BINELÍWAMI 15
CANCIÓN sjj 124 Sinibí nijéwami nipo
Aminabi bichiwi echi Jeobá níwala organización
“ʼNatasi echi jaré jiti mapu ʼyemi napawika bichíyami oʼwéalawala níili, ne siʼnéami mapu ikí ʼyemi mi nawésali Riosi Raʼíchala” (HEB. 13:7).
JAPI TA JITRA BINEPO
Piri ta nokisáré jiti aminabi we natéami niraa inepo echi organización Jeobá níwala alí jiti ke bilé namuti isima japi ta riwepo bichiwia echi.
1. Echi cristianos bachá siglo piréami, ¿chúriká nokali echi nóchali Jeobá níwala?
JAPALÍ Jeobá iyá bilé nóchali echi japi nijéwami ju, sinibí nakí japi we aʼlárika nokimea (1 Cor. 14:33, TNM). Japi riká, echi ko nakí japi nawisárami nima echi binoy Raʼicháala omáana Wichimóbachi (Mat. 24:14). Alí Jeobá wilali Jesús jiti animea chúriká nokiboa echi nóchali. Jesús ayénachó jáwili jaré rijoi jenaʼí Wichimóbachi jiti we aʼlá nokimea echi nóchali. Japi riká bachá siglo, echoná Jerusalén niruili apóstoles alí ancianos japi anili chúriká nokimea alí nuleli echi congregaciones jiti nijéwima (Hech. 15:2; 16:4). Alí ibili echoná congregaciones niruili ancianos japi ruyeli echi hermanos japi nokimea (Hech. 14:23). Jiti echi hermanos we aʼlá nijéwili, echi congregaciones aminabi we bichíwili alí wiká muwésili (Hech. 16:5).
2. ¿Chúriká iʼwírili Jeobá echi puéblowala bamíali 1919 jonsa?
2 Jipi rawé Jeobá echi riká cho isimí echi puéblowala yúa. Bamíali 1919, Jesús chotásili néea jaré rijoi japi ungidos nili jiti ruyema chúriká nokimea nawesia alí jiti iyama suwaba japi newalé echi discípulos a (Luc. 12:42). Alí a newaré japi Jeobá iʼwiri echi nóchali japi noká echi ungidos (Is. 60:22; 65:13, 14).
3, 4. a) Aní bilé ejemplo japi néwariwéliti japi ta we aʼlá noká echi nóchali japi ta iyáari. b) ¿Piri binepo jena binelíwami?
3 Ke ti machisáaká chúriká nokiboa nawesia, ke ti oméripo nokayá echi nóchali japi Jesús nulali (Mat. 28:19, 20). Japi riká, ke ti machisáaká kumi nawisama ibili congregación, a keʼré japi ibili echi hermanos simama japoná echi aboi simánili. Ayénachó ati wisabé niraa nawisáboré japoná ti ma nawésili alí jaréanami ko ke ti siné nawisáboré. ¿Ami newalá bilecho namuti japi néwariwéliti japi ta we aʼlá noká echi nóchali japi ta iyáari?
4 Chabé japalí Jesús biteili jenaʼí Wichimóbachi, echi ko aʼlárika ruyeli echi discípulos chúriká nokimea echi nóchali. Alí jipi rawé echi riká cho isimí echi Jeobá puéblowala yúa. Jena binelíwami ata binepo japi isili Jesús alí chúriká echi organización echi riká cho isimí. Ayénachó binepo piri ta nokisáré jiti néwariwélitipo japi ta we bichiwi echi organización Jeobá níwala.
TAMUJÉ NÍWALA ORGANIZACIÓN ISIMÍ JAPI RIKÁ JESÚS
5. ¿Chúriká isimí echi Jeobá organizaciónwala japi riká isili Jesús? (Juan 8:28).
5 Suwaba japi Jesús isili alí anili, bineli echi Onolá jitra. Jipi rawé suwaba japi bineri echi Jeobá organizaciónwala alí echi busuréliami japi nijí, uchuwi echoná Onorúami Raʼicháala (leeri Juan 8:28; 2 Tim. 3:16, 17). Jiti la, sinibí tamó ané japi ta leéripo echi Biblia alí nokiboa japi ta biné. ¿Chúriká tamó iʼwiri nijewia jepuná busuréliami?
6. ¿Chúriká tamó iʼwiri binea echi Biblia?
6 Binea echi Biblia néeka echi publicaciones, we tamó iʼwiri. ¿Chúsiá? Jiti tamó iʼwiri machiyá achi japi tamó nulé echi organización ju japi riká aní echi Biblia. Japalí ti iné japi a echi riká ju, tamujé ko we bichiwi echi Jeobá níwala organización (Rom. 12:2).
7. ¿Piri nawésili Jesús, alí chúriká echi organización echi riká cho isimí?
7 Jesús nawésili “echi aʼláala raʼíchali Onorúami Gobiérnowala jitra” (Luc. 4:43, 44, TNM). Ayénachó nuleli echi discípulos japi echi riká cho nokimea (Luc. 9:1, 2, TNM; 10:8, 9, TNM). Jipi rawé, sinéami echi japi muchuwi echoná Jeobá níwala organización, ayénachó nawesa echi aʼláala raʼíchali kumi ke japoná piré o tákoré wiká nóchali olá.
8. ¿Chu iyiri nóchali we natéami tamó iyali Jeobá?
8 Simiyá nawisasia echi Onorúami Gobiérnowala jitra, bilé namuti we natéami ju. Nalí, ke chuwé nakíliwa japi echi riká nokimea. Japi riká, japalí Jesús iyénili jenaʼí Wichimóbachi, echi ko ke nakili japi echi demonios nawisama echi jitra (Luc. 4:41). Jipi rawé, japalí bilé pagótami siminali nawisasia echi testigo Jeobá yúa, echi ko bachá néwariwélitisaré japi isimí japi riká Jeobá galé. Jiti la, ¿chúriká ti néwariwélitipo japi ta we natéami niraa iné nawisasia simiyá? Ata iʼwérili nokisáré nawesia omáana japoná ti jari alí chuwé pagótami. Japi riká isili Jesús, tamujé ayénachó iʼwérili nokinali nawesia jarecho alí bineria echi bichíwali (Mat. 13:3, 23; 1 Cor. 3:6).
9. ¿Piri isili echi organización Jeobá níwala binérimia echi Onorúami riwalá?
9 Jesús ko binérili echi Onorúami riwalá. Japalí echi ko raʼíchili echi Onolá yúa, jériká aneli: “Nijé ko machíritili mujé riwalá” (Juan 17:26, TNM). Echi Jeobá níwala organización ayénachó iʼwérili isimí jiti echi pagótami machimea echi Onorúami riwalá. ¿Chúriká isimí? Nee echi Traducción del Nuevo Mundo japi suwaba o pe uchíi bi niraa traducíritami ju 270 simírikami raʼicháliami. Jepuná traducción checho ku uchali echi Onorúami riwalá japoná chukuli ne kulí japalí oserúami nili. Echi apéndices A4 alí A5, we aʼlá ruyé echi jitra. Alí echi apéndice C, japi chukú echoná Biblia de estudio, aʼlá ruyé chúsiá echi Onorúami riwalá 237 niraa oserúa chukusáré echoná Oserúami Griegas Cristianas.
10. ¿Piri ta biné japi anili bilé mukí japalí bineli echi Onorúami riwalá?
10 Japi riká Jesús, tamujé ayénachó binérinali echi pagótami echi Onorúami riwalá. Echi riká isili bilé hermana echomí Myanmar, binérili bilé mukí 67 bamíbami japi Onorúami ko Jeobá riwewi. Japalí echi mukí machili echi namuti, we nalali alí jéanili: “Ke ni siné kipuli echi Onorúami riwalá. [...] Mujé ko tamí binérili bilé namuti we natéami”. Echi jitra, ata biné japi we natéami ju japi ta binéripo echi pagótami echi Onorúami riwalá.
AMINABI NÉWARIWÉLITIPO JAPI TA BICHIWI ECHI ORGANIZACIÓN
11. ¿Chúriká néwariwéliti echi ancianos japi bichiwi echi organización Jeobá níwala? (Ayénachó iné echi fotos).
11 ¿Chúriká néwariwélitima echi ancianos japi we bichiwi echi Jeobá níwala organización? We aʼlá leérika alí nijéwika japi nulá echi organización. Japi riká japalí nuléliwa chúriká nokimea bineria echoná congregación, chúriká raʼichásaré Onorúami yúa echoná napawíliwachi alí chúriká we aʼlá tibuma echi hermanos. Japalí echi ancianos we aʼlá nijewi echi busuréliami japi nijí echi organización, echi hermanos ko nili japi we galéliwa Jeobá jitra alí japi we aʼlá tibúliwa.
Echi ancianos tamó iʼwiri jiti bichíwipo japi tamó ané echi organización Jeobá níwala. (Iné echi párrafo 11). b
12. a) ¿Chúsiá ti nijéwisaré japi tamó nulé echi japi Jeobá jáwili? (Hebreos 13:7, 17). b) ¿Chúsiá ti ke we inésaré echi namuti japi ke aʼlá noká echi japi Jeobá jáwili?
12 Japalí echi ancianos tamó nulé bilé namuti, we aʼlá ju japi ta kanila nijéwipo. Echi riká ke jilí nirama nokayá echi nóchali. Echoná Biblia aní japi Jeobá nakí japi nijéwipo japi echi jáwili (leeri Hebreos 13:7, 17). Nalí isini kaachi we jilí ju, jiti echi ancianos ke sébali aʼlá nokáami ju. Ati we inésaká echi namuti japi ke aʼlá noká, ke aʼlá natabo echi jitra alí miná ko ma ke bichiwia nílipo echi organización Jeobá níwala. Jepuná ko we chati ju jiti tamó sayérala nakí japi ta echi riká nokiboa. We be nalí, ¿piri namuti noká tamó sayérala tamujé ékimia alí piri nokiboa jiti ta ke bichíwipo?
KE RIWEPO JAPI JARECHO NOKIMEA JAPI TA KE BICHÍWIPO
13. Echi tamujé sayérala, ¿piri tamó mayeri echi Jeobá níwala organización jitra?
13 Echi tamujé sayérala tamó mayeri japi chati ju echi aʼláala namuti japi bineri echi Jeobá níwala organización. Japi riká, echi Biblia bineri japi Jeobá ko nakí japi biʼwíami nima tamujé ripokala, japi ke chati namuti nokiboa alí japi ta echi nijéwipo japi riká echi nakí. Ayénachó aní japalí bilé pagótami we cha isiá bitélisaká alí ke riwésaká echi riká isiá, echi ko machibúrami nima echoná congregación jonsa (1 Cor. 5:11-13; 6:9, 10). Jiti ta nijewi echi nulalíwami, tamujé sayérala aní japi ta ke galé echi pagótami, japi ta we cha nokáami ju alí japi tamujé ko mayé japi ta wabé aʼlá noká jarecho yúa.
14. ¿Jépuká ju japi we cha riká raʼicha echi Jeobá níwala organización jitra?
14 Satanás ju japi tamó sayeri. Echi ju japi isimí japi we cha riká raʼichárami nima echi Jeobá níwala organización jitra. Alí ma echi riká isili bachá siglo. Echi Biblia aní japi “echi riablo ne chokila ju ne suwaba echi ʼyékalawami” (Juan 8:44; Gén. 3:1-5).
15. Echi weli binériami echoná tiyópachi, ¿chu olali Jesús alí echi discípulos?
15 Tákoré Jesús Onorúami Nolá nili, sébali aʼlá isíami alí isili wiká milagros, Satanás ko néeli echi pagótami jiti animea wiká namuti japi ke bichíwali ju Jesús jitra. Japi riká, echi weli binériami echoná tiyópachi anijoli japi Jesús ko machí awali echi demonios néeka echi walúala demonios nuléami (Mar. 3:22). Alí japalí Jesús winijírami nili, echi líderes religiosos ikaleka raʼíchili Jesús jitra alí nokali japi echi pagótami animea japi miʼárami nima (Mat. 27:20). Pe aminana, japalí echi discípulos chotásili nawesia, echi sayérala “naʼáwatali echi auché isena pagótami” jiti sayérima echi discípulos (Hech. 14:2, 19). Ruyemia japi aní Hechos 14:2, echi oselí La Atalaya 1 inárachi diciembre bamíali 1998, ruyeli japi echi judíos ke kipuli japi nawésili echi cristianos, nalí ke echi bi nokali, ayénachó “wiká chati namuti anijoli echi jitra” jiti echi pagótami jaréanami piréami sayérima echi cristianos.
16. ¿Piri ta newalásaré japalí jarecho ikaleka raʼicha echi organización alí echi hermanos jitra japi Jeobá jáwili?
16 Satanás ko “sinibí wabé ʼyékiami ju jenaʼí wichimóbachi piréami pagótami” alí ke riwé echi riká isiá (Apoc. 12:9). Jiti la, ati kipúsaká japi jarecho cha riká raʼicha echi organización alí echi hermanos jitra japi Jeobá jáwili, ati newalásaré japi ikili chabé Jesús yúa alí echi discípulos. Japi riká anili echi profecías, jipi rawé echi pagótami cha olá alí ikaleka raʼicha echi testigo Jeobá jitra (Mat. 5:11, 12). Nalí be, tamó sayérala ke tamó ékima ati machisáaká japi Satanás ju japi echi riká isimí alí ati we aʼlá tibuka nokisáaká. Nalí, ¿chúriká tibuka nokiboa?
17. ¿Piri ta nokisáré japalí jarecho raʼicha echi namuti japi ke bichíwali ju? (2 Timoteo 1:13; ayénachó iné echi recuadro “ ¿Piri ta nokisáré echi namuti jitra japi ke bichíwali ju?”).
17 Ke kipupo echi raʼíchali ke bichíwali. Echi apóstol Pablo anili piri ta nokisáré japalí jarecho tamó raʼichi echi namuti japi ke bichíwali ju. Echi ko aneli echi cristianos japi “ketasi nijéwama echi jaré pagótami karúmati irétaga raʼíchami” (1 Tim. 1:3, 4). Ayénachó aneli echi Timoteo japi ke kipúsaré alí ke nijéwisaré echi raʼíchali ke bichíwali (1 Tim 4:7). Natabo jepuná jitra: Bilé taa towí ritiwá bilé namuti echoná wichika atíami alí echi ko ujú alí rinílachi achá; nalí bilé pagótami japi ma waʼlú ju, ke echi riká isima. ¿Chúsiá? Jiti echi ko machí japi echi namuti wichí asali alí nayúntima. Echi riká cho, tamujé ke kipú echi raʼíchali ke bichíwali, nalí tamujé ko kipú echi raʼíchali japi ne bichíwali ju (leeri 2 Timoteo 1:13).
18. ¿Chúriká ti néwariwélitipo japi ta bichiwi echi organización Jeobá níwala?
18 Jenaʼí binelíwami ata bineli bikiá namuti japi chúriká echi organización isimí japi riká Jesús, nalí ke echi bi ju. Aminabi mi binesa echi Biblia, ami riwimea jarecho namuti. Jiti la, kiti riwé iʼwiria echi hermanos jiti aminabi bichíwima echi organización. Ayénachó iʼwérili isí nóchilia Jeobá alí kiti riwé japi jarecho namuti isima japi mi riwema echi organización japi echi nee (Sal. 37:28). ¿Kechi ko ti we kanili nóchilia Jeobá jenaʼí organización japoná nirú pagótami we galéami alí we nijéwami? Jiti la, ¡we natéami niraa inepo nóchilia Jeobá!
¿PIRI MI ANIMEA?
-
Echi organización Jeobá níwala, ¿chúriká isimí japi riká Jesús?
-
¿Chúriká sinibí néwariwélitipo japi ta bichiwi echi organización Jeobá níwala?
-
¿Piri ta nokisáré echi namuti jitra japi ke bichíwali ju?
CANCIÓN sjj 103 Jeobá nijí echi ancianos
a Iné echi recuadro “¿Y por qué 1919?”, echoná libro La adoración pura de Jehová: ¡por fin restaurada!, páginas 102 alí 103.
b JAPI RUYÉ JAPI MACHINA ECHONÁ FOTOS: Echi ancianos napawika muchuwi raʼichamia chúriká nokimea echi hermanos japalí nawisasia simía. Miná ko, bilé echi hermano ané okuá hermanas japi nawisama echoná carrito, nalí japi echoná pared niraa repoweka.
