buweli jiti narema echi namuti aʼláala japi Jeobá aneli japi iyama. Aminabi a buwea tamí iʼwiri alí jarecho si jiti ni ke wikawama japi ma mulipi nawama echi kulíwami Wichimóbachi”. Alí jarecho japi ma wiká bamíali nóchili Jeobá, ayénachó echi riká nata japi riká Louise.
18. ¿Chúriká tamó iʼwiri echi namuti japi ikí nirú bichiwia japi Jeobá niwama echi Wichimóbachi we baʼóachi?
18 A bichíwali ju japi tamujé kecho iné echi Wichimóbachi we baʼóachi, nalí a nirú namuti japi ta a iné, japi riká sipolí, rojá, namuti jákami alí echi pagótami. Tákoré echi namuti ke sinibí niruili, ke bilé aní japi ke bichíwali ju. Echi namuti a nirú jiti Jeobá niwali (Gén. 1:1, 26, 27). Alí Onorúami ko anili japi we baʼóami niwama jenaʼí Wichimóbachi alí echi riká isima. Ati sinibí pirélipo alí ma ke siné nayupo. Japalí ma sebasa echi rawé japi Jeobá anili, ati oméripo inea echi Wichimóbachi we baʼóachi japi riká ti omeri inea echi namuti japi nirú jipi (Is. 65:17; Apoc. 21:3, 4).
19. ¿Piri ta nokisáré jiti aminabi we bichíyami nipo?
19 Kecho bijí séachi echi Wichimóbachi we baʼóachi, iʼwérili nokiboa jiti aminabi we bichíyami nipo. Natabo japi nokali Jeobá alí Jesús tamujé jitra, japi Jeobá we jiwérami ju alí nokiboa echi namuti japi tamó iʼwiri aminabi we bichíyami niya. Ati nokisáaká suwaba echi namuti, ata pirélipo echoná Wichimóbachi we baʼóachi jiti ta we bichíyami nili (Heb. 6:11, 12, TNM; Rom. 5:5).
CANCIÓN sjj 139 ¿Ami ma simírika nili we baʼóachi kawí?
a Jipi rawé wiká pagótami ke bichiwi japi Jeobá we baʼóami niwama jenaʼí Wichimóbachi, aní japi we aʼlá ju nalí ke mayé japi echi riká ikimea, iné japi riká ko bilé cuento. Tamujé ko we bichiwi japi Jeobá a isima suwaba japi anili. Nalí jiti ke riwepo bichiwia echi, ati aminabi binésisaré. Jenaʼí binelíwami binepo chúriká nokiboa.
b Sinúrika ju jaré riwalá.
c Echoná Índice de las publicaciones Watch Tower ami áasaká echi raʼíchali “Profecía” echoná mi riwimea wiká oselí japi raʼicha echi profecías japi uchuwi echoná Biblia. Japi riká, iné japi aní echi artículo riwéami “Lo que Jehová predice se cumple sin falta”, echoná oselí Echi Nawésami 1 inárachi enero 2008.
