Nijé ko ochériki echalí bamíali 1955, alí ni tabéala ju echi bikiá nijé bachilá yúa. Ani biteili echoná costa sur echomí Finlandia, japi jipi ko machirúami ju japi riká echi ciudad de Vantaa.

Nijé iyela pakoli jaré bamíali kecho ochériachi nijé. Nalí nijé onolá ko we iyoli alí aneli nijé iyela japi ma ke tamó binérima echi Biblia alí japi ke cho tamó yúrima echoná napawíliwachi. Jiti bela, japalí nijé onolá ke atiyé echoná bitichí, nijé iyela ko tamó binerie Jeobá jitra.

Taa towí ka jonsa, ma ni nóchinilie Jeobá alí nijéwinilie. Japi riká, japalí ni kichao bamíbami nili, echi maestra we iyoli jiti ni ke koʼnalie bilé rimé verilättyjä riwéami, japi la achérami nili. Echi ko tamí rinílachi chapiki, tamí pachana achélimia echi koʼwáami. Ani ochoki echi maestra sikala jiti echi riká sutanama echi cuchara.

Japalí ni 12 bamíbami nili, nijé onolá mukuli. Echalí jonsa, ani omériki simiyá echoná napawíliwachi alí echi hermanos we tamí iʼwírili jiti ni we aʼlá Jeobá amígowala nima. Ani chotásiki leeria echi Biblia sinibí rawé alí we aʼlá binea jarecho si publicaciones. Isiá jepuná we tamí iʼwírili, jiti la 8 inárachi agosto bamíali 1969, ani pakoki 14 bamiba.

 Japalí ni ma machíniki echoná escuela jonsa, ani chotásiki precursor regular niya. Miná ko ni simiki echomí Pielavesi, bilé pueblo echoná Finlandia, jiti ni iʼwírima nawesia.

Echoná Pielavesi, ani machiki Sirkka, japi jipi nijé upila ju. Echi namuti japi ni we galeki japi riká nili Sirkka ko ju, japi echi ko ke nirálami nili alí we aʼlá Jeobá amígawala nili. Ayénachó ke iʼwérili isié wiká namuti olamia. Okuánika ti we nóchinilie Jeobá alí ta nokinalie chuwé nóchali japi tamó iyalie. Ati niwiki 23 inárachi marzo bamíali 1974. Ke ti simíaki basalówisia, nalí ti simíaki Karttula, japoná newaleli Testigos jiti nawisama.

Japalí ti jonsa niwili, Jeobá ko tamó néwariwélitili japi tamó iyama japi ta newalé, ati bachá natéami niraa inésaká echi Onorúami Gobiérnowala (Mat. 6:33, TNM). Japi riká, echoná Karttula ke ti olayé carro. Ne kulí ko, ati néeli bilé bicicleta. Nalí we ruláachi ko, ke ti omeri néea simamia nawisasia. Ayénachó, japoná nawesie echi congregación we miká nili, jiti la ti newaleli bilé carro, nalí ke ti olayé winomí japi jitra raliboa.

Siné rawé, bilé nijé bachilá nawali tamó inesia alí tamó chiliweli echi binoy níwala carro. Tamujé ko gasolina bi roʼesa riweili alí ke ti newaleli japi ta natétipo echi seguro. ¡Echalí jonsa ma ti olayé bilé carro!

Jeobá ko néwariwélitili japi sinibí tamó iyama japi ta newalé. Tamujé ko bachá nokisaa riweili bi japi echi nulá alí we natéami niraa inea echi Onorúami Gobiérnowala.

Bamíali 1978, japalí ti mochili echoná Escuela japi biné echi Precursores, bilé hermano japi binériami nili echoná escuela, Raimo Kuokkanen riwéami, a tamó aneli japi aʼlá nima japi ta simabo echoná Escuela de Galaad. Jiti la ti chotásiki binea echi raʼíchali inglés niraa, nalí ke ti séaki júulia echi solicitud jiti bamíali 1980 ata bayeri nochamia echoná sucursal japi wilí echoná Finlandia. Echalí, echi betelitas ke omerie júulia echi solicitud simamia echoná Galaad. Tamujé ko aminabi nóchinilie Jeobá japoná echi tamó júulie, ke ko japoná tamujé nakí. Jiti la ti simíaki echomí Finlandia. Nalí ke ti riweki  binea echi raʼíchali inglés niraa, jiti ta nátiki japi pe aminana ma ti omérisaká, julabo echi solicitud.

Japalí ma jaré bamíali simírili, echi Japi Aʼlá Niseri anili japi echi betelitas ma omérima simíaya echoná Galaad. Jiti la ti sapú júuliki echi solicitud. We ti kanilie nochia echoná Betel, nalí ayénachó ti simánilie iʼwírisia jaréanachó país japoná newaléliwa. Ati bayeri jiti simabo echoná Escuela de Galaad número 79, alí ti suniki echi michá septiembre bamíali 1985. ¡Alí ti juláari echomí Colombia!

Japalí ta siki echomí Colombia, ati bayeri nochamia echoná sucursal. Nijé ko iʼwérili isiki we aʼlá nochia, nalí ani nílili japi ta nochásaré bilecho asignación. Jiti bela, ma bilé bamíali simírisa, ani taki bilecho nóchali. Echalí bi nili japalí ni echi riká isiki. Alí miná ko, ata juláari echoná ciudad Neiva, echomí Huila.

Sinibí ni we kanilie nawesia. Echomí Finlandia, japalí ni precursor ke alí kecho niwíkami, isini kaachi ani biʼá jonsa nawesie alí rokojó chéami. Alí japalí ni ma niwiki, Sirkka alí nijé, ayénachó ti nawesie suwaba rawé. Japalí ti we miká simíaye nawisasia, isini kaachi ko ati ochiyé echoná carro alí echi riká ti biʼá chotasie nawesia.

Nóchilia Jeobá japi riká misioneros, we tamó kanílitili jiti ta ma checho ku nawesie japi riká chabé. Echi congregación japoná ti mochili aminabi wiká muwésili, alí echi hermanos Colombia piréami we simá nokáami ke, riwíwiami alí sinibí matétara nijíami.

Mulipi echoná Neiva, niruili wiká pueblos japoná ke bilé Testigo biteili. Nalí jiti echoná echi pagótami we nakoa pireili, ke ti omérili simíaya nawisasia echomí. Jiti la ni we natie, ¿chúriká machimea echi bichíwali echi pagótami echoná piréami? Alí miná ko ni chotásiki tania Jeobá japi iʼwírima bilé pagótami Neiva bitéami jiti binema Jeobá jitra, nalí japi echi ko ochérikami nima echoná pueblo. Ayénachó ni tanie japi echi ko ma pakosa, ku simea echomí pueblo nawisasia. Ani natie japi we aʼlá nili japi ni tanie, nalí Jeobá ko isili wabé rasíruka aʼlá namuti.

Miná ko, ani chotásiki bineria bilé remalí Fernando González riwéami, japi biteili echomí Algeciras, japoná ke bilé Testigo niruili. Fernando ko 15 horas isié simiyá nochamia echomí Neiva. Echi ko we aʼlá binéi japi binéporé ibili tarali alí sapú chotásili simiyá echoná napawíliwachi. Ayénachó, echi tarali japalí kulí chotásili binea, echi ko napabuli echi pagótami echoná pueblo piréami binérimia japi echi binéi.

Fernando pakoli echi michá enero bamíali 1990, alí kulí usani michá simírisa, echi ko ma precursor regular nílili. Jiti ma niruili bilé Testigo echoná Algeciras, echi sucursal júali echi precursores especiales echoná pueblo. Alí echi michá febrero bamíali 1992, ma niruili bilé congregación echoná pueblo.

 Fernando ko ke ripili nawesia echoná Algeciras. Japalí ma niwili, echi alí echi upila Olga, simíali biléanachó pueblo japoná ke bilé Testigo niruili: San Vicente del Caguán riwéachi. Echoná ayénachó iʼwírili jiti nirúlima bilé congregación. Alí bamíali 2002, echi ko superitendente de circuito nílili, alí jipi a bijí echi riká nóchilia muchuwi Jeobá.

Jepuná jitra, nijé ko bineki japi we natéami ju aʼlá ruyea Jeobá echi namuti japi ta nakí echi asignación jitra. Jeobá ko omeri isiá echi namuti japi tamujé ke omeri alí echi níwala ju echi nóchali, ayénachó echi ju japi tamó nulé (Mat. 9:38).

Bamíali 1990, ani wilaari japi riká superitendente de circuito, alí bachá japoná ta simíali nawisasia ko nili echomí Bogotá. Sirkka alí nijé, ati ju japi riká sinéami echi pagótami, alí ti ke me machí wiká namuti. Ke ti binéami nili pirea bilé ciudad japi waʼlú ju. Jiti la ti majaa nilie japalí ti nareki jepuná kulíwami nóchali. Nalí be, Jeobá ko isili japi riká aní Filipenses 2:13, (TNM): “Onorúami ko ju japi isimí japi timí nokinálima japi aʼlá ju alí jiwérili nijí jiti timí echi riká nokimea”.

Pe aminana, ati juláari echomí Medellín, echi ciudad japi ni jitra raʼíchiki ne bachá. Echoná wiká pagótami ma ke majaa pireili, jiti echi ko sinibí inéi wiká pagótami we cha nokáami. Siné kaachi, nijé ko asali bineria bilé rijoi echi bitélachi, alí ke sayiná ni kipuki nimúami echoná machí ayé. Nijé ko sojí wichika boʼíaki, nalí echi binéami ko ke riweli leeria japi riká ko ke bilé namuti ikiyá. Japalí ma sunili leeria, echi ko anili japi pe teili machínima, alí miná ko ku nawali okuá kuuchi toyá. Kilí niraa echi ko tamí jéaneki: “Tamí wikawi, ani simiki mea nijé kúchuwala”.

Ke echalí bi nili japalí ti we majaki. Siné kaachi ati nawesia járili bitichí niraa, japalí ke sayiná nijé upila maa ku nolíniki japoná nijé iyénili. Alí we majaka tamí aneki japi echi nimuiri; nijé ayénachó we majaki. Nalí miná ko, ati machiki japi ke echi nimuiri, nalí nimúa nokali bilé rijoi japi echoná mulipi simiria inárili.

Pe aminana ko, ma ti ke me majaa nilie. Tamujé ko ineli japi echi hermanos we anáchami ju echi namuti we jilírami alí ti nátiki japi Jeobá iʼwírisaká echi, ayénachó tamujé iʼwírima. Sinibí ti nijewie echi busuréliami japi tamó anéi echi ancianos echoná congregaciones, we ti aʼlá tibuka nokayé alí ti we bichiwie Jeobá.

A bichíwali ju japi ke sinibí ikiyé namuti wabé jilírami japi riká ti mayeli. Japi riká, siné kaachi japalí ni asali bilé pagótami bitélachi, ani kipuki japi riká ko machí ayé okuá umukí naʼawia jarie. Ke ni inénilie echi naʼáwiami, nalí echi pagótami echoná bitéami tamí aneki japi ni machí inema. Japalí ni ma ineki, ani riwaki japi okuá pericos nili japi tinichia uchutie japi riká raʼichie echi pagótami.

Bamíali 1997, ani wilaari japi riká binériami echoná Escuela de Entrenamiento Ministerial. b We ni kanilie simiyá echoná escuelas japoná binériwa, nalí ke ni siné mayeli japi ni binériami nima echoná escuela.

Pe aminana, ani ayénachó niki superitendente de distrito. Nalí, japalí ma ke niruili echi nóchali, ani checho ku circuito níliki. Ma ni 30 bamíali simírikami nochi japi riká binériami echoná escuelas alí japi riká superitendente de circuito. We ni kanili echi riká nochia, nalí ayénachó jilí ju. ¿Chúsiá ni echi riká aní?

Ani machí japi ni pe iyóami ju alí ni sapú aní japi ni nata. Echi riká niya tamí iʼwírili jiti ni anachama namuti jilírami, nalí isini kaachi ayénachó isili japi ni we jiwérika animea japi chúriká akaréwima jaré namuti japi ke aʼlá nokiwá echoná congregaciones. Japi riká, isini kaachi ani iʼwérili anéi echi hermanos japi simá nokáami nísaré jarecho yúa. Nalí, echalí nili japalí nijé binoy echi riká nisa riweili (Rom. 7:21-23).

Isini kaachi we ni siwea nílili jiti ni echi riká isíami ju (Rom. 7:24). Japi riká, siné kaachi we ni omona nilie alí ni aneki Jeobá japi aʼlá nima japi ni riwema misionero niya alí ni ku roʼima echomí Finlandia. Nalí echalí rokojó echoná napawíliwachi, ani kipuki bilé namuti japi tamí natárili japi ni ke riwésaré misionero niya alí japi ni iʼwérili isísaré aminabi aʼlá isiá. Sinibí ni newalama japi riká isili Jeobá tamí iʼwiria alí ayénachó ni matétara iyá jiti we simárika tamí iʼwírili jiti ni aʼlá isíami nima.

Sirkka alí nijé, ata waʼlú matétarabá iyá Jeobá jiti isili japi ta echi nóchilipo tiempo completo niraa. Ayénachó ni matétara iyá jiti tamí iyali bilé upila japi we tamí galé alí tamí iʼwírili suwaba echi bamíali.

Ma mulipi ni olama 70 bamíali, jiti la ni ma ke binériami nima echoná escuelas alí ni ke cho nima superitendente de circuito. Nalí jepuná ko ke isimí japi ni omona nílima, jiti ni machí japi ta ke newalé olayá bilé nóchali we natéami walubéala anemia Jeobá. Wabé natéami ko ju japi ta ke nirálami nipo echi nóchilia alí japi ta we galebo echi alí matétara nijíami nipo (Miq. 6:8; Mar. 12:32-34).

Japalí ni nata suwaba echi nóchali japi ni nareli, ani machí japi ke tamí iyáari jiti ni we machíami ju o jiti ni we natéami ju jarecho yúa. Alí tákoré nijé ko ke sébali aʼlá isíami ju, Jeobá tamí iyali echi nóchali jiti we galéami ju. We ni aʼlá machí japi Jeobá tamí iʼwírili jiti ni isima suwaba echi nóchali. Echi tamí jiwérili iyali tákoré isini kaachi ke ni aʼlá isié (2 Cor. 12:9, TNM).