1. ¿Piri aniwáami ju echi paraíso espiritual, alí piri ta nokinali?

 JIPI rawé japi ta Jeobá nijéwami ju, ata piré echoná paraíso espiritual. Nalí, ¿piri aniwáami ju “paraíso espiritual”? Echi ko ju kanila napawika nóchilia Jeobá echi puéblowala yúa. Jiti la, sinéami ke ti riwénali echi riká nokayá alí ti bayé jarecho jiti ta nakí japi wiká pagótami ayénachó tamujé yúa napawima.

2. ¿Piri namuti isimí Jeobá echi puéblowala jitra?

² Jeobá ko isili japi echi puéblowala we kanílika alí napawika nóchilima echi, tákoré jenaʼí Wichimóbachi ikí wiká namuti chati alí echi pagótami we kichía piré (1 Juan 5:19; Apoc. 12:12). Alí Jeobá ko machí japi echi chati namuti risoa níliti echi pagótami. Jiti la, echi ko tibú binoy puéblowala jiti ke majama alí kanílika nóchilima echi. Echoná Biblia ruyé japi ju japi riká ko pirea echoná weʼé siyónami alí we baʼóami japoná ke siné wakiché (Is. 4:6; 58:11). Jeobá ju japi iʼwiri echi puéblowala jiti kanílika pirélima tákoré jipi jubáami rawé ikí namuti we jilírami (Is. 54:14; 2 Tim. 3:1).

3. ¿Chu kabú ne bachá ikili japi aní Isaías capítulo 65?

³ Isaías capítulo 65 ruyé chúriká nóchilima riweili echi Jeobá puéblowala. Japi aní echi capítulo ne bachá ikili echalí bamíali 537 kecho nawáachi Cristo. Echalí echi judíos japi riweli cha nokayá, buyali echoná Babilonia jonsa alí ku simíali echi weʼéwalachi. Jiti Jeobá ko iʼwírili, echi ko ku atéwili Jerusalén japi najúa wilili alí checho ku we semati niwali echi ciudad. Ayénachó ku atéwili echi templo, jiti echi israelitas checho ku nijéwima Jeobá echoná (Is. 51:11; Zac. 8:3).

4. ¿Chúriká ikísimi jipi rawé echi profecía japi anili Isaías?

 ⁴ Echi namuti japi anili Isaías japi upá ikimea riweili, ma ikísimi jipi rawé, alí echi ko chotásili bamíali 1919 japalí echi Onorúami puéblowala buyali echi Walúala Babilonia jonsa. Echalí jonsa, echi Onorúami puéblowala we kanílika nóchili Jeobá alí aminabi muwésili omáana Wichimóbachi. Jiti iʼwérili nokali nawesia, iʼwírili jiti nirúlima wiká congregaciones. Ayénachó wiká rijoi alí umukí japi cha nokáami nili, chotásili nokayá japi Jeobá galé (Efes. 4:24). A bichíwali ju japi wiká namuti aʼláala japi Isaías anili, ati narepo pe aminana echoná Wichimóbachi we baʼóachi. Nalí jipi rawé ati naré wiká namuti aʼláala. Ma binepo chu iyiri ju echi namuti alí chúsiá ke ti siné riwésaré nóchilia Jeobá echi puéblowala yúa.

JAPI TA NARÉ JITI TA KANILA NAPAWIKA NOCHI JEOBÁ ECHI PUÉBLOWALA YÚA

5. Japi riká aní Isaías 65:13, ¿piri namuti ta olá japi ta nijéwami ju?

⁵ Ati olá suwaba japi ta newalé. Echoná Isaías aʼlá ruyé japi chúriká piré echi japi muchuwi echoná Jeobá puéblowala alí echi japi machí muchuwi (leeri Isaías 65:13). Japi riká, echi japi nijéwami ju Jeobá ko iyá echi espíritu santo, binoy Raʼicháala alí wiká oselí jiti echi jitra binema. Alí echi ko ju japi riká koʼwáami japi ta newalé jiti kanila pirélipo (ayénachó iné japi aní Apocalipsis 22:17). Nalí echi japi ke muchuwi echoná Jeobá puéblowala alí ke nijéwami ju, ke kanila piré jiti ke machí Jeobá jitra alí ke echi amígowala ju (Amós 8:11).

6. Japi riká aní Joel 2:21-24, ¿piri aniwáami ju echi koʼwáami alí chúriká tamó iʼwiri?

⁶ Echoná bilé profecía, Joel ko anili japi Jeobá iyama riweili binoy puéblowala echi koʼwáami japi we newalé, japi riká echi vino, aceite oliva jitra niwárami alí jarecho si namuti (Joel 2:21-24). Echi jitra, echi ko ruyá anili japi Jeobá ko iyama riweili echi puéblowala suwaba namuti japi newalé alí bilé echi ko ju japi ta olabo echi namuti jiti binepo echi jitra. Japi riká, echi ko tamó iyá echi Biblia, wiká oselí, echi página internet, napawíliwami alí waʼlú napawíliwami. Suwaba echi namuti jitra, ati naré jiwérali jiti ke riwepo Jeobá alí jiti kanílika nóchilipo echi.

7. ¿Chúsiá tamujé sulala we kaníliami ju? (Isaías 65:14).

⁷ Ata we kaníliami ju. Echoná Biblia aní japi echi cristianos “we kanílika sinákima jiti echi sulala we kanili” (leeri Isaías 65:14). ¿Chúsiá “echi sulala we kanili”? Jiti biné echoná Biblia echi namuti we aʼláala japi iʼwérili iyá alí japi bichíwali ju. Alí jiti Jesús ma mukuli echi jitra, ayénachó buwea piré echi aʼláala namuti japi ikimea pe aminana. Jiti la, ¡sinéami we kanili japalí raʼicha echi hermanos yúa echi namuti we baʼóami! (Sal. 34:8; 133:1-3).

8. ¿Chu iyiri okuá namuti iʼwiri echi Jeobá puéblowala kanila nóchilia Jeobá?

⁸ Okuá namuti japi iʼwiri echi Jeobá puéblowala jiti kanílika nochama, echi ko ju japi napawika ju alí we galé anakupi niraa. Jepuná néwariwéliti japi chúriká pirélipo echoná kulíwami Wichimóbachi, nalí wabé aʼlá nima jipi yúa (Col. 3:14). Bilé hermana aní chu nílili japalí machili echi testigo Jeobá:  “Nijé ko ke kaníliami nili, ke cho nijé téemala yúa. Nalí nijé ko ineki japi echi Testigos wabé galéami ju”. Jiti la sinéami japi kaníliami nínali, napawísaré echi Jeobá puéblowala yúa japi kaníliami ju. Tákoré jarecho cha riká raʼicha echi Jeobá puéblowala jitra, tamujé ko we natéami ju Jeobá jitra alí echi japi nijéwami ju (Is. 65:15).

9. ¿Piri ikimea echi chati namuti japi tamó risoa níliti? (Isaías 65:16, 17).

⁹ Ati ke majaa alí kilí nili. Isaías 65:14 aní japi echi pagótami japi ke moʼinali echi Jeobá puéblowala yúa, “sinákima alí nalákima” jiti echi sulálachi we omónima. Alí, ¿piri ikimea echi chati namuti jitra japi risoa níliti echi Jeobá puéblowala? Jeobá ko aní: “Echi jilírami namuti japi ikili chabé ma ke newalárami nima; nijé ko ma ke inema” (leeri Isaías 65:16, 17). Echi ko kárika suwábima echi jilírami namuti alí tamujé ko ma ke che newalabo japi echi chati namuti tamó risoa nílitili.

10. ¿Chúriká mi iʼwiri napawía echi Jeobá puéblowala yúa? (Ayénachó iné echi foto).

¹⁰ Japalí ti muchuwi echoná napawíliwachi, ati kilí nili alí ti ke nata echi chati namuti japi ikísimi. Nalí, ¿piri ti nokisáré jiti aminabi echi riká nílipo echoná Onorúami puéblowala? Iʼwérili nokiboa jiti galéami nipo, kaníliami, simá nokáami alí jiti kilí nipo (Gál. 5:22, 23). ¡We ti kanili jiti ta muchuwi echoná Jeobá puéblowala! Ati ke riwésaká napawika nóchilia Jeobá echi puéblowala yúa, ati inepo chúriká “niwama kulíwami ripá siyónami alí bilé kulíwami wichimoba”.

11. ¿Chuti nili jiti ta muchuwi echoná Jeobá puéblowala? (Isaías 65:18, 19).

¹¹ We ti kanili alí ti waʼlú matétara iyá Jeobá. Isaías ko ruyé chúsiá echi Onorúami puéblowala we kaníliami ju. Jiti Jeobá ju japi echi riká isimí japi sinéami kanila napawika nóchilima echi (leeri Isaías 65:18, 19). Jiti la, Jeobá ko tamó nee jiti iʼwíripo echi pagótami jiti binema echi bichíwali alí jiti mulíwima echi binoy puéblowala. Japi ta muchuwi echoná Jeobá puéblowala, ¡we ti kanili jiti ta naré wiká namuti aʼláala! Jiti la ti ruyénali jarecho suwaba echi namuti jitra (Jer. 31:12).

12. ¿Chumi nili japalí mi leeri japi aní echoná Isaías 65:20-24, alí chúsiá?

¹² Japi ta napawika nochi Jeobá echi  puéblowala yúa, ata we kanili echi namuti jitra japi Jeobá isima pe aminana. Natá suwaba japi mi omérima inea alí isiá japalí ma we baʼóami nisa jenaʼí Wichimóbachi. Echi Biblia ruyé japi echoná ma ke nirúlima kuuchi japi kuabi rawé bi pirélima, ke cho echi ochérami japi ayó suwimea. Ayénachó aní japi echi pagótami “aboni niwaká kalí pirélima echoná; aboni ichaká koʼmea rakesa”. Alí japi Jeobá iyama wiká namuti aʼláala echi japi we jiwérika noká nochia, japi we kanílika pirélima alí ke majaka. Echi ko aʼlá machimea japi newalé tákoré kecho bijí tani alí “[iyama] ibili niraa japi echi newalé” (Is. 65:20-24; Sal. 145:16).

13. ¿Chúriká ruyé Isaías 65:25 japi riká isimí bilé pagótami japalí chotásimi nijewia Jeobá?

¹³ Ati kilí alí ke majaa piré. Echi espíritu santo jitra, wiká pagótami japi we obátami nili, jipi ko we kilí ju (leeri Isaías 65:25). Echi ko iʼwérili nokali jiti ma ke obátami nima (Rom. 12:2; Efes. 4:22-24). A bichíwali ju japi echi Onorúami puéblowala ke sébali aʼlá nokáami ju, jiti la isini kaachi ke aʼlá nokiméeré. Tákoré echi riká ju, Jeobá ko isimí japi echi puéblowala napawika nochama alí galéami nima anakupi niraa (Tito 2:11). ¡Ke nirú bilecho japi isíami ju japi riká Jeobá!

14. ¿Chúriká ikili bilé hermano japi riká aní Isaías 65:25?

¹⁴ Nalí, ¿achi omeri bilé pagótami ma ke niya japi riká nili chabé? Ayénaʼá. Echi riká isili bilé rijoi japi 20 bamíbami nili. Echi ko we aparúami nili alí isili nasawíliami chati. Ayénachó wisabé echoná cárcel asali jiti isili wiká namuti chati, japi riká chikoa carros alí jarecho si namuti. Alí echi ko sinibí nikoa iyénili. Japalí kulí machili echi bichíwali japi aní echi Biblia, echi ko chotásili simiyá echoná napawíliwachi echi testigo Jeobá yúa alí machili japi we kanílika bitélima nóchilisaká Jeobá echi puéblowala yúa. Pe aminana japalí ma pakoli, wisabé niraa nátili japi echi ko ikili japi riká aní Isaías 65:25, japi echi ko riweli niya japi riká bilé mawiyá we aparúami alí nílili japi riká bilé boʼwá.

15. ¿Chúsiá ti iʼwírinali echi pagótami jiti Jeobá puéblowala nima, alí chúriká ti iʼwiri?

¹⁵ Isaías 65:13 jériká chotasi: “Jepuná ko ju japi aní echi Walubéala Jeobá”. Alí echoná versículo 25 jériká suní: “Echi riká aní Jeobá”. Japi echi aní, sinibí echi riká ikí (Is. 55:10, 11). Jipi rawé, echi Jeobá puéblowala ma kanila napawika nochi Jeobá japi riká echi binoy anili. Echi ko isili japi sinéami echi hermanos kilí pirélima anakupi niraa tákoré jipi omáana ikí wiká chati namuti alí echi pagótami we naʼáwika piré (Sal. 72:7). Jiti la ti iʼwérili nokinali iʼwiria wiká pagótami jiti ayénachó moʼimea echoná Jeobá puéblowala. ¿Chúriká ti nokiboa? Ati iʼwérili nokiboa nawesia alí bineria echi pagótami (Mat. 28:19, 20).

CHÚRIKÁ IʼWÍRIPO ECHI PAGÓTAMI JITI MOʼIMEA ECHONÁ JEOBÁ PUÉBLOWALA

16. ¿Chúriká iʼwíripo echi pagótami jiti ayénachó mulíwinalima echoná Jeobá puéblowala?

¹⁶ Sinéami ti omeri iʼwérili nokayá iʼwiria echi pagótami jiti mulíwinalima echoná Jeobá puéblowala. ¿Chúriká nokiboa? Nipo japi riká Jeobá. Echi ko ke iʼwérili ané echi pagótami jiti nokimea japi echi nakí, nalí simárika bayé jiti mulíwima echi (Juan 6:44, TNM; Jer. 31:3). Echi pagótami japi aʼláala ju alí  biné Jeobá jitra, echi ko aboi mulíwinalima echi. Jiti la, ¿piri namuti ta nokisáré iʼwiria jarecho jiti ayénachó mulíwinalima echoná Jeobá puéblowala?

17. ¿Piri nokiboa jiti iʼwíripo echi pagótami jiti mulíwinalima echoná Jeobá puéblowala?

¹⁷ Bilé namuti japi tamó iʼwírima jiti echi pagótami mulíwinalima echoná Onorúami puéblowala, echi ko ju galea sinéami echi hermanos alí simárika nokayá echi yúa. Tamujé ko nakí japi echi pagótami japi simía echoná napawíliwachi, ayénachó animea japi riká echi pagótami chabé piréami japi simíaliré echi napawíliwami echoná Corinto: “Riosi ne bichíwali ʼyemi yuwa atí” (1 Cor. 14:24, 25; Zac. 8:23). Jiti la we natéami ju japi ta nijéwipo jepuná busuréliami: “Sinibí ne galá kilíi ologá pirélasi aʼnagupi” (1 Tes. 5:13).

18. ¿Chúriká ta nísaré echi hermanos yúa jiti echi pagótami mulíwinalima echoná Jeobá puéblowala?

¹⁸ Ayénachó ati iʼwérili nokisáré inea echi hermanos japi riká Jeobá iné. Japi riká, ata inésaré echi aʼláala namuti japi noká, ke ko echi namuti japi ke aʼlá noká, jiti echi ko pe aminana ma sébali aʼlá nokáami nima. Alí tamujé ko sapú akaréwipo japalí ta naʼáwisa echi hermanos yúa, ata nijéwisaká jepuná busuréliami: “Sinibí wabé galabé oláami níisi. Sinibí aʼnagupi wabé natimasi, ayénachó aʼnagupi ku wikáwasi” (Efes. 4:32). Sinéami pagótami japi nakí japi echi riká olárami nima, mulíwinalima echi Jeobá puéblowala. a

 KITI RIWEPO NÓCHILIA JEOBÁ ECHI PUÉBLOWALA YÚA

19. a) Japi riká aní echi recuadro “ Riweli echi Jeobá puéblowala alí jipi ko ma ku rotówili”, ¿chu anijoli jaré hermanos? b) ¿Piri ta nokinálisaré? (Ayénachó iné echi dibujo).

¹⁹ ¡We semati ju kanila nóchilia Jeobá echi puéblowala yúa! Alí jipi wabé semati ju chabé yúa alí ayénachó wiká nirú japi Jeobá nijéwami ju. Jiti la, waʼlú matétarabá iyabo Jeobá jiti echi isili japi ta kanila nóchilipo sinéami hermanos yúa echoná puéblowala. Sinéami japi kanila pirélinali, kilí niraa alí ke majaka, echi ko nóchilisaré Jeobá echi puéblowala yúa alí ke siné riwésaré. Nalí we ti aʼlá tibuka nokisáré, jiti Satanás tamó ékinili alí iʼwérili isimí japi ta riwepo nóchilia Jeobá echi puéblowala yúa (1 Ped. 5:8; Apoc. 12:9). Kiti riwepo japi echi Satanás niyúrima. Iʼwérili nokiboa jiti sinéami japi muchuwi echoná Jeobá puéblowala, we kanílika alí kilí niraa nóchilima echi.