1. ¿Piri nakí Jeobá japi ta nokiboa?

 ECHI niwíkami we kanili japalí nawá echi ranala. Echi okuánika we galé echi taa muchi. We be nalí, echi ko ke nakí japi sinibí taa muchi nima, nalí nakí japi ochérima. Jiti ke ochérisaká, echi ko natama japi nayúami ju. Echi riká cho, Jeobá ko we kanili japalí tamujé kulí chotasi binesia echi jitra, nalí ke nakí japi ta echi riká bi ripibo japi riká “kúuchi niráa” (1 Cor. 3:1). Echi ko nalí nakí japi ta aminabi binésipo alí “ne galá machigá ʼnátami [nipo] mapurigá echi jaré mapu ma ochérami ju” (1 Cor. 14:20).

2. ¿Piri náriwami binepo jena binelíwami?

² Jenaʼí binelíwami ata binepo jepuná náriwami jitra: ¿piri aniwáami ju niya bilé cristiano ma ochérikami?, ¿piri ta nokisáré jiti cristianos ochérikami nipo?, ¿chúsiá we natéami ju japi ta we aʼlá binepo echi busuréliami japi uchuwi echoná Biblia? Alí, ¿chúsiá ti ke natásaré japi ta we machíami ju alí japi ta ma ke newalé aminabi muliwia Jeobá?

¿PIRI ANIWÁAMI JU NIYA BILÉ CRISTIANO MA OCHÉRIKAMI?

3. ¿Piri aniwáami ju bilé cristiano ma ochérikami niya?

³ Japalí echoná Biblia aní cristiano ma ochérikami, ke bi ruyá aní japi ma wiká bamíbami ju, nalí echi ko ruyá aní japi echi pagótami ma aʼlá nátami ju alí we aʼlá machí japi aʼlá ju alí japi ke aʼlá ju (1 Cor. 2:6, TNM). Ati cristianos ma ochérikami nílisimi, japalí ti aminabi iʼwérili noká Jeobá amígowala niya alí ma ti ke noká japi riká kuuchi niraa. Nalí ma ti Jeobá amígowala nísakó, ¿achi aniwáami ju japi ma ke bilé namuti nokiboa? Ke tasi. Tamujé ko aminabi iʼwérili nokiboa Onorúami nóchilia alí wabé aʼlá  echi amígowala niya (1 Tim. 4:15). Nalí, ¿chúriká ti machiboa japi bilé cristiano ma ochérikami ju tákoré kuabi bamíbami ju o wiká ma?

4. ¿Chúriká isimí bilé cristiano japi ma ochérikami ju?

⁴ ¿Chúriká isimí bilé cristiano japi ma ochérikami ju? Echi ko nijewi suwaba echi namuti japi Jeobá nulá, ke echi namuti bi japi binoy nakí. Alí tákoré ke sébali aʼlá isíami ju alí isini kaachi isímiré namuti japi ke aʼlá ju, echi ko iʼwérili isimí natia alí isiá japi riká Jeobá (Efes. 4:22-24). Ayénachó echi ko we aʼlá nátika isimí jiti we aʼlá binéami ju echi Biblia jitra, jiti la echi ko ke newalé japi anérami nima ibili namuti japi echi isísaré. Alí japalí ma we aʼlá machí japi isima, echi ko iʼwérili isimí echi riká isiá (1 Cor. 9:26, 27).

5. ¿Piri ikiméeré echi cristiano japi ke ochérikami ju? (Efesios 4:14, 15).

⁵ We be nalí, echi cristiano japi ke ochérikami ju, a keʼré japi sapú ékitami nima jiti sapú “bichíi mapalí jaré pagótami auché siʼnú niráa ʼyékaka binera”, japi riká noká echi apóstatas alí jarecho si (leeri Efesios 4:14, 15). a Ayénachó sapú iyómiré jarecho yúa, a keʼré japi we koruma japi jarecho olá alí we sapú isímiré japi chati ju (1 Cor. 3:3).

6. ¿Chu iyiri ejemplo tamó iʼwiri inamia japi chúriká bilé cristiano ma ochérikami nílisimi? (Ayénachó iné echi imágenes).

⁶ Japi riká ti ma bineli, echi Biblia aní japi niya bilé cristiano ma ochérikami, echi ko ju japi riká ikí bilé towí o tiwé japalí ocheri waʼlú nílimia. Japi riká bilé towí o tiwé ke machí wiká namuti, echi ko newalé japi echi wénwala tibuma alí iʼwírima. Japi riká japalí echi simírima echoná calle, echi iyela chapiká yúrima echi tiwé. Pe aminana japalí ma pe waʼlú ju, echi iyela riwema japi bineli simírima echoná calle, nalí a bijí anema japi tibuka inema simíriachi echi carros. We be nalí, japalí echi ko ma ochérikami ju, ma ke newalema iʼwírili. Echi riká cho, echi cristiano japi kecho  bijí ochérikami ju, a keʼré japi newalema japi bilé cristiano japi we aʼlá Jeobá amígowala ju, iʼwírima aʼlá nátika isiá. Nalí echi cristiano japi ma ochérikami ju, ma ke newalé japi jarecho iʼwírima aʼlá nátika isiá jiti echi ko ma we aʼlá machí piri nata Jeobá.

7. ¿Achi newalé echi cristianos ochérikami japi jarecho iʼwírima?

⁷ ¿Achi aniwáami ju japi echi cristianos ma ochérikami ke newalé iʼwírili? Ke tasi. Echi ko isini kaachi newalema iʼwírili. Nalí be, ke ju japi riká bilé taa towí japi newalé japi jarecho anema piri isísaré. Echi cristiano japi ma ochérikami ju, aʼlá kipú echi busuréliami japi ané echi hermanos japi we machíami ju. Nalí echi ko ayénachó machí japi “ibili niráa ku ʼyárami níima achigórigá mapurigá aboni [o binoy] olali” (Gál. 6:5).

8. ¿Chúsiá sinéami cristianos ochérikami ke chopi iyiri ju?

⁸ Japi riká echi pagótami ke chopi iyiri ju, echi riká cho echi cristianos ke chopi iyiri nokáami ju. Japi riká, jaré ko we machíami ju, jaré ko ke majáami, jaré ko simá nokáami alí jarecho ko we natimáami ju. Echi riká cho, okuá cristianos ma ochérikami, ke chopi iyiri namuti nokimea bilé namuti jitra, nalí okuánika nokimea japi aní echi Biblia. Jiti la, ke bilé cha riká natama japi isili biléala, nalí okuánika iʼwérili nokimea jiti napawika nima (Rom. 14:10; 1 Cor. 1:10).

¿PIRI TA NOKISÁRÉ JITI CRISTIANOS OCHÉRIKAMI NIPO?

9. ¿Chúriká ta machí japi bilé cristiano ke binoy Jeobá amígowala nima ke iʼwérili isísaká?

⁹ Bilé towí binoy ocheri, nalí bilé cristiano ke binoy Jeobá amígowala nima ke iʼwérili isísaká. Echi riká ikili echi cristianos Corinto piréami. Echi ko kipuli echi Onorúami Raʼicháala jitra, nareli echi espíritu santo alí bineli wiká namuti echi apóstol Pablo jitra (Hech. 18:8-11). Nalí, japalí ma jaré bamíali simírili japalí jonsa pakoli, wiká a bijí nili japi riká cristianos ke ochérikami (1 Cor. 3:2). Jiti la, ¿piri ta nokisáré jiti tamujé ke echi riká cho ikiboa?

10. ¿Piri tamó iʼwírima jiti cristianos ma ochérikami nipo? (Judas 20).

¹⁰ Jiti cristianos ma ochérikami nipo, ati bachá nílisaré echi riká nínalia. Tamujé ke nínali japi riká echi kuuchi japi ke machíami ju alí japi newalé japi echi wénwala anema japi nokimea (Prov. 1:22). Tamujé ko nalí ibili niraa iʼwérili nokinali aminabi muliwia Jeobá (leeri Judas 20). Ami níliaká japi mi a bijí newalé cristiano ochérikami niya, tani Jeobá japi mi iʼwírima, jiti echoná Biblia jéaní: “Onorúami ko ju japi isimí japi timí nokinálima japi aʼlá ju alí jiwérili nijí jiti timí echi riká nokimea” (Filip. 2:13, TNM).

11. ¿Chúriká tamó iʼwiri Jeobá jiti aminabi cristianos ochérikami nipo? (Efesios 4:11-13).

¹¹ Jeobá ko ke buwé japi ta awénili niraa ochérikami nipo. Echi ko nijili echi ancianos japi muchuwi echoná congregación jiti tamó iʼwírima aminabi muliwia Jeobá (leeri Efesios 4:11-13, TNM). Jeobá ayénachó tamó iʼwiri echi espíritu santo jitra jiti natabo japi riká Jesús (1 Cor. 2:14-16). Alí isili japi echoná Biblia oserúa ripima echi naó Evangelios, jiti echi riká tamujé aminabi we aʼlá machiboa Jesús jitra. Ata nokisáaká japi riká Jesús isili alí nátili, tamujé ko cristianos ma ochérikami nipo.

 WE NATÉAMI JU JAPI TA AʼLÁ BINEPO ECHI BUSURÉLIAMI JAPI UCHUWI ECHONÁ BIBLIA

12. ¿Chu iyiri ju echi namuti “máputa ne chokichí bichíili mapalita chótali Jesucristo yuwa najata”?

¹² Jiti ta cristianos ochérikami nipo, ke ti bi machisáré echi namuti “máputa ne chokichí bichíili mapalita chótali Jesucristo yuwa najata”. ¿Chu iyiri ju echi namuti “máputa ne chokichí bichíili”? Jaré echi ko ju japi echi suwíami checho ku pirélima, japi ta omona nílipo echi chati namuti jitra japi ta nokali alí japi ta pakósaré (Heb. 6:1, 2). Sinéami japi ta ne bichíwali cristianos ju, ati machisáré echi namuti. Jiti la Pedro echi jitra raʼíchili japalí binérili wiká pagótami echalí Pentecostés (Hech. 2:32-35, 38). Jiti Jesús najátowala nipo, we natéami ju japi ta we aʼlá bichíwipo echi namuti. Pablo ayénachó anili japi echi pagótami japi ke bichiwi japi echi suwíami checho ku pirélima, echi ko ju japi riká ko ke bichiwia suwaba echi namuti japi Jesús binérili (1 Cor. 15:12-14). Nalí be, ke ti machiyá bi ripísaré echi namuti japi ta ne chokichí jonsa bineli.

13. ¿Piri ta nokisáré jiti cristianos ma ochérikami nipo? (Hebreos 5:14; ayénachó iné echi fotos).

¹³ Cristiano ma ochérikami niya, ke bi ju machiyá echi namuti japi chokichí jonsa bineli, ayénachó machisáré japi Jeobá nulá alí echi busuréliami japi uchuwi echoná Biblia japi tamó iʼwiri machiyá chúriká nata Jeobá. Jiti la we natéami ju japi ta sinibí leéripo echi Biblia, natabo japi aní echoná alí nijéwipo japi ta biné. Suwaba jepuná namuti tamó iʼwírima nokayá japi Jeobá galé (leeri Hebreos 5:14). b

14. ¿Chúriká iʼwírili Pablo echi cristianos Corinto piréami jiti aboi aʼlá nátika nokimea?

¹⁴ Echi cristianos japi ke ochérikami ju, we jilí niraa aʼlá nátika nokayá japalí echoná Biblia ke oserúa chukú nulalíwami japoná aní japi nokisáré. Jiti la, echi ko natámiré japi nokisáré japi aboi nakí. Alí jarecho ko nakiméeré japi  nirúlima bilé nulalíwami jiti machimea japi nokisáré. Japi riká, echi cristianos Corinto piréami, tánili Pablo japi anema achi aʼlá ju japi okema echi koʼwáami japi iyárami nili echi ídolos. Pablo ko ke aneli japi nokisáré, echi ko nalí aneli japi ibili niraa natama japi nokisáré. Japi riká, echi ko ruyeli wiká busuréliami japi uchuwi echoná Biblia japi iʼwírima aʼlá nátika nokayá alí japi ke cha nílitima jarecho (1 Cor. 8:4, 7-9). Echi riká binérili jiti aboi aʼlá natama japi nokimea alí jiti ke buwema japi jarecho anema japi nokisáré.

15. ¿Chúriká iʼwírili Pablo echi cristianos hebreos jiti aminabi cristianos ochérikami nima?

¹⁵ Ayénachó ti biné bilecho namuti we natéami japi anili Pablo echi cristianos hebreos jitra. Echi ko jériká anili: “Auchecho siné binératami níibo Riosi Raʼíchala, achigórigá mapurigátamo chabé chokichí binératami níili” (Heb. 5:12). Echi ko aniwáami ju japi echi hebreos ma ke iʼwérili nokali machiyá echi kulíwami namuti japi Jeobá binérili néeka echi congregación (Prov. 4:18). Japi riká, japi judíos nili chabé, aminabi iʼwérili nokali aniyá japi nijéwisaré echi nulalíwami japi Moisés anili, tákoré ma simírili 30 bamíali japalí Jesús anili japi ma ke nijéwisaré (Rom. 10:4, TNM; Tito 1:10, TNM). Ma wiká bamíali simírili, nalí echi ko kecho bijí aʼlá inámili. Jiti la, Pablo osélili echi carta iʼwírimia echi cristianos hebreos jiti binema echi kulíwami namuti alí aʼlá inámima japi wabé aʼlá nili japi riká nijewi Jeobá jipi, alí ayénachó jiti ke majama alí aminabi nawisama tákoré jarecho judíos sayérili (Heb. 10:19-23).

¿CHÚSIÁ TI KE NATÁSARÉ JAPI TA MA KE NEWALÉ AMINABI WE AʼLÁ OCHÉRIKAMI NIYA?

16. Ma ti cristianos ochérikami nísaká, ¿piri ta ke riwésaré nokayá?

¹⁶ Ata iʼwérili nokisáré jiti cristianos ma ochérikami nipo alí ayénachó jiti ke riwepo echi riká niya. Jiti la, ke ti natásaré japi ta ma ochérikami ju alí japi ta ma ke iʼwérili nokisáré (1 Cor. 10:12). We natéami ju japi ta sinibí aboi we aʼlá nátika inepo achi ta iʼwérili noká aminabi we  aʼlá cristianos ochérikami niya (2 Cor. 13:5).

17. ¿Piri ta biné japi Pablo osélili echi colosenses?

¹⁷ Echoná carta japi Pablo osélili echi colosenses, ayénachó anili japi we natéami ju japi ochérikami nima alí ke riwema echi riká niya. Tákoré echi cristianos ma ochérikami niraa nili, Pablo aneli japi we aʼlá tibuka nokisáré jiti ke ékitami nima echi pagótami jitra japi ke nijéwami ju (Col. 2:6-10). Jiti la echi Epafras, japi we aʼlá machili echi cristianos, wisabé tánili Jeobá japi iʼwírima jiti ke riwema bichiwia alí aʼlá nátika nokimea (Col. 4:12). ¿Piri ta biné? Jiti ta ke riwepo ochérikami niya, ata newalé japi Jeobá tamó iʼwírima alí japi ta iʼwérili nokisáré. Jiti la, Pablo alí Epafras nakiyé japi echi colosenses ke riwema ochérikami niya tákoré ikiyé namuti we jilírami.

18. ¿Piri ikiméeré bilé cristiano japi ma ochérikami ju? (Ayénachó iné echi foto).

¹⁸ Pablo ayénachó aneli echi hebreos japi bilé cristiano japi ma ochérikami ju ayénachó riwema Jeobá amígowala niya. Ke nijéwinalaká Jeobá, echi namuti isima japi kilipi niraa riwema Jeobá alí miná we jilí nirámiré wikáwili ku tania. Nalí echi hebreos ke echi riká ikili (Heb. 6:4-9). Jipi rawé, ¿piri ikí echi cristianos yúa japi ma ke napawí echoná congregación o machibúrami ju echoná jonsa? Japalí ma ke niráami ju alí wikáwili tani, néwariwéliti japi ke ju japi riká echi pagótami japi Pablo jitra raʼíchili. Nalí, japalí ku muliwi Jeobá, newalé japi iʼwíritami nima (Ezeq. 34:15, 16). Jiti la, echi ancianos anémiré bilé cristiano japi ma ochérikami ju japi iʼwírima echi hermano jiti checho ku Jeobá amígowala nima.

19. ¿Piri ta aminabi nokisáré?

¹⁹ Ami iʼwérili isíaká cristiano ma ochérikami nimia, aminabi echi riká isí. Ayénachó ke bi machiyá ripí echi namuti japi mi chokichí jonsa bineli, nalí iʼwérili isí binea japi riká Jeobá nata. Alí, ma mi bilé cristiano ochérikami nísaká, iʼwérili isí jiti mi ke riwema echi riká niya.